ليه مش بتحبني يا بابا

 قصة قصيرة للكاتبة أسماء عبد الهادي

ليه مش بتحبني يا بابا 

قصة للعبرة 

قصة 

_ايه يا بنتي ما لك راجعه مقهوره ليه _سيبيني يا ايات في حالي انا فيا  اللي مكفيني 

_طب قولي بس مالك في ايه

_قلت لك سيبيني في حالي اخرجي واقفلي الباب ده.

_ايات اسيبك في الحاله  دي ازاي.. حبيبتي  احنا ما لناش الا بعض لو مش هتحكي لأختك تحكي لمين يعني 

هنا ايات انفجرت وقالت وهي منهاره _ايوه شايفه انتي الحاله اللي احنا وصلنا ليها دي بنتين زي الورد عايشين لوحدهم زي اليتمه وكأن ملهمش حد ولا اب يرعاهم واحنا في الحقيقه ابونا موجود ابونا عايش على وش الدنيا بس يا خساره  ولا كأننا بناته خلفنا ورمانا كده من غير ما يهتم بينا هل عمره فكر احنا محتاجين ايه؟؟  جعانين ولا شبعانين متغطيين ولا بردانين مبسوطين ولا زعلانين مطمئنين حتى ولا خايفين عمره ما سأل ولا عمره اهتم بينا ولا كأننا بنات ومن اصله

حضنتها حياه وقالت

_ يا حبيبتي هوني عليكي مفيش حاجه مستاهله زعلك ده 

_لا مستاهله ومستاهله قوي طب قوليلي خلفنا ليه يعني طالما بعد كده هيرمينا كده هل هي دي المسؤوليه اللي ربنا امره انه يرعاها...

افتكرت ايات زمان لما كانت صغيره 

_ماما انا رايحه عند بابا عايزه حاجه يا حبيبتي

_ خذي بالك من نفسك يا ايات وتعالي بسرعه ما تتاخريش علشان بقلق عليكي

_ حاضر يا ماما يا احلى حاجة حصلتلي في الدنيا

راحت ايات عند باباها وخبطت

واللي فتح لها اختها الصغيره 

_اهلا انت جيتي 

_بابا فين

_ بابا مش فاضي فوتي علينا بكره _اوعي كده يا بنت انا مش جايه لك اصلا انا جاية اشوف بابا 

جاه باباها وقال بصرامة

_ ايات ممنوع اشوفك تكلمي جنى بالاسلوب ده او تتعاملي معها بالحده دي مفهوم 

_مفهوم يا بابا ازاي حضرتك انا جيت علشان اشوفك علشان انت وحشتني قوي

_ انا كويس

_ طب انت رايح فين

 _نازل  عندي مشوار  مهم

_ طب انا كنت جاية اقعد معاك شويه حضرتك مش بتيجي عندنا في البيت وانت واحشني قوي  

_اه بعدين بعدين

هنا جنى مسكت ايدين باباها وقالت _بابا هتجيب لي حاجه حلوه معاك ايه وانت راجع

 باباها شالها وباسها ولف بها وقال 

_لو طايل اجيب لك كنوز الدنيا بحالها مش هتاخر يا روح قلبي انتي

_ لا انا عايزه شيكولاته

_ حاضر يا حبيبتي بوكس  شوكولاته بحاله هيكون عندك النهارده يلا انا نازل سلام 

_هتوحشني يا بابا الحبه دول 

وانتي اكثر يا روح بابا مع السلامه

 كل ده كان بيحصل في ايات واقفه متنحة 

ودموعها مغرقة وشها 

جنى بنته قاعدة معاه علطول وبيبوسها وبيدلعها وبيجيب لها كل حاجة حلوة في حين ان ايات مش بتشوفه الا مرة واحدة بس وولا مرة اهتم انه ياخدها في حضنه حتى او يكلمها كلمة حلوة 

ايات اول ما باباها نزل 

نزلت واخدت السلم جري تلحقه وهو رايح يركب عربيته 

وكان عندها امل اخير انه يوعدها بحاجة حلوة زي اختها 

خبطت ع ازاز العربية وهي بتعيط 

_ بابا 

فتح الازاز وقال 

_ ايه يا ايات انا مستعجل عندي شغل

_ هتيجبلي حاجة حلوة زي جنى 

طلع فلوس من جيبه وقال 

_ خدي هاتي اللي انتي عايزاه وبلاش توجعيلي دماغي 

حطلها الفلوس في ايدها ومشي 

ايات من قهرتها قطعت الفلوس مليون حتة ورجعت البيت وهي مش مبطلة عياط 

امها 

_ ايات بنتي حبيبتي مالك ايه اللي حصل انتي وقعتي ولا ايه 

جت حياة وقالت

_ في ايه يا ايات انتي اتخانقتي مع جنى ولا ايه 

هنا ايات علشان كانت متضايقة فراحت طالعة ف اختها 

_ انتي اسكتي متتكلميش بتتكلمي ليه انتي عاملة دوشة انتي مزهقاني ابعدي عني انتي واقفة جنبي ليه اصلا 

امها استغربت 

_ايات يا بنتي فيه ايه بس انتي كل مرة هتيجي من عند ابوكي متعصبة بالشكل دا

_انا مش هروح هناك تاني يا ماما مش هروح أبدا 

ضحكت حياة

_انتي كل مرة بتقولي كدا واول ما يجي اليوم اللي بتروحي فيه مش بتقدري تتحكمي في نفسك وبتلبسي وتنزلي بسرعة على هناك 

عيطت ايات وقامت بكل عصبية مسكت اختها وضربتها 

_قلتلك اسكتي.. اسكتي بقا.. طب تستاهلي اللي يجرالك 

خلصتها امها من بين ايدين آيات 

_بنت يا آيات اللي بتعمليه دا غلط اياني اشوفك بتضربي اختك تاني مفهوم 

_لا مش مفهوم مش مفهوم .. امشوا اطلعوا برا انا عايزة اقعد لواحدي انا مفيش حد بيحبني 

امها حضنتها 

_ايات يا بنتي لازم تكوني متأكدة ان مهما اي حد اتخلى عنك لا انا ولا أختك هنتخلى ولا هنسيبك، احنا هنا جنبك وبنحبك.. اهتمي باللي بيحبك وبس واللي مش مهتم بيكي متهتميش بيه ولا تحطيه في اعتبارك 

_يا ماما دا بابا .. بابا 

_وباباكي مش مهتم يا بنتي نعمله ايه نضربه على ايده علشان يحس بيكم .. ادعيله ربنا يهديه.. لكن متقهريش نفسك كدا انتي صحتك عندي بالدنيا 

__

باااك

عيطت ايات 

_وحشتيني يا أمي أنا كنت بتقوى بيكي على اللي بمر بيه هعمل ايه من غيرك.. كنت خلاص مش بفكر فيه.. لكن شوفته مع بناته ماسكهم من ايدهم وشكلهم كانوا بيتفسحوا متحملتش وانهارت تاني غصب عني 

حياة اختها ف حضنها

_حبيبتي مفيش حاجة في الدنيا مستاهلة زعلك أبدا ولو احتاحتي حاجة انا هوفرهالك برموش عنيا الحمد لله اني بشتغل وبقدر اجيبيلك كل اللي تحتاجيه.. ارضي بالواقع مش هقولك انسيه دا ابوكي لكن متوقفيش حياتك عليه. 

_ربنا يخليكي ليا يا حياة انتي ليا حياة فعلا