جوازة غصب
بقلم الكاتبة أسماء عبد الهادي
اسكريبت جوازة غصب
جوازة غصب
١
_نايا... قومي يا بنتي اتأخرتي
_سيبيني يا مامي انام شوية من فضلك
_لا تنامي ايه مبقاش فيه وقت يلا يا روحي الساعة بقت ٩
نطت نايا فزع
_ايه الساعة كام ياربي انا اتأخرت اوي.. ليه كدا يا مامي انا قايلة ليكي تصحيني بدري عندي محاضرة ٩ ونص
_يا نانو انا بصحي فيكي من بدري وانتي اللي مش راضية تصحي
_طب يا ست الكل طلعيلي الدريس بتاعي الله يكرمك لحد ما اخد شاور واغسل سناني واطلع
_ماشي وهعملك ساندويتش كمان علشان تفطري قبل ما تنزلي
خلصت شاور ولبست وهي بتلبس الشوز عند الباب خبطت في اخوها
_ااه .. سوري يا دولا
_ايه يا بنتي مالك متسربعة كدا ليه
_اصلي اتأخرت الساعة دلوقتي ٩ ونص وعندي محاضرة ٩ ونص تصور... اختك هتتشلوح النهاردة الدكتور ده مبيرحمش
قالت كدا ووقعت ع الارض وهي بتلبس الشوز
ضحك عادل
_لا انتي حالتك صعبة اوي.. خلاص صعبتي عليا تعالى اوصلك وانا في طريقي للشغل... بس هنزلك على بوابة الجامعة وتكملي انتي طريقك
_قلب قلب نانو من جوة اخويا حبيبي يا ناس.. متحرمش منك
_بس بس كل ده علشان مصلحة غير كدا ولا تعرفيني مصلحجية حقيرة
_ثانك يو بيبي... يلا انا جاهزة.. بس تطير بالعربية ها
_نانو استنى خدى الساندويتش
_لا يا مامي مش وقته لازم الحق وقتي
_يا بنتي مينفعش تخرجي على معدة فاضية ده انتي حتى مشربتيش بوء ماية
_بعدين بعدين يا مامي..يلا يا دولا بقا
الام
_ مفيش فايدة فيها هتفضل طول عمرها متسربعة كدا.. بس هقول ليه ربنا يهديكي يا بنت بطني.
__
ركبوا العربية
نايا
_ما تسوق بسرعة يا بني انت ماشي على قشر بيض انجز
_ايه يا بنتي انا ماشي على السرعة المسموح بيها
_لا يا باشا ده كدا السلحفا اسرع منك... زود السرعة وطير بينا انا اتأخرن يا دولا والله
_يا بنتي في العجلة الندامة.. اهدي ان شاء الله الدكتور بتاعك ده يتأخر النهاردة شوية
_انا مش عارف انت بتجيب البرود ده منين... اما عن الدكتور فأنا حاساه بيعاندني صراحة
_ازاي بقا
_يوم لما اروح بدري هو يتأخر ولما أنا اتأخر ألاقيه هناك من بدري والبس في ماسورة تأنيب ملهاش اول من اخر... يفرج عليا المدرج كله
ضحك عادل
_معلش ارزاق وانتي مرزقة صراحة
_انت هتقولي.. سوق يا بني سوق
بعد شوية صرخت
_عااادل وربنا لو ما سرعت شوية لااقعد مكانك واسوق انا
_مفترية وتعمليها
_اينعم
_بس انتي كدا هتوصلي فعلا.. بس مش على المحاضرة يا ماما لا على المستشفى لانك هتلبسي في اي عمود وش
_بس هوصل في النهاية
_لا نظرية بردو
_طب سوق بسرعة بقا
صرخ هو
_شيلي ايدك من على الدركسيون يا مجنونة هنعمل حادثة كدا... يخربيتك
_هتسوق بسرعة والا
مكملتش الكلمة لقته طار بالعربية فصرخت
_عاااا عاااادل.. لااا خفف السرعة يا نهار الوااان هتموتنا
_مش بتقولي ازود السرعة اشربي بقا
_انا قصدي يا متخلف تسرع شوية هو انت يا تخرق يا تمرق... لا تمشي بطىء اوي لا سريع اوي مفيش حاجة بين البينين
_لا أنا يا اما يمين يا اما شمال معنديش اي خيارات في النص.
بعد ربع ساعة وصلوا
وفضلت نايا تنهج
_أل..ف شك..ر يا.. دو...لا يخربيتك.. قطعت.. نفسي
ضحك عادل ومشي
_هاف فان
أما نايا
_أنا أخدها جري علشان ألحق المحاضرة بدأت من نص ساعة ده انا هأخد دش معتبر.. اه يا حوستي ياني.
__
_ما تتحرك يا رؤؤف..
