أسماء عبد الهادى :
نفسي اتجوز ظبوطة
اسكربت كوميدي بوليسي
سلمى وأميرة
كانوا قاعدين بيتكلموا مع بعض في الأوضة
سلمى قالت وهي بتلعب ف شعرها
_ياااه امتا بقا يجي فارس الأحلام اللي هيخطفني بحصانه الأبيض اللي بجناحات ويطير بيا لبلاد السعادة والهنا
ضحكت أميرة وقالت
_انزلي ياختي انزني وبلاش شعلقة لأحسن تقعي على جدور رقبتك تتكسري، فارس احلام ايه وحصان ايه اللي بجناحات وبلاد السعادة ايه، عودي يا هاميس لأرض الواقع انتي أخرك يجيلك واحد اقرع وبكرش ويسكنك في شقة دور ارضي مع حماتك تخدميها وتغسليلها رجليها طول اليوم
ضربتها سلمة بالمخدة
_يا باي عليكي يا بنتي ده انتي فصيلة فصلان اعوذ بالله بقولك ايه قومي روحي، خدي ابنك وجوزك في ايدك وارجعي ع شقتك جتك البلا عكرتي مزاجي
ضحكت أميرة
_الحق عليا اني بقولك الحقيقة علشان مترفعيش سقف توقعاتك وبعدين دماغك توجعك من الخبطة اللي هتأخديها ع دماغك
_يا سلام عايزة تفهميني ان جوازك من اخويا هيما كان خبطة ع الراس توجع وانه اقرع وبكرش ماشي هقوله
_لا لا اوعي تقوليله حاجة ، دا هيما ده حبيبي يا بت حتى لو كان فعلا اقرع وبكرش كمان، ده الحب الحب
_بولبيف بلوبيف ياختي، ولما انتي واقعة كدا بسلامتك مش عايزاني أعيش اللحظة ليه ها، سيبيني على الأقل أحلم هو الحلم ببلاش
_احلمي حد ماسكك بس احلمي على قدك وبعدين هيما اخوكي ده مفيش منه اتنين علشان تبقي عارفة بعد كدا مفيش رجالة
_يا سلام فينك يا هيما يا خويا تسمع الأشعار اللي بتقولها أميرة فيك
جه هيما وحضن أميرة من ضهرها وقال بحب
_مش محتاج اسمع علشان اعرف حب أميرة ليا، ربنا يخليها ليا مراتي وحبيبتي وام عيالي
_حبيبي يا هيما
سلمى
_اوعدنا يا رب بمحن زي جوزين الكناريا دول اللي قرفني في عيشتي
.. ما تروح يا أخينا انت وهيا تحبوا ف بعض بعيد عني ما تراعوا السنجولة اللي معاكم هو ايه أصله دا، او حتى هاتولي عريس في ايديكم وانتوا جايين
هيما عمل انه مكشر وقال
_اه عريس وانتي بسلامتك مستعجلة عل العريس ياختي وعايزانا نيجبه في ايدينا؟
خافت سلمى ورجعت لورا
_اهه.. لا مستعجلة ده ايه وعريس ايه.. لاا لاا انا مش عايزة اتجوز أصلا ، ولو هو أصر وحب يجي .. يجي يتفضل براحته يا اهلا وسهلا بيه مش هنقوله انا عارفه انه اصلا ف الطريق بس الطريق زحمة شوية فأنا عاذراه ومش زعلانه اصلا المهم يجي، انا اصلا مش عايزة اتجوز
هيما بص لمراته بتعجب
_بتقول ايه بنت المجانين دي
اميرة ضحكت
_مش عارفة
سلمى
_عندك مش هسمحلك تقول على امك وابوك مجانين
_اه عندك حق محدش هنا مجنون غيرك، اسمعي يا بت انتي جنان مش عايز ها
_طب هوينا كدا انت ومراتك متقرفوناش
_شوف البنت بتتكلم مع اخوها الكبير ازاي
_ياخويا بلا كبير بلا بطيخ
_لا انتي الظاهر عايزة قطم رقابتك
أميرة
_خلاص يا هيما ما انت عارف سلمى هو انت تايه عنها، تعالي يلا نقعد مع طنط وعمو.. ده انا عاملة صينية كيك انما ايه عجب هنأكلها مع كوباية شاي ونتابع الماتش
خرجوا من اوضة سلمى
اللي رفعت ايديها وقالت
_يارب، يارب خرجني من البيت ده بقا عايزة اتجوز فارس احلامي يا ناس
__
تاني يوم رجعت سلمى من الجامعة
