شوق بارت ٥٢

 شوق بارت ٥٢
للكاتبة أسماء عبد الهادي 

#شوق

بارت ٥٢

أسماء عبد الهادي

___

جاءه اتصال من أحد رجاله الذي طلب منه خصيصا هذا الأمر، بينما كان في غرفته يريح بدنه من عناء العمل، وبعدما أجابه اتسعت ابتسامته 

_البنت اللي طلبت مني أتابع تحركاتها 

نزلت دلوقتي من بيتها مع اخوها واعتقد كدا رايحين للدكتور 

_تمام تابع معايا بالموبايل واعرف هما رايحين فين بالظبط 

انهى الاتصال وقال فرحا 

_جت فرصتي ولازم استغلها 

ارتدى ملابسه وركب سيارته منطلقا لوجهته 

_مش عارف جاي أعمل ايه يا توبا بس كان لازم اشوفك

قاد سيارته وانطلق مغادرا من طريق مغاير لتلك التي تجلس عنده اخته

__

جلست والهم يعتريها حتى انها لا تستطيع الصعود لاخوتها على هذا الحال فقررت الاستعانة بفداء

_ايوة يا فداء.. أني محتاجاكي دلوك يا قلبي.. فاضية أشكيكي همي.. معرفاشي أطلع لاخواتي بيه... يمكن لو فضفضت الهم ينزاح عن قلبي وأقدر اطلع من غير ما اخواتي يحسوا بيه 

هتفت للأخرى بقلق

_ولو مكنتش فاضية أفضالك يا شوق، انتي فين 

_صدقيني لو الوقت مش مناسب مهياش مشكلة بس مفيش غيرك أقدر أشاركه همي... اقولك خلاص أني هحاول اتخطاه والله المستعان متشغليش بالك بقا

_شوق قولي انتي فين اخلصي انا جايلاك حالا 

_أني قاعدة على الطريق قرب البيت بشوية

_ماشي خليكي عندك وأنا جايالك حالا.

__

جلس جوار أخته في الميكروباص 

_يا بنتي قلتلك خليكي متتعبيش نفسك 

_ما هو انا مش هسيبك تروح اعادة الكشف لوحدك.. قلتلك شوف حد من اصحابك يجي معاك وانت مش راضي فهاجي معاك انا علشان اشوف الدكتور هيقول ايه.. ولا لسه بتتحرج لما تمشي معايا في مكان 

هتف بأسى 

_توبا أنا اسف أنا كنت غلطان.. كان قلبي أعمى ودلوقتي فتح متزعليش مني 

_لا يا بركات مبقتش زعلانة خلاص ربنا يخليك ليا

 وبعد وصولهم لوجهتهم واستعدادهم للصعود للعمارة التي بها عيادة الطبيب.

هبط عساف مسرعا من سيارته وادعى أنها صدفة رغم أنها غير ذلك وبترتيب منه

_ايه دا توبا ازيك ايه الصدف الجميلة دي.

تحدث بركات بانزعاج

_مين دا يا توبا 

ليرد عساف محتفظا بابتسامته

_أنا عساف أخو شوق صاحبتك فاكراني 

ردت توبا فوجه متورد من السعادة

_اه طبعا فاكراك ازي حضرتك عامل ايه

_الحمد لله... انا كنت معدي وشفتكم... ازيك يا.. بركات كان اسمك.. والف سلامة عليك سمعت إنك عملت عملية في دراعك 

_الله يسلمك... أنا حاسس اني شوفتك قبل كدا.. احنا اتعرفنا قبل كدا وانا ناسي؟ 

_يعني مش تعارف كان موقف عابر وكويس انك مش فاكره لانه مكانش ظريف بالنسبالي وقتها.. المهم انتوا طالعين للدكتور ولا ايه 

ردت توبا بهدوء 

_اه بركات اخويا عنده إعادة كشف مع دكتور العظام

_طهور ان شاء الله... طب محتاجين مني حاجة اعملهالكم 

_شكرا يا أستاذ عساف ربنا يكرمك

_على فكرة بتكلم جد مش عزومة مراكبية 

_عارفة والله ان حضرتك وأبلة شوق دايما سباقين بالخير ربنا يبارك فيكم.. شكرا جدا وسلامي لأبلة شوق كتير

_يوصل ان شاء الله... سلام.. والف سلامة مع تانية يا استاذ بركات 

ما ان غادر عساف حتى قال بركات

_ايه الموقف اللي مش ظريف اللي بيتكلم عنه دا يا توبا 

_مش مهم ده كان زمان كبر يا بركات 

_لا قولي انا لازم اعرف 

_فاكر أيام التحليل لما كنت بتغصب عليا احلل انت وصاحبك.. استاذ عساف وقتها كان كلمك 

_ااه افتكرت.. يخص يادي الكسفة دا انا كنت وقح اوي أيامها ..متزعليش مني انا خلاص ربنا نور بصيرتي 

_ما انا قلتلك كبر وانت اللي مصر تعرف 

_بس الاستاذ ده شكله مهتم اوي

_يعني ايه 

ابتسم بركات بمرح وتقدم أمامها 

_لا ولا حاجة يلا تعالي.

_ماشي.