_ايه يا بني ما انا ماشي اهو هو انا بلعب
_ماشي فين انت كدا بتهرج.. المحاضرة بدأت من نص ساعة وانت عارف الدكتور ده دبش بيدي مبيهموش حد
_وايه يعني ما تبدأ نعمله ايه يعني
_يا بني بقولك دبش هيحدفنا كلمتين في جنابنا ولو طالبة معاه عكننة ممكن يسحب الكارنيه وابقى قابلني لو عدينا السنة دي يا فالح
_يا بني يعني الكلمة بتلزق اوي فكك... وبعدين يسحب كارنيه مين انت كمان انت مش عارف انا مين ولا أعمل فيه ايه بس يفكر يعملها
_لا في دي معاك حق.. ده انت لا بتتحول بتكون اعوذ بالله محدش بيقدر يوقفك ولا يقف في طريقك.. كأنك وحش هتنقض على الفريسة
ضحك رؤوف
فقال معتز
_فاكر يا رؤؤوف لما الواد بيكا حب يرخم عليك عملت فيه ايه
_الا فاكر... عرفت الجامعة كلها مقامه ده غير انه بات في المستشفى اسبوع بحاله
_يخربيتك مفتري... الواد صحيح كان رخم بس مش قدك بردو
_يستاهل حد قاله يعمل نفسه فلانتينو.. وعاملي فيها مفيش منه.. جته هم كل ما افتكره مزاجي يتعكر.. بقولك ايه افتحلنا سيرة عدلة
_لا سيرة ايه اخلص .. ندخل المحاضرة النيلة دي ونخلصها وبعدها نرغي براحتنا.
_ماشي يا عم علشان خاطرك انت امشي
وفجأة وهو ماشي... حس بحاجة خبطت فيه
فزعقت نايا وقالت
_ايه دا انت يا اخينا مش تحاسب
وقف رؤؤف وقال
_نعم هو مين اللي يحاسب يا انسة انتي
_انت طبعا اللي تحاسب واقف في وشي ليه وانا بجري
_لا وكمان بتجري يا متخلفة ليه فاكرة نفسك طفلة في كيجي
_مين دي اللي متخلفة يا حيوان انت
_نعم حيوان.. انتي قد كلمتك دي
_اه قدها انت حيوان هخاف منك ولا هخاف منك
_اه خافي أنا بقولك خافي
_اه انت طلعت منهم...بص بقا انا بزهق من جو فتح الدراع وفرد العضلات .. وافلام ام بي سي تو دي... فاتشطر على حد قدك يا شاطر.. وابعد كدا من طريقي علشان انا مش فاضيالك
جت تمشي فاعترض طريقها
_استنى هنا انتي رايحة فين.. فكرك اني هسيبك تمشي بعد اللي هببتيه ده وقلتيه عليا
_بقولك ايه متبقاش غلطان وتعملها حكاية هنا علشان أنا خلقي ضيق وممكن ازعلك بجد.
_لا يا شيخه انتي بجد مش ممكن دمك ثقيل ولسانك اطول منك.
_لا حاسب السكر اللي بينقط منك ابعد من طريق يخليني امشي
_ هو انا مسكتك يا بنتي ... انتى جاية تتبلي عليا.؟
_اووه استغر الله العظيم ايه سدة النفس دي على الصبح
_لا انت فعلا زودتيها اوي وانا ساكتلك ومش عارف ساكت ازاي لا
_لا كمان ليك عين تتكلم انا مش فاهمه انا ايه البجاحة بتاعتك دي.
نايا سابته ومشيت فكان رايح وراح وهو متعصب
معتز وقفه
_استنى انت رايح فين انت عايز تشبك مع بنت ولا ايه ده انت اول مره تعملها
دي بنت مستفزة اوي ومحتاحة اللي يعطيها على دماغها يمكن تمشي مظبوط
انا رايحلها
_استنى يا بني هاجيبلنا الكلام يخربيتك هيا ناقصة خراب
راح رؤؤوف وراها ومعتز بيجري وراه يمنعه
_ يا ابني استنى بس بالله عليك مش عايزين مصايب
رؤؤف كان بيجري ورا نايا اللي اول ما شافته بيجري جريت بسرعة وفجاه مره واحده خبطوا في باب المدرج
فوقعوا على الارض هم الاثنين
نايا قامت وقفت وزعقت في رؤوف اما المدرج كله ضحك عليهم
_عاجبك كدا يا زفت.. اديك وقعتني وضحكت عليا المدرج كله
رؤوف قام وقف وهو متضايق
_بردو لسه بتطولي لسانك اللي متبري منك دا انتي ايه
_انت اللي ايه وعايز مني إيه
الدكتور قال
_والله عال اوي اللي بيحصل... ممكن يا مدام وانت يا استاذ يا جوز المدام تحلوا مشاكلكم العائلية في البيت مش هنا في الجامعة وخاصة في محاضرتي
رؤوف رفع حواجبه
_نعم انت بتقلس بقا
_والله كويس انك فهمت
المدرج كله ضحك عليهم تاني
نايا_ عاجبك كدا انت جبتلي الكلام... يعني انا اللي بجري ومستعجلة علشان
المحاضرة ومأخدش كلمتين بايخين من الدكتور اللي شايف نفسه لو مؤاخذة يعني يا دكتور... ف تيجي انت تجبلي الكلام اكتر.. بقا انا يتقالي يا مدام وانا لسه آنسة رقيقة رقراقة عذبة
رؤوف رفع حاجبه بسخرية
_نعم ياختي، را ايه؟؟
_رقيقة ورقراقة عندك مانع
_لا انتي مش رقيقة ورقراقة انتي نبيلة الرقاصة
_احترم نفسك بدل ما بالهيلز وعلى دماغك علطول
_طب فكري بس تعمليها وانا كنت...
