السلايف

 السلايف 
للكاتبة أسماء عبد الهادي 

قصة قصيرة 

قصص للعبرة

السلايف 

فضلت تنهج بحماسة شديدة وبعدها اتأكدت أنها حامل 

فرحت اوي 

_الحمد لله يارب الحمد لله يارب اجعله بشرة خير 

ومن فرحتها قالت للكل بكل براءة ومش في نيتها اي حاجة خالص هي كانت فرحانة فحبت تفرح اللي حواليها 

وراحت لحماتها وسلفتها 

_ماما.. فريال افرحولي أنا حامل أنا مش مصدقة نفسي 

فريال اتصدمت وقال في نفسها بحسد 

_يا بنت الإيه لسه متجوزة مبقلهاش كم شهر وحملت وانا اللي بقالي سنة ونص ولسه محملتش، اااه انتي جاية تغظيني بقا، هتبتي شغل السلايف من اولها ياختي قولي كدا، ده انتي كشفتي عن اوراقك بدري بدري، والله وظهرتي على حقيقتك

بصت لرشا وقالت بغل

_مبرووك يا عروسة مبرووك 

حماتها قالت

_الف نهار أبيض يا ألف ألف مبروك ربنا يكملك على خير يا مرات ابني، ويرزقك يا فريال يابنت عبد السلام قادر يا كريم 

فريال في نفسها

_اه وكمان هتقومي حماتي عليا، عايزة تخربي عليا يا رشا ، وهتفضلي بقا طول الوقت في الرايحة والجاية ،، اه يا بطني،اه يا ضهري وكهن الستات دهون حاكم أنا عارفاه كويس.. لكن لا مش انا فريال اللي يتلعب بيا الكورة كدا ومش هسكتلها أبدا

سمعت حماتها بتقول 

_تروحي يا حبيبتي للدكتور علطول تتابعي معاه وتنفذي اللي يقولك عليه بالحرف إحنا عايزين الولد بقا طالما مرات ابني البكري مش عارفة تجيبه لينا 

فريال قالت بغيظ وهي ماسكة نفسها بالعافية 

_كله بأوانه يا حماتي، ودي إرادة ربنا وحاجة مش بأيدينا واديكي شايفة وكان على يدك إحنا مبطلناش لف على الدكاترة 

_عارفة ياختى هو انا اتكلمت 

فريال في نفسها

_اومال لو اتكلمتي هتعملي فيا ايه هتطلقيني من جوزي!🙄 

عدت الأيام وولدت رشا الولد اللي الكل منتظره  

والولد نال اهتمام الكل رشا وجوزها وحماتها وحتى جوز فريال كان بيحبه أوي وعلطول يجيبله لعب وهدوم في اي مناسبة 

وكل مرة فريال النار اللي ف قلبها تقيد يوم ورا يوم

الولد كبر شوية وبقى وابتدا يمشي

 فريال كل مرة تبص عليه وقالت بشر

_ازاي يعني رشا تجيب الولد وينال اهتمام الكل وأنا لا، اشمعنا أنا اللي أفضل متحسرة على عدم الخلفة واني معنديش عيال وهي لا... أنا لازم اتخلص منه علشان تكون زيي بالظبط 

سمعت حماتها بتقول 

_يا فريال... لمي الورق اللي قدام البيت وولعي فيهم يا بنتي ونضفي كدا مدخل البيت 

فريال شافت الطفل الصغير بيلعب حوالين أمه وهي عماله بتظبط الشجر اللي قدام البيت بالمقص وتبص ع الشجر شوية وابنها شوية 

فاستغلت فريال 

ان رشا مش منتبه وزقت الولد وقعته في النار وعملت انها بتكنس في مكان تاني واول ما سمعوا صراخ الطفل 

جريت عليه 

_ايه دا يا رشا الحقي الواد وقع ف النار اللي قايدين فيها ورق الشجر، مش تاخدي بالك على ابنك يا رشا هو انتي لاقياه في الشارع ياختي، غيرك متشحتف على عيال ومش لاقيه 

نزلت رشا من ع السلم جري بفزع ع ابنها لدرجة كانت هترمي نفسها في النار علشان تجيبه 

_بتعملي ايه يا مجنونة هتتحرقي 

_ان شالله اموت بس انقذ ابني 

وبالفعل مدت ايدها وجابت ابنها وايدها اتحرقت لكن مهتمتش 

جريوا بيه ع المستشفى يلحقوه لكن كان الولد خلاص مات 

الكل كان في حالة حداد والبيت ملاه الحزن والكآبة لكن الوحيدة اللي كانت فرحانة وشمتانة هي فريال 

وعدت الأيام والسنين 

وربنا رزق فريال بالولد اللي كانت طايرة بيه للسما

ومش بس ولد واحد لا ربنا رزقها بخمس اولاد 

اما رشا فمخلفتش تاني بعد ابنها من حزنها عليه 

فريال كانت بتخاف ع اولادها جدا 

ومهتمية بيهم لأقصى حد ممكن 

_ها يا ولاد انتوا محتاجين حاجة اجبهالكم 

_شكرا يا ماما.

اولاد فريال كانوا متفوقين في الدراسة وكانوا ادب وأخلاق لا يعلى عليها 

وفي ايام الامتحانات 

فريال قفلت عليهم البيت وهي خارجة علشان يذاكروا ومحدش يزعجهم وكمان اتأكدت انها قفلت الشبابيك بالاقفال علشان محدش بيهم يفكر يلهي نفسه بأي حاجة وأخدت الموبايلات وسابتهم يذاكروا وراحت مشوارها

لكن يشاء الله ان البيت يحصل فيه ماس كهربائي فالنار تمسك في البيت كله 

والاولاد يحاولوا يخرجوا ومش عارفين لان امهم قافلة الباب والشبابيك وكل حاجة لحد ما اتفحموا جوا.

لما رجعت رشا واتفاجئت بالشقة اللي بقت رماد بعد ما جت المطافي وطفتها 

ولقت اولادها الخمسة ماتوا

_لااااا اولادي ضنايا لااااااا الا اولاااادي

بقت تمشي في الشارع زي المجنونة وبعد شوية قعدت في الشارع ورفعت ايدها وهي هتتجنن وتقول 

_يارب بتساوي الواد بالخمسه انا نسيت وامه نسيت وانت مبتنساش !!

داين تُدان ولو بعد حين