__

وصلت فداء إلى حيث تجلس شوق بعدما استأذنت زوجها في الخروج 

_ شوق حبيبتي مالك قلقتيني عليكي 

_ يخص عليا جبتك على ملا وشك حقك عليا يا قلبي.. بس انا والله من قهرتي رجلي ماهي شايلاني وخايفة اطلع أكده العيال يفتحولي سين وجيم 

_متقوليش كدا يا شوق انتي اكتر من اختي وربنا اللي يعلم.. قولي في ايه قلقتيني عليكي 

قصت لها شوق ما حدث 

لتعتاظ فداء كثيرا مما فعله والد شوق 

_لا حول ولا قوة إلا بالله.. هو في كدا في الدنيا.. ان الأب يهدد بنته

_كبري يا بنتي.. أني مخايفاشي من تهديد ولا يحزنون أني كل الحكاية حسيت اني لو فضفضت هترتاح فملقتش أفضل منك حمالة أسية اشيلها همي، معلهش حظك بقا استحميليني

_يا حبيبتي هزعل لو قلتي كدا تاني على فكرة.. ايوة كدا يا شوق لازم تفتحي قلبك وتشكي اللي فيه ياحبيبتي بلاش تحبسي في نفسك علشان متتعبيش 

_مبحبش أشيل حد همي يا فداء.. وخاصة ان كل واحد فيه اللي مكفيه وزيادة ... يلا يا قلبي قومي ارجعي بيتك وأني خلاص فضفضت والهم انزاح شوية هقدر اطلع للعيال دلوك

_وهتعملي ايه .. انا خايفة يأذيكي فعلا 

_هيأذيني هيعمل ايه يعني العمر واحد.. بعدين ديه كله كلام في الفاضي... اللي قاهرني انه حتى بعد اولاده انصلحوا زي ما هو عايز.. غيران انهم بيحبوني وعايشين معاي أني ... ماهم كانوا عنديه طول عمره . شافوا ايه من الحب ديه الا قشور يا ولداه.. أبوي في غيبوبة وان مفاقش منيها قبل فوات الأوان هيضيع وهيندم ندم عمره ... ربنا يهديه 

_يارب يفوق فعلا قبل فوات الأوان.. على الأقل يتعظ من اللي حصل لبابا الله يرحمه 

_الله يرحمه ويغفر له يا حبيبتي.

في تلك الاثناء جاء شوق اتصال من مهند

_ايه روحتي توصلي يوسف شبط فيكي تاني ولا ايه 

_لاه يا قلبي أني كنت ف مشوار أكده مع فداء وراجعة حالا.. مش هتأخر 

_لا براحتك أنا كنت بطمن عليكي مش أكتر.. ابعتي سلامي لميار... قوليلها مهند باعتلك قلبه تخليه معاكي لحسن تعبان من بعدك عنه 

ضحكت شوق 

_اتلم يا ولا لاحسن هجيلك

_اديني ملموم يا ستي.. اقفلي وشوفي كنتي بتعملي ايه يا باي فصيلة 

انهت شوق للاتصال وهي تضحك 

_ربنا ينولك في اللي بالك يا حبيبي

لتأتيها اتصال آخر 

_ايوة يا جلنار هانم.. أجيلك دلوك.. حاضر مسافة السكة وجايالك مش هتأخر 

نظرت لفداء وقالت مبتسمة 

_شوفتي علشان التسهينة داي مبحبش اشكي لحد حالي.. روقي يا بت اكده محدش أخد منها حاجة وربنا أني بقيت كويسة الواد مهاند اخوي ديه دمه شربات قدر يخرجني من المود

_ربنا يصلح حالك ويريح بالك يا شوق 

_المهم قومي بم انك معايا دلوك فتعالي وصليني عند يوسف.. جلنار هانم عايزاني وصوتها اكده مش مريحني هروح اشوف في ايه 

_ماشي يلا..

سارتا بضع خطوات لتتوقف فداء 

_افضلي كدا ساعدي الناس وحلي مشاكلهم وكبري في مشاكلك انتي 

ضحكت شوق 

_يا بنتي ماهو على يدك مشاكلي ملهاش حل.. ربك كريم وقادر يحلها من عنده.. انسي وهتعدي زي غيرها 

_يارب 

__

وصلت شوق إلى فيلا قاسم بعد أن اوصلتها فداء وعادت ادراجها لبيتها بعد ذلك 

عندها كان قاسم يقول 

_ ها لقيتوه 

_ دورنا عليه يا قاسم بيه في كل شبر في الفيلا وبردو مش موجود 

_ يعني ايه ازاي دا.. هيكون راح فين.. دور تاني

لتهتف شوق بهدوء 

_السلام عليكم .. مساء الخير يا قاسم بيه 

التفت اليها وقال حانقا 

_يوسف فين يا شوق أكيد معاكي 

_معاي فين يا قاسم بيه.. أني توي جاية بعد ما اتصلت بيا جلنار هانم دلوك ومعرفاشي عايزة ايه... ويعني ايه يوسف فين اني وصلته بنفسي لاهنه بعد ما كان معايا في شقتنا .. اني اللي اسألك عليه مش انت 