الدكتور
_بس بس انت وهو .. تعالوا هنا حالا
معتز وقف بره ورفع ايده الاثنين وقال
_ انا ما اعرفهمش انا مش معاهم يا دكتور
رؤؤف بضيق
_اه يا ندل يا حقير بتبيع صاحبك كدا في ثانية
_معلش بقا يا صاحبي اصل بعد اللي عملته دا فيها طرد وش يا معلم وانا ابويا هيعلقني لو جبت اي كحك السنادي
__
نايا راحت للدكتور وقالت
_والله العظيم يا دكتور هو اللي....
_باااس مش عايز كلام هنا... اسبقوني على مكتبي حالا
نايا اتحركت
أما رؤؤف لا
الدكتور
_قلت اتفضل بسرعة اتحرك
رؤؤف بصله شوية وبعدين اتحرك من مكانه
معتز راح للدكتور
_ياكتور دول عاملين زي توم وجيري مينفعش تسيبهم في مكان واحد دول ممكن يخربوا الدنيا
الدكتوراقتنع بكلام معتز فقال _مم معاك حق
وكلم السكرتير بتاعه
_دخل البنت اوضة مكتبي والولد يستنى برا
بعد المحاضرة
كانت نايا بتعيط في المكتب
اما رؤؤف فكان قاعد على كرسي وحاطط رجل على رجل ومش هامه
نايا اول ما شافت الدكتور جريت وقالت
_يا دكتور هو اللي اعترض طريقي لما كنت بجري علشان الحق محاضرة حضرتك... لقيته وقف في طريقي وانا بجري فخبطت فيه بدون قصد وبعديها لقيته بيقول عليا متخلفة فطبعا مكانش ينفع اني اسكتله فعطيته اللي فيه النصيب يقوم هو يسكت ويخليه جنتل مان لا ده يجري ورايا علشان يعرفني ازاي انا اقوله يا حيوان فأنا هربت منه وجيت على هنا فخبطنا في الباب فوقعنا بس والله يا دكتور دي كل الحكاية
الدكتور انفجر ضحك
نايا
_ايه يا دكتور هو انا حضرتك قلت نكتة ولا ايه
_لا انا بقول كويس انك لسه عايشة.. وانه معملش فيكي حاجة
_لا ما انا جريت وهربت منه... وبعدين ليه يعني هو فاكر نفسه مين... أنا فعلا اول ما شفته قلت عليه بلطجي وعرفت انه مش سالك ابدا
رؤؤف قام وقف وقال
_سامع كلامها
الدكتور _مغلطتش
_اه انت كمان هتقف في صفها بردو
_انا مع الحق.. انت حضرتك شايف انه ينفع مهما كانت البنت عملت فيك ايه انه تجري وراها وتخوفها بالشكل دا
_لا يا دكتور انا مخفتش منه انا كنت بجري علشان الحق محاضرة حضرتك... امم يعني خفت منه شوية صغننة .. بس حضرتك شوفت انا ملتزمة ازاي وحريصة على حضور مادة حضرتك في المعاد المظبوط بس هو اللي علطني
_اممم لا واضح فعلا.. لما تيجي بعد المحاضرة بتلت اربع ساعة
_يا دكتور ما هو اللي عطلني.. انا اطالب بتوقيع اشد العقوبات عليه وبالسجن المشدد مدا الحياة
_ايه يا بت الخفة اللي انت فيها دي
_شايف يا دكتور بيقل ادبه ثاني وقدام حضرتك... انت لازم تتصرف وتحط حد للموضوع ده الدكتور وجه كلامه لرؤؤف
_رؤوف مش هنعقل بقا ...هو انت كل يوم والثاني مصيبه شكل يا ابني
_يا ابني هو حضرتك ابوه ولا ايه
رؤوف
_انا ماشي...خلصت كلامك ولا لسه عندك حاجة عايز تقولها اقول لك لو في حاجه عايز تقولها أجلها بعدين سلام
نايا
_ايه قله الذوق دي
رؤوف بصلها بحدة
_لو سمعت صوتك ثاني هازعلك بجد ولا يهمني احد
الدكتور زعق
_رو ؤف ما تنساش نفسك انت واقف قدامي وفي مكتبي.