فنادت عليها امها
_تعالى يا سلمى عايزاكي
_السلام عليكم يا ست الكل عاملة أي يا غالية
_ وعليكم السلام كويسة الحمد لله يا حبيبتي
_لا يا ست الكل قصدي عاملة ايه ع الغدا هسألك عن صحتك ليه
كشرت أمينة وقالت
_بقا كدا يا زفتة بتسألي عن الأكل وامك لا، طب قومي غوري من وشي جتك الهم
ضحكت سلمى وباست راس امها
_بهرج معاكي يا ست الكل ده انتي ست الحبايب يا حبيبه
_لا اوعي يا بت زعلانة منك وكمان خسارة فيكي الخبر الحلو اللي كنت جايباهولك
فرحت سلمى ومسكت ايدين امها
_خبر ايه دا قولي يا ماما اوعي تكوني جايبالي عريس ها،، هو عريس مش كدا
جه هيما وضربها ع دماغها
_طب اتقلي شوية ياختي يخربيتك مصيبة
_اااه دماغي يا هيما يا باي عليك
ها يا ماما قولي ايه الخبر الحلو ده يلا انا مش قادره اصبر قولي عشان خاطري
هيما_ لا بقى انا مش هاسكت على كده هاكسر دماغها دلوقت حالا البنت لسه ف اولى جامعة وهتموت ع عريس.
_ايه بقا يا هيما متقتلش فرحتي بالعريس
مش عريس يا ماما صح صح؟؟
الام قالت
_قولها وخلاص بقا يا مش قادره تصبر
هيما اتكلم بغيظ من اخته
_ اه يا اختي هو عريس ويكش ارتاح منك بقى
_ ايوه ايوه جوزوني وارتاحوا مني
_سلمى اتعدلي
_حاضر حاضر يا هيما باهزر بلاش يعني اهزر اديني هانكتن اهو تفضل اتكلم
_ طيب اتنيلي اقعدي علشان اعرف اتكلم
_اديني قعدت اهو نشفت طريقه تكلم بقى
_مش فايده ...ما فيش فايده بصي يا ستي ده واحد صاحبي راجع من السفر وبيدور يا ستي على العروسه علشان نتجوز ويستقر ولما عرف اني عندي اخت
فقال لي اخذ رايك ويجيء يتقدم وتتعرفوا على بعض.
_اه يعني ما شافنيش وما يعرفنيش
_ اه ما هو هيجي هنا وتشوفوا بعض وتتعرفوا على بعض
_اممم طب والاستاذ صاحبك ده بيشتغل ايه ده
_ كان بيشتغل محاسب في السعوديه ولما ينزل هنا هيشوف اي شغل في شركه او يفتح مكتبه الخاص بيه
_ايه ده يعني مش ظبوطه
_نعم يا اختي ايه
_ اصل بصراحه بقى كان نفسي اتجوز ضابط مش محاسب
_وهتفرق ايه يا اختي ضابط من محاسب اهم حاجه يكون راجل بجد ويصونك
_لا انا ناحية تفرق تفرق كثير معايت
_سلمى قلنا نتعدل ها نتعدل
_ايه يا هيما ما انا باقول لك رايي
_لا ده عبط مش رايك انا هاتفق معاه يجي اخر الاسبوع وتقعدوا مع بعض تمام
_ لا باقول لك ايه انا عايزة اكمل دراستي انا غيرت رأيي
_سلمى وبعدين معامي على فكره انا ما فتحتكيش في الموضوع ده الا لما اميرة قالت لي ان فعلا عندك قبول انك تتخطبي في الدراسه غير كده مكنتش هاوافق الا لما تخلصي
_تتوكس أميرة....واديني غيرت رايي انا هستنى لما اخلص
وقالت في نفسها
_لا مش انا مش هتدبس في محاسب
انا هاستنى لحد ما يجي لي الضبوطه اللي انا عايزاه
_يعني ده اخر كلام عندك
_اه اه اخر كلام
اتنهد
_ماشي اللي انتي عايزاه علشان بعد كدا مترجعيش تعيطي
_لا أنا فعلا هعيط دلوقتي لو مأكلتونيش انا راجعة من الكلية واقعة ، هموت يا ناس أكلوووني 😭😭
هيما
_ماما اكليها لاحسن دي طفسة وهتفضحنا لو مأكلتش
جت أميرة وفي ايدها صينية الباشميل
_خلاص يا بنتي الاكل جهز أهو
الام
_هدخل أجيب الكفتة من جوا
سلمى بفرحة
_ الله باشميل وكفتة مرة واحدة الله الله الله.