هتف قاسم بكل غضب

_يوسف مش موجود في الفيلا 

اتسعت أعين شوق بصدمة 

_يعني ايه مش موجود هيكون راح فين 

_والله اسألي نفسك

_أسأل نفسي ايه.. شوف انت اكيد عملت في الواد حاجة زعلته هو أني تايهة عنيك

ليأتي الخادم مرة أخرى

_حتى دورنا في الجنينة الخلفية والحمامات وملوش أثر  

لتنظر له شوق بخوف على يوسف وتقول في نفسها

_ يوسف .. بالله عليك متوجعش قلبي عليك

لتأتي جلنار وهي تمسك بيدها ورقة وتشير لابنها بقهر

_ تعالى شوف يوسف كاتب ايه .. شوف نتيجة عمايلك واهمالك ليه.. الولد كان أقصى أمنياته أن ابوه يحبه .. حتى بعد ما وقف على رجليه أخيرا ملقهاش الحب اللي بيتمناه الولد اتصدم يا قاسم وقرر انه يأذي نفسه 

انصعق كل من شوق وقاسم مما سمعاه 

_ ايه!! 

لتبكي جلنار بحرقة

_يوسف حفيدي لو جراله حاجة يا قاسم مش هحمل حد اللي حصله غيرك.

تحركت شوق بصدمة وقلب قد أصبح ثقيلا من كثرة ما به من هم وقالت وهي كادت أن تبكي

_ اهدي اكده يا جلنار هانم وفهميني ...يأذي نفسيه ازاي.. يوسف ايه اللي وصله للمرحلة داي من أصله.. كان أخر مرة لما وصلته اهنه البسمة ممفرقاش وشه... ازاي يعني خلال لحظات اكده يتغير مزاجه ويفكر التفكير ديه 

هتفت جلنار بحنق وهي تشير لابنها 

_اسألي ابوه اللي دايما كاسر نفسه وقلبه يا حبة عيني بجمود قلبه ... لحد ما خلاص الولد مبقاش متحمل فقرر يأذي نفسه علشان يرتاح من عذابه.. وانا بقولهالك اهو يا قاسم لو مرجعليش يوسف مش هحمل حد المسؤلية غيرك وساعتها هيكون ليا تصرف تاني معاك.

قالتها وظلت تبكي مرة أخرى 

وقفت شوق مشدوهة تشعر انها مكتوفة الأيدي.. اطرافها شلت من خوفها على يوسف

_يا حبيبي يا يوسف بالله عليك قلبي ناهو ناقص 

عندها وجدت جلنار تميل برأسها وكأنها سيغشى عليها فجرت شوق نحوها وكذلك قاسم 

_جلنار هانم

_ماما 

لتزيح جلنار يد قاسم وتقول بتعب 

_ابعد عني  انا مش مسمحاك على اللي عملته.. رجعلي يوسف حفيدي الأول علشان اسامحك تاني .. اتحرك دور عليه في كل حتة انت لسه واقف عندك بتعمل ايه.. ايه البرود دا.. ااه لا أنا قلبي مش متحمل.. شوق ساعديني وطلعيني اوضتي قلبي هيقف على الولد ودوري عليه انتي مترجعيش الا بيه انتي تعرفي عنه أكتر.. رجعيلي حفيدي يا شوق بالله عليكي

هتفت شوق بحنق لذاك الواقف يدور حوله

_لا حول الله يارب ..ما تتحرك تدور على ابنك وشوفه راح فين.. لو كان خرج مش هيلخق يروح بعيد يوسف اصلا ميعرفش يخرج لوحده .. الحقه اعمل حاجة حلوة في حياتك بقا

قالتها ثم عاونت جلنار على الصعود لأعلى وهي تقول 

_اطمنى يا جلنار هانم.. أني هنزل ادور عليه بنفسي في كل حتة وربنا نا هرجعلك الا وهو في يدي اطمني

لينطلق قاسم بعدها بسيارته باحثا عن ابنه.

أراحت شوق جلنار على فراشها والتفتت مسرعة لتغادر لتبحث عن يوسف 

لتقول جلنار بهدوء

_استنى يا شوق.. اطمني يوسف بخير

وقفت شوق محلها وقد عادت الدماء لعروقها مرة أخرى بعدما كادت تسحب روحها أيضا خوفا على يوسف 

_انتي بتتكلمي جد يا جلنار هانم يوسف كويس طب هو فين وايه الرسالة اللي هو سايبها دي 

_تعالي اقعدي وانا هفهمك كل حاجة.. انا مكنتش ناوية اقولك علشان تكون محبوكة وقاسم يقتنع فعلا ان ابنه ضاع يمكن الجبس اللي مغلف قلبه دا يتفك... قاسم كان لازم يتحطله موقف على كل تصرفاته مع ابنه.. وانا استحالة اشوف يوسف بيضيع وابوه بيظلمه بالشكل دا واقف اتفرج  انا صبرت على قاسم كتير ولو متعدلش والله مش هيشوفه تاني ... بس مقدرتش مقولكيش وانتي شايفة الخوف عليه في عنيكي أكتر بأضعاف من خوف أبوه .. انا عارفة قد ايه انتي بتخافي عليه وبتحبيه علشان كدا هقولك

_المهم ان يوسف بخير وفي امان ريحتي قلبي والله يا جلنار هانم .. معاكي حق قاسم لازم يتربى ويعرف ان الله حق.. جايز قرصة الودن دي تفوقه 

_يارب تجيب نتيجة يا شوق أنا صعبان عليا يوسف اوي الولد لسه صغير ومش كفاية حرمانه من حنان الأم... انه يتحرم من حنان أبوه كمان.. والله حرام اللي بيحصله دا 