_لا هو حضرتك الظاهر مشافش بربع رباية .. بس قولي هو حضرتك ابوه ولا ايه
_تقدري تقولي كدا
_ايه يالهوي... اقصد ده متربي احسن تربية .
رؤؤف
_انتي عبيطة... ده منظر ابويا ده اكبر مني ب٦ سنين هيبقى ابويا ازاي
_اه صح فاتتني دي.. بس لو مكانش ابوك يبقى قريبك ما انت شاكلك مالي جيبك منه وواقف ومش مرعوب ولا هامك .. ولا انت خلاص فاقد كدا وقلبك جامد ومفيش حد بيهمك
الدكتور
_للأسف هو كدا فعلا... لما خلاص اتخنقت منه
نايا
_طلقه لو خنقك طلقه يا دكتور
الدكتور ةرؤؤف
_نعم!!
ضحكت نايا بسخافة
_قصدي علقه مين قال طلقه... اللي ماشي عوج لما يأخد على دماغه بيمشي معدول
رؤؤف
_احترمي نفسك يا بت انتي
_بت لما تبتك احترم نفسك انت وازاي تكلمني بالطريقة دي حتى لو مسنود مع أكبر الدكاترة في الجامعة هنا ميهمنيش ... انا مش هسيب حقي مهما كان
الدكتور ابتسم
فقال
_انسة نايا اتفضلي ارجعي على محاضرتك
_سوري يا دكتور انا مش هرجع غير لما تجيبلي حقي منه ماهو مش علشان هو قريب حضرتك انا هتنازل عن حقي وهسكت لاااا ده بعده.
_يا شيخة طب تعالي خديني قلمين احسن
_والله انا مستعدة يمكن تفوق من النفخة الكدابة اللي انت فيها دي.
الدكتور
_ باس انتوا الاتنين.. انسة نايا من فضلك اتفضلي وأنا هتصرف مع رؤؤف واوعدك مش هيضايقك تاني اطمني.
نايا بصت لرؤوف شوية ومشيت
_ حاضر يا دكتور
خرجت ورجعت تاني
_ بس يا دكتور ايه نظام المحاضرة اللي محضرتهاش
_ متقلقيش مش هخصم من درجاتك اطمني
_ طايب الف شكر يا دكتور.
__
بص لرؤؤف
_ اقعد
_ لا أنا ماشي
_ اقعد يا رؤؤف
_ اديني قعدت
_ ايه بقى اللي انت عملته ده
_ دي بنت غبية ولسانها أطول منها نرفزني اعملها ايه
_ وده ينفع يا رؤؤف انت عمرك ما اتعديت على بنت
_قلتلك يا احمد دي بنت مستفزة
_رؤؤف اسلوبك ده مش هينفع أنا لسه قايلك ايه
_أحمد أنا عملت زي ما طلبت ومقلتش لحد انك اخويا حتى معتز صاحبي ميعرفش ده، احترمت رغبتك في اخفاء ده عايز ايه تاني
_ رؤؤف انا قلتلك بلاش تسببلي المشاكل حصل ولا لا
_ حصل ومجتش جنب أي حاجة تخصك.
_ رؤؤف معظم الدكاترة عارفين اني اخوك فبلاش تصغرني قدامهم
_ اعملك ايه بس يا أحمد... اموتلك نفسي علشان ترتاح
_ انا مقلتش كدا أبدا يا رؤؤف أنت عارف انا بحبك قد ايه ويهمني مصلحتك علشان كدا عايزك تخف مشاغبة شوية وتشوف مستقبلك علشان خاطري
رؤوف قال وهو بيخرج
_ مم موعدكش يا احمد
_ مفيش فايدة.