ضربها هيما على دماغها وقال
_على الله بس يطمر وترفعي راسنا بالتقدير اخر السنة
_عيب عليك يا ابني ده انا سلمى
__
تااني يوم في الجامعة
سلمى بتعب
_يااه كان يوم متعب اوي، والدكتور كان طول الوقت لوكلكوك مبيفصلش ابدا
ضحكت ريتاج صاحبتها
_ معاكي حق طول الساعتين مش عايز يفصل خمس دقايق بس نرتاح فيهم
_ اها والله انا صدعت اوي منه حرام عليه اللي بيعمله فينا ده... احنا مش هنطلع احمد زويل يعني... الحمد لله ان دي اخر محاضرة ااه يا انا يا دماغي... انا هروح انا ريتاج مش هقدر نعمل شوبنج النهاردة
_ اوك مفيش مشكلة سلام
سلمى كانت ماشية في الطريق مروحة وبتقول في نفسها
_ يارب امتا بقا اقابل الظبوط عريسي وفارس احلامي
فجأة عربية خبطت فيها
_ ايه دا العربية جاية ناحيتي لاااا .. ااه
رامي نزل من عربيته بسرعة وراح ناحيتها وقال بخضة
_ يا نهار ابيض أنا اسف اوي انتي كويسة يا انسة مش انسة بردو
سلمى كانت رجليها وجعتها من الخبطة بس اول ما شافت انه ظابط نسيت نفسها ونسيت وجعها وقالت في نفسها
_ايه دا دعوتي استجابت بالسرعة دي يا سلام
_اه انا انسة اه انسة انا
_في حاجة بتوجعك انا اسف مكنتش منتبه وخبطت بدون قصد
_لا انا كويسة بس رجلي بتوجعني
_طب بينا نروح على المستشفى
_لا لا ملوش لزوم هبقى كويسة ان شاء الله
_يا خسارة كنت عايز أخدك للمستشفى
_نعم
_بقولك ايه انتي اتبهدلتي بسببي ولازم أخدك للمستشفى
_لا بقولك انا كويسة
_وانا شايف غير دا ولازم تروحي للمستشفى
_الله هو ايه أصله دا قلتلك كويسة مش مستاهلة مستشفى
_ماهو انا لازم أخد حد للمستشفى
_ هو في ايه مالك يا استاذ انت هتأخدني المستشفى بالعافية
_ استاذ انتي شايفاني بلبسي ده استاذ
_ اه صح انا نسيت انت ظبوظ
_ظبوط ايه انتي كمان اتفضلي معايا ع المستشفى
_يا عم الظابط انت عايز تأخدني المستشفى ليه انا كويسة وزي القرد قدامك أهو
_لا انتي بتقولي رجلك بتوجعك
_ اه وجع بسيط من اثر الخبطه لكن انا كويسه مش مستاهله اني اروح المستشفى
_ لا انت عايزه تغلبيني تفضلي اركبي معي يلا
كانت لسه هتعترض شدها من يديها ودخلها عربيته وساق بسرعه على المستشفى
في العربيه
_ممكن اعرف انت ليه مصر انك تاخدني على المستشفى ده انا حتى ما عرفتش اسمك ولا انت عرفت اسمي
_ليه يعني هنتصاحب ولا ايه
قالت في نفسها
_ الله من النوع الشديد الله
ضحكت وقالت
_عامه انا سلمى وانت
_ انتي سمعت انا قلت ايه
_ اه سمعت و ده ما يمنعش اني اعرف اسم الظبوط اللي قاعد جنبي ده ايه
_بطلي بقى الكلمه دي
_ طب مش هتقول لي اسمك ايه
_ انتي عارفه لو سمعت صوتك لحد ما نوصل المستشفى هاعمل فيكي ايه
_اهو خلاص انكتمت ..هو في كده انا شكلي هاغير رايي.