___

رجع لفيلته وصعد تحديدا حيث غرفة نومهم ليقول بكل غضب وهوجاء 

_ايه اللي عملتيه دا يا هانم

_ازاي تسحبي مبلغ  كبير زي دا من غير اذني

ردت بلا مبالاة

_ايه يا غريب مالك في ايه هي يعني اول مرة اسحب فلوس وادخل بيها مشروع خاص بيا.. ما انا دايما دخلت مشاريع كتير وعمري ما طلعت منها بخسارة.. ايه مالك المرة دي عامل كدا ليه 

_انتي عارفة اني معييش اي سيولة برا غيرها وكل فلوسي دخلتها في مشاريع وكمان كان لازم تأخدي اذني الاول قبل ما تتصرفي من دماغك يا هانم 

_ ايه الاسطوانة الجديدة بتاعتك دي .. وانا من امتا باخد اذنك قبل ما أعمل حاجة تخصني... اوعى تنسى نفسك يا غريب.. مش انا اللي تعاملني بالاسلوب دا .. وانت ملكش أي فضل عليا.. انا ليا الفضل في كل اللي انت فيه دا ... بتعبي أنا وعلاقاتي وشركاتي 

طالعها غريب بحنق ثم غادر مرة أخرى

لتزفر هي بتأفف وتكمل تصفيف شعرها

_اوف دا بقا يخنق بجد.

__

جلست جوارها وقالت باهتمام 

_ ها طمنيني يوسف فين دلوك عايزة اروحله

_هتعرفي مكانه قريب متقلقيش

_طب عملتيها ازاي داي وهل يوسف فعلا فكر انه يأذي نفسه لو ديه حصل فديه معناه ان الولد دخل في مرحلة خطر

_لا اطمني الحمد لله انا لحقته قبل ما يفكر في حاجة زي دي ماهو انا مش هقف اتفرج لحد ما ابوه يوصله للمرحلة دي... أنا اللي طلبت من يوسف يكتب الرسالة وفهمته ان باباه مش هيحس بيه وينسى شغله اللى اخد كل وقته دا إلا لما يتقرص ويخاف بجد من ضياعه من بين ايديه ... وطلبت من السواق يوديه للمكان اللي اختاره يوسف بنفسه انه يفضل فيه 

تنهدت شوق بوجل 

_يارب الخطة داي تعمل مفعول يا جلنار هانم اخاف قاسم لو عرف الحقيقة رد فعله يكون عكس اللي كنا بنتمناه ربنا يستر

_ربنا يستر يا شوق.. ويهديك يا قاسم يارب.

__

 نزلت شوق للأسفل وهمت لتغادر لبيتها 

ليقابلها قاسم بكل هوجاءه ويتحدث معها بحدة 

_يوسف ابني فين.. دورت عليه في كل مكان قريب من هنا مش لاقيه ومش هيعرف يبعد لوحده الا بمساعدة حد.. وأكيد الحد دا انتي مفيش غيرك.. مفكرة انك بكدا بتلوي ذراعي مثلا يبقى بتحلمي.. انتي زودتيها ولازم اوقفك عند حدك ولو حصلت هبلغ البوليس ... انطقي قولي ابني فين 

هتفت شوق بحنق

_ايه قاسم بيه انت جاي تحملني أني نتيجة أخطاءت انت ولا ايه.. يوسف ابنك اقسملك اني معرفاشي طريقه فين وأني جيت اهنه على ملا وشي ومعرفاشي حاجة عن الموضوع ديه... دور على ابنك كويس يا قاسم بيه لو مش علشانك انت أني عارفة انه مش فارق معاك رغم انه ضناك وحتة منك وهتجنن ازاي جالك قلب تفرط فيه اكده... لكن هقولك علشان خاطر جدته اللي ممكن يجرالها حاجة لو يوسف حصله حاجة.. واني بنفسي كمان هدور عليه.. لاني مش هفرط فيه أبدا يا قاسم بيه ... وهقولهالك صراحة.. لو أني لقيت يوسف مش هرجعهولك علشان انت متستاهلوش انت متستاهلش تكون أب من أساسه.. اللي يعامل ابنه وبحالته داي معاملتك دي منزوع من قلبه الرحمة.. ديه الغريب بيشفق على ابنه وبيخده في حضنه ويطبطب عليه وانت لاه... لكن هي رحمات بيزرعها ربنا في قلوب من يشاء من عباده وللأسف انت ملكش نصيب فيها لانك اخترت تخلع قلبك وتنأيه بعيد عنيك... دور على ابنك يا قاسم بيه ورجعه لحضنك تاني ويارب تلاقيه وميجراش للواد حاجة.. عارف ليه.. مش هقول علشان هتندم لاه... علشان وقتها أني اللي هبلغ البوليس... عن اهمال اب ميعرفش حاجة عن الابوة غير اسمها وبس.. عن اذنك يا قاسم بيه ومافضياش احكي اكتر من اكده رغم اني عندي كلام كتير عايزة اقوله.. لكن لازمن ادور ع يوسف وارجعه لجدته اللي مموته روحها علشانه طالما ابوه مهواش مهتم... وربنا في أسر بتزحف زحف علشان ضفر عيل وانت ابنك قدامك ومفرط فيه ولا حول ولا قوة الا بالله 

__ 

عادت شوق لشقتها تحدث نفسها بهم

_ ايه الابهات اللي منزوع من قلوبها الرحمة داي.. الله المستعان بقينا في زمن صعب يارب هونها.. طب أني يااللي كبيرة وتعبانة وبحاول اتحمل .. الواد الصغير ديه يعمل ايه.. يارب خذ بيده وباركله في جدته دي هي اللي الوحيدة اللي باقياله.