__
نايا رجعت المدرج وهناك
سها
_نايا تعالي عملتي ايه مع دكتور احمد
قعدت نايا
_ ولا حاجة كبري .. المهم انا جعانة وعايزة أفطر
_ عملت حسابك وجبت ساندويتشات
_ فين الكابتشينو
_ اوبا نسيته
_ طيب هروح أجيبه
راحت شوية ورجعت
لقت رؤؤف قاعد جنب سها وبيبتسم لها بسخافة
فقالت
_انت يا اخينا بتعمل ايه هنا
مردش عليها
_ انت انا بكلمك
_ بتكلميني انا
_ اومال مامي .. ايوة انت يا بأف
_ لمي لسامك بدل ما أندمك
_ تاني.. دكتور أحمد لسه مشافش شغله معاك ولا ايه
_ انتي عايز ايه .. اظن اني قاعد في امان الله وانتي اللي جاية تجري شكلي وفي الآخر بتزعلي لو كلمتك
_ انت قاعد في مكاني
_ ليه مكتوب باسمك اتفضلي يا انسة شوفي مكان اقعدي فيه المدرج واسع ولا هي تلازيق وخلاص
_ يا راجل... شوف مين اللي بيتلزق
_ انتي طبعا
_ ده مكاني وصاحبتي اللي انت قاعد جنبها دي عل فكرة
_ يا سلام مكنتش اعرف
_ اديك عرفت .. اتفضل قوم بقا
_ لا انا مبسوط هنا
_ وبعدين بقا.. سها قومي يا بنتي نقعد في مكان تاني .. ده باينه مرار طافح على الصبح
سها
_ طب امسكي ساندويتشك اهو
لسه هتأخده نايا لقت رؤؤف أخده وفتحته واكله
_صدق بالله انت انسان بارد ومعندكش دم
_ ايه ده انتي طلعتي بخيلة اوي.. يعني بتأكلوا كدا قدامي ومش بتعزموا عليا
_ وانت طلعت طفس اوي..ده كان فطاري يا متخلف
_ بسيطة روحي هاتي غيره
_على فكرة انا ماسكة نفسي عنك بالعافية وربنا لو حطيتك في دماغي هتتعب صدقني
_ هاتي اخرك معايا
نايا مسكت الكوباية ودلقتها على التي شيرت بتاعه
وقالت _ بالهنا والشفا... كدا الساندويتش والكابتشبتو كمان
ومشيت وسابته وهي بتضحك
اما رؤؤف فكان مصدوم باللي عملته وكان هيقوم يتهجم عليها
_ اه يا بنت الاية.. وربنا ما انا سايبك
جاله معتز ومسكه
_ استنى يا رؤؤف انت هتعمل ايه متتهورش
_ متهورش ده انا هوريها النجوم في عز الضهر انت مش شايف عملت فيا ايه التي شيرت باظ.. والحمد لله ان الكابتشينو كان بارد شوية كنت اتشويت
ضحك معتز وقال
_معلش ما انت اللي ابتديت باللعب معاها مرتجعش تزعل بقا
_ وربنا ما هسيبها
_ بالله عليك يا رؤؤف عدي اليوم على خير.. تعالى معايا تيشيرت في عربيتي
_لا روح جيبه مش هتحرك من هنا وانا بمنظري ده .. لان وربنا لو قمت مش هسيبها
_لا وعلى ايه خليك انا هروح أجيبه.
__
برا سها ونايا كانوا بيتمشوا
سها_ ايه يا بنتي اللي عملتيه ده انتي مش عارفة دا مبن
_اه عرفت قريب دكتور أحمد غيره
_ايه دا بجد قريبه.. طب يقربله ايه
_ لا انا معرفش صلة القرابة بس كل اللي اعرفه انه قريبه وبس... اومال بتقوليلي مش عارفة دا مين ليه
_اقصد ان ده رؤؤف عز الدين اوسم شاب هنا في الجامعة انتي مشفتيهوش ولا ايه.
_مأخدتش بالي.. اهو زي أي شاب مش هتفرق
_مش هتفرق ازاي... ده عليه كاريزما يخربيته يطير العقل.. ولا جسمه شوفتي عضلانه
_يخربيتك انتي .. انتي مجنونه .ده واحد معتوه ومغرور يا بنتي... وغلس ومش محترم ودمه بارد كمان و ..
_وايه كمان... اغلطي اغلطي حسابك تقل معايا
_نهار اسوح انت جيت هنا ازاي... قصدي انت ايه اللي جابك تاني ورايا.. ايه مكتفتش بدش الكابتشينو
_هردهولك صدقيني مش انا رؤؤف عز اللي اسكت عن حقي.
_طب يا شاطر العب بعيد بقا
رؤؤف كان هيرد عليها
جاله اتصال
_ايوة يا بابا... خير... طيب حاضر أنا جاي حالا... لا حالا مش هتأخر
ضحكت نايا وقالت
_اجري بسرعة شوف ابوك عايز ايه لأحسن يمدك على رجليك
قرب منها رؤؤف وبصلها بحدة
_بلاش تتحديني احسنلك
بصتله بتحدي
_مش بخاف طريقك زراعي يا اسطى
رؤؤف كور قلضة ايده
مسكه معتز
_اهدى يا معتز.. وروح شوف والدك عايز ايه.