وصلوا المستشفى ونزلوا
سلمي
_ خلاص وصلنا المستشفى زي ما انت عايز ممكن تسيبني ارجع بقى
_ترجعي ايه امشي قدامي
شدها من يديها وراح عند قسم معين ولممرضه اول ما شافته قالت
_اهلا بحضرتك يا رامي بيه
سلمى في نفسها
_ هو اسمه رامي.. رامي وسلمى واو لايقين على بعض قوي
سلمى كانت سرحانه وما اخذتش بالها من اللي رامي قاله للممرضة
رامي همس للممرضة وقال
_عايزك تلفيها كلها بالشاش وكأنها متدشدة تمام
_تمام يا رامي بيه
رامي بص لسلمى
_يلا ادخلي مع الممرضة جوا انتي قلتي اسمك ايه اه سلمى
_ادخل مع الممرضة فين بقولك انا كويسة هو في ايه بالظبط
رامي شاور للممرضة
_خديها يلا
تراجعت سلمى لورا بخوف
_لا اروح فين انتوا ناويين تعملوا فيا ايه انت مش ظابط بحق وحقيقي انت شكلك حرامي او من تجار الاعضاء عايزين تسرقوا اعضائي ايوة انا دلوقتي كشفتكم انتم بتعملوا مسرحية عليا انا دلوقتي بس عرفت الحقيقة، انا هصرخ وهلم عليكم للدنيا
رامي بص حواليه وكتم بوءها
_يخربيتك اسكتي هتلمي علينا المستشفى كلها اكتمي بقا
حاولت تبعد ايده وتحاول تهرب، بس جت ممرضة تانية وساعدت الأولي ومسكوها دخلوها الاوضة وابتدوا ينفذوا اللي رامي طلبه
وكل ده وسلمى هتموت من الخوف والرعب مفكرة أنهم هيأذوها
الممرضة
_شش اهدي مش هنعمل فيكي حاجة متخافيش ده انتي تحت حماية حضرة الظابط رامي
وفجأة لقتهم بيلفوها ف شاش في كل جسمها وسابو بس عنيها وبوقها
_انتوا بتعملوا ايه ممكن افهم .. بتلفوني ليه كدا
_دي اوامر رامي بيه
_يخربيت رامي بيه بتاعكم ده ويخربيت اليوم اللي شوفته فيه انا مش فاهمة حاجة فكووني حالا فكوووني
هنا دخل رامي وقال_ها خلاص
_اه يا حضرة الظابط خلاص نفذنا المطلوب
زعقت سلمى وقالت
_هو ايه اللي خلاص، انت يا بي ادم انت ..انت مفكر علشان ظابط هتعمل اللي انت عايزة في الناس من غير ما حد يراجعك في دا ،لا فوق دا انا سلمى ومحدش يقدر يغصبني على حاجة
_اتلهي وانتي نفخة واحدة تطيرك
_ممكن اعرف ايه اللي بيحصل بالظبط ليه مربطني بالشكل ده وليه انا بتعملوا معايا كدا وانا أصلا معرفكشي
_ممكن تهدي وانا هفهمك كل حاجة، بس الأول مثلي انك تعبانة ومتدغدة وطبعا انا اللي دهستك بالعربية وياريت الناس اللي جاية دلوقتي متسمعش صوتك كأنك مش بتعرفي تتكلمي من فضلك تمام وانا هفهمك كل حاجة بعدين
وبص للممرضة وقال
_معاكي ماكياج
_اه يا حضرة الظابط معايا ف شنطتي
_طب ممكن تجبيه من فضلك
_حاضر هروح اجيبه حالا
سلمى
_انت عايز تعمل ايه وبتفكر في ايه بالظبط
_قلتلك هتعرفي كل حاجة بس عدي الزيارة دي على خير
جت الممرضة
_اتفضل يا رامي بيه الميكاب اهو
_تمام شكرا
مسكه رامي وبدأ يقرب من وش سلمي اللي حاولت تبعد معرفتش لانها طبعا متكتفة من كل مكان
_انت هتعمل ايه يخربيتك اخويا هيعلقني لو لقاني حاطة ميكاب برا البيت،
رامي مرضش عليها اتعصبت وقالت
_انت يا زفت انت انا مش بكلمك!! .. ابعد اياك تحط البتاع ده في وشي
_اتلهي محسساني اني الكوافير وهأخدك وشين بوية وصنفرة انا هحط لون اسود عند عينك علشان يبين انك متبهدلة جامد ومش بابينلك ملامح
_يخيبك هتشفلط وشي الجميل لا انا مش هسمحلك
_جميل ايه اتلهي انتي مش بتبصي في المراية!!