توقفت محلها عندما استمعت صوت تعرفه جيدا لتتسع أعينها بفرحة عندما تجده أمامها 

_ لاه مش معقول يوسف انت اهنه في داري؟؟؟ 

سار نحوها يوسف بتؤده فهو مازال حديث عهد على السير 

_ شوق... تيتة طلبت مني اختار مكان اقعد فيه فأختارت اني اكون معاكي علشان عارف انك هتفرحي اول ما تشوفيني اني مشيت مش زي بابا مفرقش معاه

حركت شوق رأسها بفرحة وعدم تصديق ... انها تراه يتحرك ويسير على قدمه ففتخت ذراعيها وقالت باكية

_ يااااه يا يوسف يا قلبي قد ايه كنت منتظرة اللحظة دي بفارغ الصبر يا من انت كريم يارب يا من انت كريم يارب..

قالتها وعانقته وبشدة وزاد بكاؤها 

_ الحمد لله ربنا استجاب لدعائي وقر عيني بشوفتك ماشي وواقف على رجليك يا نن عيني.. اللهم لك الحمد حتى ترضى يارب 

_ كان نفسي اشوف الفرحة دي في عيون بابا ...كنت مفكر اني لما همشي هيفرح بيا ويحبني يا شوق بس دا محصلش بابا بيكرهني ومش هيحبني  أبدا 

شددت شوق من عناقه ولم تدري ما الذي تقوله له في تلك اللحظة

ليتدخل مهند قائلا بمرح

_ ايه يا يوسف انت هتبوظ المفاجئة التانية اللي احنا عاملينها لشوق .. 

ليتذكر يوسف ما قام بفعله مع مهند فقال باسما 

_اه صح.. شوق هاتي ايدك يلا

ليأتي مهند بحجاب لشوق ويغمي عينيها 

_لاااا استنى من غير ما تشوفي

_فيه ايه يا ولاد .. واد يا مهند اوعى تكون مصيبة من مصايبك 

_عيب عليكي امسكي ايد يوسف بس وتعالي على اوضتي 

سارت ببطىء مع يوسف ومهند لغرفته 

فنزع مهند غطاء عينيها وقال

_دلوقتي تقدري تفتحي.

 نظرت أمامها_في ايه 

أخذها يوسف إلى المكان المقصود بصي هنا يا شوق 

طالعت شوق أمامها لتجد لوحتان مرسومتان فعرفت أن احدهما لمهند والاخرى ليوسف 

ليهتف يوسف 

_ ايه رايك يا شوق في المفآجئة دي انا ومهند رسمناهم ليكي مخصوص 

ليهتف مهند بمرح

_ الواد يوسف دا طلع عفريت اوي ورسمه جميل اوي.. دا ازهلني بموهبته... علشان كدا قررت اتحداه ونرسملك لوحة وانتي بنفسك تحكمي انهي الأحسن 

_ماشاء الله يا ولاد والله الاتنين حلوين اوي تسلم اديكم وعنيكم كمان متحرمش منيكم أبدا داي أحسن هدية حصلت عليها في حياتي 

ليقول يوسف بحماس 

_يلا اختاري اكتر واحدة عجبتك 

_والله الاتنين حلوين

_لا واحدة بس 

وجدت بصره يزوغ عند لوحة معينة فقالت باسمة مشيرة للوحة يوسف

_ داي عجبتني أكتر 

ليقفز يوسف بسعادة

_ ايوا بقا دي لوحتي.. فزت عليك يا مهند 

ادعى مهند الضيق

_ لاااا دي خيانة انتي اختارتي لوحة يوسف 

ليقول يوسف

_ انت ناسي ان شوق متعرفش أنهي فيهم لوحتى اصلا

_ في دي معاك حق 

_ اعترف انك خسران.. وانا كسبتك 

_ ما خلاص بقا يا عم الرخم .. انت اللي كسبت متعملهاش حوار بس على فكرة المرة الجاية انا اللي هكسب 

_ لما نشوف يلا نفذ بقا العقاب 

_ ايه لا يا عم مش لاعب 

_ انت هتتهرب من اولها .. احضرينا يا شوق .. مهند قال اللي يخسر هيتعاقب وهو عايز يتهرب 

لتهتف شوق بمرح معهم

_ واد يا مهاند اللي اوله شرط اخره نور هتتعاقب يعني هتتعاقب

_ انا كان مالي ومال الشورة دي بس انا اللي جبته لنفسي.. قول يا سيدي عقابك ايه خلصني 