جوازة غصب٢
راح لوالده
_خير يا بابا حضرتك طلبتني أنا جيتلك بسرعة زي ما طلبت
_اقعد يا رؤؤف واسمعني هقولك ايه
_سامعك يا بابا
_انت عارف ان الشركة بتاعتي دي كانت شراكة بيني وبين صديق عمري مسعد الزهيري
_اه يا بابا عارف واللي اعرفه كمان انكم فضيتوا الشراكة دي من بدري وكل واحد شاف مصلحته وصفيتم حساباتكم و كل واحد عمل شركته الخاصة
_ده صحيح بس في حاجة
_ايه يا بابا
_أنا وعمك زهيري.. زمان كنا متفقين اني اجوزك لبنته
_نعم اتفاق ايه المنيل ده
_اهو اللي حصل
_طيب انا بتقول زمان ... يعني ده كلام فات عليه سنين وزيه زي أي كلام بنقوله وبنرجع فيه
_لا يا بني ده مش أي كلام .. ده كان اتفاق مكتوب بينا ووعدته اني انفذه
_طب ليه تحط نفسك في المأزق ده.. افرض انا مثلا مش عايز بنته دي وده شيء اكيد لاني مش هاتجوز الا البنت الا قلبي اختارها وبس
_ انت بتقول ايه يا رؤوف باقول لك انا وعدته
_ طيب وانا مالي يا بابا ليه توعد نفسك بحاجه مش بيدك
_ القرار قراري انا في الاول والاخير ودي حياتي انا مش هاسمح لحد يختار حاجه انا مش عايزها
_يعني انت عايز تصغرني قدامه
_ مش قصدي يا بابا العفو لكن ده جواز مش لعبة
_ولو قلت لك ان ده امر يا رؤوف ولازم تنفذه
_ بابا انت عايز تجوزني غصبا عني لوحده انا عمري ما شفتها ولا اعرف حتى اسمها
_ هتشوفها وهتعرف اسمها هتعرف كل حاجه عنها لما تتقابلو
_مش هاقابلها ومش هاتجوزها حضرتك مش هيحصل
قالها وساب والده ومشي
بعد المحاضرات
نايا رجعت البيت وهناك لقيتهم قاعدين على السفره وبيتغدوا فقالت _خيانه خيانه عظمى بتاكله من غيري باباها قال
_ تعالي يا نايا معلش يا قلبي بابا انا كنت راجع جعان اوي
_بالهناء والشفاء على قلبك يا بابا لكن الطفس ابنك ده ما يستنانيش ليه انتم عارفين اني ما باحبش اكل لوحدي مهما حصل
عادل قال
_نانو اقعدي ما تكبريش المواضيع احنا لسه قاعدين على السفره ماقمناش يعني.
_ماشي يا رخم بس المره الجايه لو مستنيتنيش انت حر
_ مفتريه وتعمليها اقعدي اقعدي
_ انا كنت عايزه اتكلم معاكي بعد الغداء
_اكيد طبعا يا بابا حاضر
بعد الاكل كلهم اتجمعوا مامتها
جابت الحلو بداوا ياكلوا مسعد والد نايا قال
_نايا انا في حاجه مهمه لازم اقولها لك
_خير يا بابي
_طبعا انتي عارفه اني زمان في شبابي كانت الشركه بتاعتي انا وعمك المهدي شركة بينا
_ اه عارفه ماما حكيت لي عنه كتير وان حضرتك بتحبه وبتعزه اوي.
_ده صحيح.. والحقيقة من زمان اوي كنت وعدته اني اجوزك لابنه واتفقنا على كدا
_ايه ازاي يا بابا ... ازاي توعده وعد زي ده .. افرض انا وابنه متفقناش مع بعض او مرتحناش لبعض
_حبيبتي لما فاتحنى تاني انا فكرت في الموضوع وانتي معاكي حق..لكن مش هينفع اقوله لا بعد ما عشمته طول السنين دي طبعا مش هقدر ازعل صاحبي
_والحل ايه
_الحل يا نونا انك تقعدي مع ابنه وتتكلمي معاه ممكن ترتاحي ليه..
_ولو مرتاحتش؟
_سيبيها بظروفها ان شاء الله ترتاحوا لبعض أنا متفائل .. أكيد اولاد عمك عز المهدي ميتخيروش عنه ادب واخلاق... ها قلتي ايه
_ممم اوك نجرب
عادل قال
_تجربي ايه هي مسكرا جديدة هتجربيها
_الله .. مش لازم اجرب العريس ده يمكن ميعجبنيش
_ايوة يعني تجربيه ازاي... اوعي يا نونا
_عيب عليك ده انا نونا... لازم اطلع عليه الجنان كله وأشوف هل عنده مناعة ولا لا
والدها
_بتقولي حاجة يا نونا
_لا يا بابي ... انا اصلا مكنتش حابة ارتبط دلوقتي
عادل
_اطمني انتي اصلا مش وش ارتباط دي بتقول هتجربه
_يا بني قول يا باسط
__
الصبح
_ نانو قومي يا نانو الساعة بقت عشرة يا نايا
_ايييه عشرة يالهوتي اتأخرت على المحاضرة يا مامي قلتلك صحيني بدري
ضحكت الام
_اهو دلوقتي عرفت اصحيكي ازاي ... الساعة يا حبيبتي لسه ٨ يادوب تقومي وتظبني نفسك علشان تنزلي جامعتك
قعدت على طرف السرير
_ ياماما وقعتي قلبي انا قلت اتأخرت بجد
_لا ماهو انا مش هسيبك زي امبارح تخرجي مستعجلة زي الهبلة بتخبطي في الناس
_ايه دا يا مامي انتي عرفتي ازاي
_ليه هو انا تايهة عنك يا روح مامي
_اا احم.