_لا استوب أنا قمر ١٤ بس انت اللي اعمى البصر والبصيرة
مرضش رامي وخلص اللي بيعمله
_تمام كدا خلصت .. اتفضلي الميكاب بتاعك شكرا
سلمى
_مراية هاتولي مراية اشوف ابن الكئيبة دا عمل فيا ايه
_ما تتلمي يا زفتة والزمي حدودك
_ وربنا ما هتلم وهلم عليك الناس كلها وهفضحك قدام الناس اللي حاية ومعرفش عنها حاجة دي لو مقلتش في ايه وعاملني ليه كدا
رامي شاور بايديه للمرضة تخرج
فسحب كرسي وقال
_ بصراحة بقا يا سلمى انا محتاجك في خدمة مش هنساها ليكي طول العمر
_ خدمة ايه بقا اللي هتحتاجها مني وكمان بالطريقة دي
_ بصراحة بقا بابا مدخلني شرطة غضب عني وانا مكنتش عايز أدخلها فحابب اوريه اني فاشل ومتهور وبتهوري كنت هقتل روح بريئة وان باللي عملته فيكي ده هترفد من شغلي وبكدا ارتاح من الهم دا واعيش حياتي زي ما انا عايز
_يا سلام بقا انت بتستخدمني وسيلة لخداعهم .. طب ما هما ممكن يكشفوا خدعتك دا بتقرير الطبيب
_لا متخافيش انا مأمن النقطة دي كويس وكل اللي هنا تبعي اطمني
_وانت عايز تسيب شرطة علشان ايه ان شاء الله، مالها الشرطة دا انت حتى كدا هتكون ظبوط حلو وأمور وملو هدومك ومناسب ليا كمان،..اا قصدي تشرف اي بنت
_بصراحة كان نفسي ادخل معهد تمثيل بس بابا موافقش
_يخيبك عايز تسيب شرطة علشان تمثل يا مصيبة انت، صدق بالله انت ما تنفع تبقى ظابط ابدا انت عار على الشرطة كلها، واحسن انك عايز تلخع منها ، الشرطة بريئة منك ليوم القيامة وانا قلبي غضبان عليك بعد ما كنت اتعشمت وقلت ظبوطة منك لله منك لله
_ ها قلتي ايه هتساعديني
بصتله بضيق_ هساعدك علشان بس انت متستاهلش تكون في الشرطة قال كان نفسي ادخل معهد تمثيل قال، يعني تسيب خدمة الوطن والشرف العظيم اللي هتنوله علشان شوية فن هابط منك لله منك لله.
رامي مردش عليها
وبعد لحظات جت الممرضة
_رامي بيه فيه ناس برا وجاية لحضرتك
لسه مخلصتش كلامها كان والد رامي وواحد معاه داخلين
والده زعق وقال
_رامي ايه اللي حصل وايه اللي انت بعته ليا في رسالة ده
رامي بص بعينه على سلمى فتلقائيا الاتنين بصوا لسلمى وشهقوا
سليم ابو رامي
_يخربيتك انت عملت ايه في البنت
_انا اسف يا بابا انا كنت سايق متعصب ما انا قلت لحضرتك بلاش انا وانت مصر تطلعني المهمة دي قلتلك انت عارف اني داخل شرطة غصب عني فخليني للشغل الروتيني المكتبي وانت مرضتش قال ايه لازم اطلع مهمات ومأموريات خرجت مش شايف قدامي ومتعصب وشاطح في كل اللي يقابلني
ابوه زعق
_وشوطت المسكينة دي ودغدغتها بالشكل دا
نزل راسه وقال
_للأسف مفيش في جسمها اي جزء سليم انا اسف يا بابا البنت والله صعبانة عليا بس مش قصدي كنت سايق بكل سرعتي ملحقتش اتفاداها ومش عارف اعملها ايه دي
اخيرا الراجل اللي مع والده اتكلم وده يبقى صديق سليم أبوه وعقيد في الشرطة واسمه معتز وقال
_ يا نهارك مش فايت الموضوع ده لو اتعرف هتروح انت في داهية ده غير الجزا اللي هتأخده وممكن كمان يبقى فيها رفد
_انا اسف حقيقي مكانش قصدي هي جت كدا فجأة لقيت العربية بلتبس ف البنت بس شلتها بسرعة وجيت بيها على هنا الحقها والحمد لله مماتتش لسه عايشة