ضحك يوسف

_لا شوق اللي تحدده 

_ ايه لاااا كله الا شوق دي ممكن تنزل ع دماغي بالببلغة بتاعتها 

ضحكت شوق

_ صدق فكرة يا ولا

_ لااا وربنا ما يحصل.. يوسف انت بتدبسني على فكرة 

هز يوسف كتيفه

_ انا مالي اللي تحدده شوق 

هتفت شوق 

_ خلاص خلاص هختارلك عقاب سهل

_ اشجيني ربنا يستر

_ تدخل اكده زي الشاطر تنظف المواعين اللي في المطبخ.. رغم اني مشطباه قبل ما امشي، بس أني متأكدة ان حضرتك انت واخواتك قلبتوه زريبة في غيابي يلا انطلق يا حلو 

_ نعم انظف ايه!! .. هو انا بعرف اعمل لنفسي كوباية قهوة علشان انضف مواعين.. انتي بتهرجي صح 

_ لا وربنا بتكلم جد يلا ياواد على المطبخ 

_لا مش هيحصل أبدا انا مهند على اخر الزمن اقف انظف مواعين ليه 

أمسكت شوق بحذاءها 

_ هتدخل المطبخ من سكات والااااا 

صاح مهند

_ لااا كله الا والا بتاعتك دي.. هنضف وامري لله

ضحك يوسف بمرح.. لتعانقه شوق بفرحه لسعادته 

وقف مهند أمام الحوض

_ ايوة اعمل ايه.. امسك البتاعة دي واحط فيها صابون سايل من دا وبس كدا صح 

_ عليك نور طب ما انت عارف اهو بس شمر كم قميصك ديه علشان ميتبلش 

_ اقولك انا هخلعه احسن .. اهو 

ابتعدت وشوق عنه قليلا ثم عادت بمريلة المطبخ

_ خد البس دي 

_ نعم يا ختي.. شوق هزعلك على فكرة

ضحكت شوق ويوسف 

_ انت حر الحق عليا خايفة على هدومك 

_ هاتي هلبسها وامري لله ... مبسوط انت يا يوسف مش كدا 

ضحك يوسف من كل قلبه 

_ جداا 

_ ماشي يا خويا لك يوم

في ذلك التوقيت دلف أمير يبحث عن شوق ليجد مهند بهيئته تلك

فانخرط في الضحك 

_ يخربيتك كدا.. مش عارف ابطل ضحك.. مهند المعروف عنه بشياكته واناقته يدور بيه الزمن ويقف ف المطبخ بمريلة لااا.. دي هتتكتب في التاريخ 

_ نقطنا بسكاتك انت يا زفت مكانتش نقصاك

_ لا والله لاخدلك صورة تذكارية 

هنا انفجر مهند وركض خلف اخوه 

_ بقا كدا طب وربنا ما ستيبك وهطلع غيظي فيك 

_ لاااا الحقيني يا شوق اخوكي الطور الهايج فاق عليا انا .. انا لسه متجوزتش يا ناس وعايز ادخل دنيا وأكمل نص ديناااي

___

بعدما أنهى مهند تنظيف الاطباق في المطبخ بمساعدة شوق بالطبع 

دلف ليبدل ملابسه 

دخلت شوق خلفه قائلة بامتنان

_ شكرا يا حبيبي على عملته علشان يوسف متعرفش انت باللي عملته ديه كبرت في نظري اوي يا ولا... قلبي يا ناس صاحب قلب كبير وبيحاول ينشر السعادة على اللي حواليه 

_ انتي اللي علمتيني ابص للحياة بشكل مختلف.. علمتيني ان مجرد كلمة حلوة او ابتسامة او موقف صغير بيفرق اوي يا شوق .. اللي عملته دا مكنتش متوقع اني اشوف الفرحة والسعادة دي كلها في عيون يوسف المسكين ده

_اوعى تستهين بقلوب الصغار.. دول بيخزنوا في عقولهم كل الذكريات سواء حلوة أو مرة.. خلينا نكون سبب في رسمة البسمة على شفايفهم وفي قلوبهم لما يكبروا ويفتكرونا ... يمكن يفتكرونا بدعوة حلوة لما نموت .. وافتكر دايما اننا سنرحل ويبقى الأثر، فسيب أثر محمود بين الناس يفتكروك بيه... الله يرحمه أستاذي وتاج راسي استاذ حسام عمري ما هنساه أبدا رحل وفات أثره محفور جوة قلبي ... ربنا يجعله من أهل الجنان ورضا الرحمن.

_شوق انتي عظيمة اوي انا كل يوم بيزيد اعجابي بيكي 

_أني ولا شىء يا ولا من غيركم... ربنا يديمكم في حياتي نعمة.

 عانقها مهند بحب_حبيبتي ربنا يخليكي ليا 

ليدلف عساف في تلك اللحظة

_خيانة 

ليهتف مهند بمرح 

_شوق احنا خلاص اتكشفنا انتي لازم تصلحي غلطتك وتتجوزيني 

ضربته شوق على رأسه 

_بطل ياواد ايه الكلام ديه

عساف

_انت مسخرة

ضحك كل من مهند وعساف

لتقول هي بجدية..