_اه من حق... ترجعي على البيت بعد الجامعة علطول علشان تجهزي نفسك علشان جيلنا ضيوف
_ضيوف مين يا مامي
_ايه يا نانو انتي لحقتي نسيتي... ده صاحب باباكي وابنه علشان تتعرفوا
على بعض
_ايه دا دول مستعجلين شكلهم كدا
_وايه يعني يا حبيبتي خلينا نفرح بيكي
_قولي انكم عايزين تخلصوا مني يا مامتي بس بردو هفضل قاعدة على قلبكم
_يا حبيبتي ده يوم المنى لما اشوفك بتتزفي لعريسك يا روح مامي.
_مم مش متفائلة.
__
في الجامعة
رؤووف كان ماشي مع معتز فجه العامل وقال
_حضرتك رؤوف
_ايوة خير
_دكتور أحمد منتظرك في مكتبه
رد رؤؤف بضيق
_طيب ماشي رايحله
معتز
_في ايه يا رؤؤف شكلك مش طبيعي النهاردة... انت عملت حاجة علشان دكتور احمد يستدعيك تاني النهاردة
_العن يا ابني العن
_في ايه انت كدا قلقتني...
_ لما انزل من عند دكتور احمد هقولك
__
_ايوة يا احمد ... لو كنت عايز تعيد الكلام اللي قاله ابوك تاني فوفره لنفسك
_رؤؤف انت شايف تصرفك اللي عملته مع بابا تصرف صح.. ينفع تسيبه وتمشي بقلة الذوق دي
_اسمع يا احمد انا مش هتجوز بالطريقة دي ابدا استحالة ده يحصل
_رؤؤف بابا زعلان ومتضايق اوي من وقتها... مش عايز يزعل صاحبه
_اه يزعلني انا عادي
_اسمع انا عندي فكرة... وافق بابا على اللي قال عليه .. وروح معاه يمكن اصلا الرفض يكون من عندهم يمكن البنت نفسها متوافقش عليك
_نعم مين دي اللي متوافقش عليا.. دي البنات كلها بتجري ورايا وتتمنى اني ابصلهم بس
_اهو غرورك ده اللي هيجيبك لورا في يوم من الأيام...المهم رؤؤف بالله عليك متزعلش بابا وروح معاه اليوم ده وممكن كمان لو صمم تتخطبوا وبعد كدا لو مرتحتش ممكن تنفصلوا بهدوء.
_وتفتكر بابا هيوافق على ده، ده بيقول متفق معاه من زمان وهو لسه فيه كدا
_يا ابني ده كلام.. وانت عارف بابا عمره ما غصبك على حاجة.
_انت شايف كدا ؟
_طبعا... ريح بابا يا رؤوف.. ها اتصل بيه ابشره
_مم ماشي ياسيدي
_طيب اجهز بقا واعمل حسابك هنروحلهم الساعة ٨ بالليل
_طيب قولي مين عروسة الغبرة دي... اعمل سيرش عنها بدل ما اروح وانا على عمايا كدا... مش يمكن تكون حولا ولا طرشا؟
ضحك احمد_ اطمن هي زي القمر
_يا راجل اكيد قمر بالستر وشكلك كدا انت وابوك هتلبسوني في الحيط
__
رجع رؤؤف لصاحبه معتز وقعدوا في الكافيه
_ايه بقا احكيلي في ايه
_مفيش ابويا عايز يجوزني يا سيدي لبنت صاحبه
_عظيم عظيم
_ايه العظيم في كدا
_ايه يا بني انت مش عايز تحب وتتحب
_احب مرة واحدة ده انا مشفتش العروسة المصونة قبل كدا ...ولا حتى راضين يقولولي اسمها.. وشكلي كدا هتدبس تدبيسة سودا ... اصل مفيش واحد يتفق مع صاحبه انه يجوزه بنته الا لو كانت البنت دي معيوبة اسمع مني
_اوبا تبقى انت كدا لبست وش يا معلم..