سلمى ف نفسها وهي سامعة الحوار
_ان شالله انت اللي تموت يا بعيد بتفول عليا منك لله
ابوة قال بكل غضب
_اه ماهي لو كانت ماتت كنت هتتعدم فيها يا أستاذ انت مفكر ارواح الناس ايه سايبة !! اسمع انت اللي مسؤل عن غلطتك وانا مليش اي دخل ومش هحاول أخرجك منها بأي شكل من الأشكال علشان انت انسان غير مسؤول بالمرة ومستحقش انك تحمل لقب ظابط، وانت كنت مفكر انك اترقيت او وصلت للي انت فيه ده علشان قدرات او مهارات عندك فانت تبقى غلطان انت اترقيت كل ده بترتيب وتخطيط مني انا وبس ،لكن من النهاردة مش هقف جنبك ويحصللك اللي يحصل
_لا يا بابا بالله عليك انا كدا هروح في داهية
_يكون احسن،يكون في علمك انا معنديش اولاد طايشة وبتشوط ارواح الناس كدا لمجرد انهم كانوا متعصبين علشان كدا هتأخد جزاءك العادل يا رامي وحسب ما يتحكم عليك
ابوه مشي
ومعتز وقف وقال
_يا خسارة يا رامي يا خسارة ضيعت مستقبلك بإيديك
ولف وشه وابتسم بمكر
_هه احسن وبكدا خلصت منه، ده طلع مقلب واسم ف الفاضي وأبوه هو اللي عامله، كدا اللعب هيكون بمزاج وسليم هيكون طبعا ملخوم في ابنه واللي عمله.
أما رامي أول ما الكل خرج ابتسم بمكر هو كمان وقال بصوت بشويش
_هه... كويس ان الحيلة انطلت عليك.. يا سيادة العقيد
حاولت سلمى تفك نفسها بس مقدرتش تتحرك فقالت لرامي اللي كان سرحان وشكله بيخطط لحاجة
_انت يا استاذ انت يا اخينا انت ياللي سرحان
_ها في ايه عاملة دوشة ليه هو الواحد ميعرفش يفكر شوية
بصتله بتهكم وقالت
_معلش قطعت حبل افكارك التمثيلي ده، بس عابزة اقولك ان خلاص اللعبة خلصت فوكني بقا علشان اروح اتأخرت وهيما اخويا هيعلقني من قفايا في المروحة
_لا افكك ايه انتي مشرفة معانا هنا شوبة
_نعم يعني ايه، بقولك اخويا هيعلقني انت بتفهم
_شش بطلي رغي قلتلك انتي هتفضلي هنا لحد ما الموضوع يخلص وبعد كدا هتروحي
_موضوع ايه اللي يخلص ما هو خلص أهو، وحيلتك شربوها خلاص يلا فكني بلاش تستعبط
_سلمى انا مبحبش أعيد كلامي مرتين انتي هتفضلي زي ما انتي هنا لحد ما انا أمر انك تمشي
_لا انت هتتشرط وتؤمر عليا بصفتك ايه كومبارس لااا مش هسمحلك
مسك رامي اللازق
_يوووه هتسكتي ولا اكتم بوءك ده علشان اخلص!!
_نهار الوان ده شكله بيتكلم بجد، يعني ايه انا هفضل في وضعي دا متكتفة كتير واهلي هيعملوا ايه
_هتقوليلي عنوان اهلك وانا هبلغهم باللي حصل ملكيش دعوة
_هو ايه اللي حصل
_انك عملتي حادثة
_,انت هتكدب الكدبة وتصدقها فكني اخلص انا مش موافقة اكمل ف المسرحية السخيفة دي
_مس بمزاجك يا سلمى خلاص اتدبستي ووافقتي يبقى تكملي للأخر
_وافقت ايه انت اللي سحبتني وجبتني ع هنا ع ملا وشي ولفلفتي بالمنظر دا من غير حتى ما اقدر افتح بوءي
_اه يا ريت متفتحيش بوءك لحد ما اقولك كمان
_انت مفكرني ايه لعبة اشتريتها وبتحركها زي ما انت عايز
_اه اعتبري نفسك كدا، معلش بقا مضطرة تكملي لعبتي للآخر
_ليه وعلشان ايه اتحمل البهدلة دي علشان واحد عايز يسيب الشرطة ويشتغل كومبارس ف مسرح .. لااا دا بعدك فكي يلا.