_ المهم اقعدوا اكده وافهموا اني عايزة منكم ايه 

جلسوا جوارها 

لتقول 

_دلوك يوسف مش هينفع يفضل اهنه لاني متأكدة ان ابوه هياجي اهنه يدور عليه ولازم ننكر اننا نعرف مكان يوسف لحد ما أبوه يتعلم الدرس 

عساف 

_مع اني مش معاكم من اول الحوار.. بس ماشي قوليلي انتي عايزة توديه فيه

_مفيش مكان أعرفه ءأمن من عند فداء  

لينهض مهند بفرحة

_مياار.... يبقة انا اللي هوديه بنفسي 

لتمط شوق شفتيها

_لاه عساف اللي هيوديه هناك علشان يوصي خالد عليه 

_يا سلام طب ما انا اعرف اعمل كدا.. انتي بتتحججي يا شوق 

_بصراحة اه 

_حد قالك انك رخمة 

_انت اهو قلتلي 

_شوق محدش هيودي يوسف عند ميار غيري

_انا قلت فداء على فكرة مجبتش سيرة ميار 

_شوق متبقيش رخمة 

ضحكت شوق 

_خلاص ماشي استعد يلا لحد ما اطلع امهد ليوسف وانت يا عساف كلم خالد وقوله

عساف_تمام هكلمه حالا

__ بالخارج خرجت شوق لتتحدث مع يوسف 

_يوسف يا قلب شوق.. اهنه ابوك هياجي يسال عليك وساعتها هيشوفك وديه اللي مش عايزينه دلوك فأنت هتروح تقعد يومين بس عند ميار وانا هجيلك هناك طبعا واقعد معاك

_ميار دي البنت القمر اللي سلمت عليا عند تيتا 

_اه هيا 

_ماشي موافق 

ليمسكه منهد من ملابسه 

_ولا ملكش دعوة بالقمر بتاعي انت فاهم.

ضحك يوسف وقال لإغاظته 

_ هقعد مع القمر وانت لأ 

ضيق مهند أعينه بضيق 

_هزعلك ياض احذرني 

_مش هتقدر تعملي حاجة لان شوق في صفي 

_بقى كدا طب قدامي يا خويا

يوسف_مع السلامة يا شوق

قبلته شوق 

_في أمان الله يا نن عين شوق

_اوعي تتأخري عليا

_من النجمة هتلاقيني عندك 

في تلك الأثناء جاء اتصال لشوق من حلنار

_دي جدتك يا يوسف.. ايه قاسم جاي على هنا.. حاضر حاضر 

نظرت لمهند وقبلت يوسف مرة اخرى 

_يلا يا مهند خدوا بسرعة اللي كنت عاملة حسابه حصل 

__

ما ان انطلق مهند بيوسف  مغادرا حتى طرق قاسم باب الشقة بعد دقائق معدودة 

_شوق افتحي انا متأكد ان يوسف هنا .. هاتيه بدل ما اعمل شوشرة وابلغ البوليس 

هنا فتح عساف وقال بضيق

_في ايه يا قاسم باشا معقول في واحد محترم يخبط على بيوت الناس بالشكل دا 

_انا عايز ابني يا عساف والا مش هيحصل كويس 

لتهتف شوق 

_ ايه يا قاسم بيه جاي تعلق أخطاءك على شماعة غيرك.. ابنك انت اللي ضيعته جاي دلوك تتهمني اني اللي أخدته!!

_مش هكرر كلامي فين ابني يا شوق 

_اتفضل دور عليه بنفسك.. ومش بس هنا دور ف الشقة التانية كمان.. 

اشار له عساف 

_اتفضل دور براحتك 

تردد قاسم في أن يفعل وبقي مكانه 

ليهتف قاسم 

_هتندمي لو كنتي عارفة مكانه ومخبية 

لترد شوق لتحبك الدور

_اني لولا الوقت اتأخر واخواتي طلبوا اني ارجع لكنت فضلت ادور لانصاص الليالي على يوسف.. لكني رجعت وكان عندي أمل ان ابوه هو اللي يتولى مهمة البحث عنه .. ابوه ها .. ابوه اللي بحق وحقيقي يا قاسم بيه مش اسم مكتوب على شهادة الميلاد 

طالعها قاسم بغيظ وانصرف 

ليهتف عساف بجدية

_اللي عملتيه دا غلط يا شوق مصيره هيعرف مكان ابنه ووقتها له الحق ف انه يتصرف زي ما هو عايز فاكرة خالد

_المرة دي مليش يد والله يا عساف ومفكرتش أبدا بالاسلوب ديه .. لكن جلنار جدته هي اللي عايزة اكده يمكن ابوه لما ابنه يضيع منه يتقرص عايزة تعرف غلاوة يوسف عند قاسم علشان لو مكانش مهتم مش هترجعه ليه تاني، ومعاها حق، يوسف يعيش بعيد عن ابوه وعنده في قلبه شوية حب ليه أفضل من انه يعيش مع ابوه وينفد رصيده من الحب نهائي.

__

لأول مرة يشعر قاسم بهذا الشعور العجز سيطر عليه تماما فلا أثر لابنه في اي مكان 

_هيكون راح فين الولد دا بس.. انا هتجنن ومصر ان الزفتة اللي اسمها شوق دي السبب اللي ورا اللي حصل... اه دكتور رائد.. معقول ازاي نسيته

__

في صباح اليوم التالي 

استيقظ من نومه على اشعة الشمس بداخل السيارة 

_النور طلع!! انا نمت مكاني من غير ما احس؟... ماهو انا مش هرجع الفيلا من غير يوسف ابني.. مش هتحمل اشوف نظرات اللوم في وش امي، كلمت رائد واقسم انه ميعرفش عنه حاجة..طب وبعدين معقولة يا قاسم انت ضيعت ابنك منك

طب ما يضيع مش دا يوسف اللي مكنتش مهتم بيه 

ايوة مش مهتم بيه بس مش معنى كدا اني مبحبوش دا ابني وحتة مني.. منها لله امه اللي كانت السبب لما ببص ف وشه بفتكرها  وبتعيدني لذكريات مش حاببها وغلطة هفضل طول عمري هحاسب نفسي عليها 

علشان كدا مش بعطي للولد وش وبتهرب منه.. بس هو ذنبه ايه ..لا هو اختار يجي الدنيا دي ولا اختار امه وابوه ... هل فعلا ظلمته بتصرفي دا معاه.. هل فعلا انا مستاهلش اكون ليه أب!! 