رامي نادى للممرضة وقال
_اعطيها اي حاجة علشان تنام انا عارف اني مش هخلص من زنها ولما اكلمك علشان تفكيها فكيها ترتاح حبة وترجعي تلفيها تاني بس طبعا الا رجليها علشان متهربش دي شكلها مش سهلة
_حاضر تحت أمرك يا رامي بيه
قربت الممرضة من سلمى فسلمى صرخت
_لااا متحاوليشوا ابعدي عني
بس طبعا علشان سلمى مربطه ما عرفهاش تتحرك والممرضه ادتها المنوم ونمت
وبعد يومين جه رامي ودخل الاوضه _سلمى صاحيه ولا نائمه
_ لا ما ادتهاش منوم زي ما حضرتك طلبت
_تمام شكرا قوي تقدر تتفضلي
قرب من سلمى وبدا يفك الاربطه والشاش اللي حواليه ها كله وقال _خلاص كده مهمتك انتهت انا هفك دلوقت وتقدري تروحي زي ما انت عايزه
سلمى فضلت تضغط على يديها ورجليها بوجع وتقول
_ منك لله يا بعيد انا هاخرج من هنا بس هاروح على القسم علشان ابلغ فيك وهقول لهم كل اللي عملته في انا مش هاسيب حاجه ابدا
ضحك رامي وقال
_ روحي زي ما انتب عايزه بس ابقي وريني مين اللي هيسمعك او هيصدقك
_ انا مش فاهمه انت ازاي ما تعاقبتش وازاي واقف قدامي كده مش العقيد بتاعك ده قال انك هتتجازي فيها ازاي خرجت كدا انا مش فاهمه ازاي انت واقفه قدامي دلوقت عادي كده ولا كانك عملت حاجه
_ انا من ناحيه عملت فانا عملت كثير ومن ناحيه العقاب فكل واحد اخذ جزاؤه العادل
_ انا مش فاهمه حاجه انت ايه بالضبط
_ مش مهم تفهمني يلا روحي
_ اروح ايه
وهاقول لاهلي ايه دلوقت هبرر الغياب ازاي اللي ما حد فيهم سال علي برنه واحده بس
_لما تخافيش عملت الواجب معهم
_يخرب بيتك عملت فيهم ايه اوع تكون كتفتهم تكتيفة سودا زي ما عملت فيا انت عايز مننا ايه بالضبط
_مش عايز حاجه انا مش خلاص فكيتك تفضلي روحي ده انت مزعجه قوي
_صدق بالله انا كنت هاموت واتجوز ظابط
بس من بعد ما شفتك وانا غيرت رأيي عشان انت كرهتني في الضباط كلهم
روح يا شيخ منك لله
__
سلمى رجعت البيت وامها واخوتها وأميرة كانوا ف انتظارها
وقالوا بنبرة هادية ومكانش على وشهم أي خوف او قلق
_سلمى حمدا لله عل السلامه
_ايه دا بس كدا
هيما
_ايه في ابه يا بت مالك
_هو ايه اللي في ايه مفيش عاملة ايه كنتي فين ايه اللي جرالك
_لا ما هو رامي بيه قالنا على كل حاجة
_وطبعا انتوا وافقتوا كدا على اللي عمله فيا ده انا اتبهدلت واتمرمطت مرمطة ما يعلم بيها الا ربنا
اميرة_معلش بقا كله في خدمة الوطن
_وطن ايه هو خدعكم وقالكم ايه يا بالظبط
امها
_مش وقته يا سلمى اتفضلي ادخلي خدي دش وغيري هدومك دي وتعالي علشان تتغدي عاملالك كل اللي بتحبيه وتشتهيه
هيما
_انا واميرة نزلنا اختارنا ليكي دريس جميل اوي يارب يعجبك
_يا سلام ودا ايه الرضا عليا ده كله النهاردة
قرصتها اميرة ف وشها
_علشان العمل البطولي اللي عملتيه يا قمر
_عمل بطولي والله شكلكم مش فاهمين حاجة.. انا داخلة اغير هدومي علشان أكل انا جعت اوي
أميرة غمزت لها
_ليه حضرة الظابط مكانش بيأكلك ف المستشفى يا قطة
_حضرة الظابط بتاعك ده لو طايلة اخنقه لكنت عملت منه لله واحد متخلف ومستفز اوي
_تفتكري دا رأيك
_الا رايي
بعد الغدا بكم ساعة
الباب خبط وسلمى فتحت واول ما شافته قالت
_انت
وقفلت الباب في وشه
جه اخوها وقال
_مين يا سلمي
_ده اللي ما يتسمى رامي وقفلت في وشه
_يخربيتك امشي يا بت من قدامي ده عاملة تعمليها
_يستاهل
فتحله وفال
_انا اسف اوي يا رامي بيه اعذرها
_محصلش حاجة عاذرها
اتفضلي الورد دا كتعبير عن اسفي
مردتش تاخده
_مش عايزة منك حاحة
_انت محكتلهتش يا هيما ولا ايه
_بصراحة لسه
_هو في ايه بالظبط
رامي
_بصراحة كل اللي حصل دا كان خطة علشان اوقع العقيد ف شر اعماله واوهمه اني ظابط لا مسؤل ومش مهتم وهتجازي وابويا والداخلية كلها مقلوبة ع اللي عملته فيعمل هو ما بداله ويستلم شحنة الممنوعات ويدخلها البلد
وطبعا ميعرفش اني براقبه وان كل دا خطة علشان اوقعه بيها وامسكه متلبس وقد كان وكنتي انتي جزء من خطتي اللي ادتيها بنجاح فانا جاي اشكرك
_نعم كل دي خطة ..تقوم تبهدلني بالشكل دا
_معلش انا اسف
_طب ليه مقلتليش
_مكانش لازم حد يعرف أبدا المعلومات دي بتكون سرية جدا
_حتى انا وانا جزء منها معرفش؟
_لا للأسف مكانش ينفع .. حتى اهلك ميعرفوش التفاصيل الا انك ف مهمة لخدمة الوطن وهترجعي بعد يومين غير كدا لا ومكنتش هقولهم لولا عارف قلقهم عليك
_يخيبك وسايبني اشتم فيك واهزقك من الصبح! وانت كنت بتعمل خدمة جليلة للوطن
بصلها بضيق وتوعد
_ انتي كنتي بتشتمي فيا انا
_لا لا ده واحد تاني بيشتغل كومبارس
ضحك رامي وقال
_ااه بحسب
_لا تحسب ولا تجمع يخربيتك نشفت ريقي وخليت دمي هرب ببصتك اللي تخوف دي
_سلمى انتي لسه نفسك تتجوزي ظبوطة
_لا لا تبت تبت
_طب فكري كدا يمكن تغيري رأيك
_لا مش هفكر
_ممم كدا طيب اخد بعضي وامشي سلام عليكم
_لا لا استنى يمكن افكر تاني بس اتحايل عليا علشان مبانش مدلوقة واخويا يعلقني
روعة سيمو
ردحذفحبيبتي
حذفتحفه يا سيمووو بالتوفيق ياقلبي صافي علشان ما اكنش مجهول
ردحذفههه عسل يا صافي
حذفماشاءالله ، جميل يا سمسم ، موفقة دايما
ردحذفعسسل سلمى
ردحذفشربات وسكر
جميله جدا احسنتى حبيبتي دمها خفيف ❤❤❤
ردحذفجميله جدا وممتعه
ردحذفههههههههههههههههه جميلة جدا وخير الله اما أجعله خير كوميدى ومفهاش نكد علي غير العادة كدا نقلق عليك 😂😂😂😂
ردحذفههه ربي يسعدك
حذفجميله يا سبمووو بالتوفيق يارب
ردحذفجميلة ♥️♥️♥️
ردحذفرووووعة يا سيمو تسلم اناملك يا حبيبتى
ردحذفتحفه كالعادة
ردحذفروعة ياسبمو
ردحذفجميلة تسلم ايدك
ردحذف