__

صار بسيارته حانقا يضرب دركسيون السيارة بحنق وغضب شديد 

_هي مفكرة نفسها ايه.. ان مفيش زيها.. وأديها أهي دخلت مشروع فاشل معروف نتيجته من الاول.. لا أنا مش هسكتلها لحد ما تفلسني  انا هروح أحول كل فلوسها باسمي أنا.. وهعمل معاها زي ما عملت مع الولاد علشان بعد كدا متقدرش تصرف قرش واحد من غير ما ترجعلي أنا... 

قال ذلك وساق سيارته عازما على أن يفعلها ولا يجعل أحد له سلطة فوق سلطته... وفي لحظة غافلة منه اثر شدة غضبه وسرعته 

اصطدمت سيارته بشاحنة نقل كبيرة للبضائع 

_لااااا

__

استيقظت من نومها باكرا وعزمت على أن تذهب ليوسف فور أن يغادر خالد إلى شركته 

وفي تمام الساعة العاشرة جاءها اتصال... 

__

ترتب الطابق الأرضى من الفيلا جيدا لتلك المفآجئة الكبرى التي أعدتها فداء بصحبة ميار ويوسف والجميع لادخال السرور على صاحبة القلب الكبير شوق

لتقول فداء 

_كدا كل شىء جاهز.. ميار كلمتي شوق تيجي 

_اه كلمتها 

_ايه دا يا خبر انا نسيت توبا تماما

_طب والحل يا فداء .. توبا ..شوق بتحبها جدا 

ليهتف عساف فالفرصة اتته سانحة

_انا هروح اجيبها حالا

فداء

_ياريت يا عساف النهاردة ريست معندهاش جامعة هتلاقيها ف البيت عارفه! 

_عارفه متقلقيش هجيبها وهرجع 

وانطلق عساف بحماسة كبيرة 

__

انهت شوق الاتصال وتوجهت لارتداء ملابسها

_غريبة ميار بتستعجلني ليه معقولة يوسف زعلان وعايزني.. لا انا هروحله حالا 

__

وصلت السيدة جلنار فرحبت بها فداء

_اهلا وسهلا يا هانم نورتينا والله 

_اهلا بيكم انا جيت علشان مكانش ينفع مجيش دي شوق ومهما عملت مش هقدر اوفيها حقها في  اللي عملته وبتعمله ليوسف ومن غير مقابل في حين ان باباه معملش ولا حاجة وهو أبوه.

__

ركبت توبا السيارة مع عساف 

_معلش يا انسة توبا جبتك على ملا وشك وصحيتك من النوم 

_لا ولا يهم حضرتك دي أبلة شوق وكنت هزعل على فكرة لو كنتوا نسيتوني 

طالع أعينها باهتمام وقال

_ننساكي ازاي وانتي بقيتي تيجلنا في الاحلام

_افندم 

تنحنح عساف وقال بجدية 

_احم.. توبا من غير لف ولا دوران أنا عايز اتجوزك 

تسمرت توبا مكانها و دت لو انشقت الارض وابتلعتها لتختفي من ذلك الموقف المحرج بالنسبة لها

ساد الصمت طوال الطريق فلقد أحس عساف بحرجها 

وعندما وصلا قال

_هسيبك تفكري وهعرف رأيك من شوق.. بس هكون سعيد لو وافقتي بيا.. اه نسيت اقولك.. علشان متأكد ان السؤال دا اول ما تبادر في ذهنك.. اه حبيتك بهيئتك كدا.. متسأليش ازاي وامتا.. بس قدرتي تخطفي قلبي

قالها وانطلق يسبقها.. ليتركها تقف ووجنتاها تطلق لهيبا حارقا من فرط الخجل والسعادة 

وصلت شوق لتجد توبا تقف وحدها بالخارج 

_ايه ديه بطيختي اهنه كمان يا مرحبا يا مرحبا ... ايه يا بت مالك ضربتي على طماطماية اكده ليه من كتر الحَمار اللي في وشك .. تعالي ندخل يلا... يوسف منتظرني 

سارت معها توبا على حرج وهي تتمنى ألا تتلاقى أعينها بعساف حتى لا تفضحانها وترسل له الموافقة هكذا سريعا 

__

دلفت شوق لتجد الأنوار كلها منطفئة والمكان مظلم

_ايه ديه هي الكهربا قاطعة اهنه بس احنا بالنهار يعني اومال المكان ضلمة ليه...

__

احتار أن يذهب ليبحث عن ابنه

_متأكد ان شوق تعرف طريق يوسف يبقى اعرف هي فين واروحلها هناك......