_مين دا لا يمكن يحصل اما هروح بس النهاردة علشان خاطر ابويا وبس
_تمام هتروح امتا.. علشان اكلمك اعرف الاخبار اول بأول
_يا باي على فضولك ده
_اه طبعا لازم اعرف كل حاجة
_حيث كدا بقا خد الكبيرة بقا... بس اخفظ السر يلا لأحمد يعلقني
_أحمد مين
_دكتور احمد يا سيدي يبقي اخويا الكبير
_معقول
_مش عايز حد يعرف ياسيدي علشان ميقولوش حاجة
_هو في كدا
_مش فاهم يا بني عقليات
_اه اتاريك امبارح مكنتش خايف لما اتأخرنا
_عيب عليك انا يبنى بتأخر في كل المحاضرات عادي ميهمنيش حد
__
جه الوقت للمعاد المتفق عليه وجهزت نايا ولبست دريس بسيط زي ما بتلبس وهي نازلة الجامعة
مامتها قالت
_نانو لما بابا ينادي عليكي هتدخلي بالصينية دي اوك
_لا طبعا يا مامي الموضة دي قديمة اوي... انا هدخل عادي كدا
_يا بنتي ده ترحيب بالضيوف مش اكتر
_يووه يا مامي اخاف تقع مني الصينيه لا قدميها انتي... اقولك انا مش هدخل الا لما ما تقدموا الساقع والحلو ويتكلموا ابقا ادخل في الاخر كدا اتفرج واخرج
_يا سلام
_عدي اليوم يا مامي بليز اليوم ده اصلا تقيل اوي على قلبي
جه رؤؤف وعيلته وقعدوا مع مسعد وعادل
وبعد شوية جت مامة نايا وقدمت العصير ولما كان رؤؤف بيشرب العصير
عادل راح جاب اخته نايا تقعد معاهم
رؤؤف مهتمش ولا بص حتى ولا نايا كمان بصت عليه
عز الدين
_اهلا وسهلا بعروستنا ايه الجمال ده يا مسعد لا لا انت مخبي القمر ده مننا فين من زمان
نايا_ثانكس انكل..
رؤؤف حس انه سمع الصوت ده قبل كدا فرفع وشه وهو بيشرب العصير فأول ما شاف نايا... تف العصير من بوءه وشرق
مامة نايا
_يا حبيبي الف سلامة عليك .. بسم الله
نايا رفعت وشها ناحيته واول ما شافته برقت وقامت وقفت وقالت
_لا مش معقول انت
مسعد
_حبيبتي انتوا تعرفوا بعض
عز الدين
_انتوا زمايل يا رؤؤف في الجامعة
رؤؤف كان على اخره
_اه يا بابا... هي معايا في نفس الكلية
عز
_شوفت الصدف الجميلة يا عز... يلا نسيبهم يقعدوا مع بعض شوية
نايا
_لاا تسيبونا ايه...
وبعدين قالت ف نفسها
_ده انا ممكن اصور قتيل دلوقتي مبقاش الا البأف ده اللي اتجوزه
مسعد
_حبيبتي احنا قاعدين قصادكم في الفراندا ... دقايق بس علشان تتكلموا براحتكم
اول ما مشيوا نايا قالت
_خد بعضك يا اخينا انت وامشي من هنا من سكات
_لا اوعي تفكري اني جاي هنا وانا هموت عليكي..ده انا اتدبست في الليلة دي تدبيسة سودا ..مبقاش الا انتي علشان ارتبط بيها
_والله طب كويس... زق عجلك وهوينا يلا... بس بقولك سيب الجاتوه لانه شكله من الحلو وعايزة ادوقه
_يا طفسه .. اطفحيه بالسم الهاري
_بقولك ايه رخامة انا مش عايزة
_ششس انتي لسه هترغي.. اسمعي.. اول ما نمشي وباباكي يسألك عن رأيك قولي انك مش موافقة...
_ يا سلام انت هتدبسني انا ليه متقول انت مش موافق هتحطها في وش بابا ليه ويخسر صاحبه
_ يا عبيطة افهمي مش حلوة مننا لما ارفض بعد ما جيت البيت وشوفتك دي مش حلوة في حقك انتي
_لا اطمن انا ميهمنيش رأيك اصلا علشان انا أصلا مش معتبراك حد من اساسه
_بقى كدا.. طب استلقي وعدك مني يا زفتة
_اهو انت اللي زفت
_بت انتي وربنا لو طولتي لسانك مش تتردد المرة دي واقطعهولك.
الشباك كان هيحتد بينهم... دخل ابهاتهم
وعز قال
_ها يا ولاد شكلكم متفاهمين جدا ماشاء الله ... انا بقول نقرأ الفاتحة وبكرا نجيب الشبكة طالما الاولاد يعرفوا بعض .. ايه رايك يا مسعد
_والله انا معنديش مانع طالما الولاد مرتاحين لبعض
الاتنين نايا ورؤؤف ف نفس واحد
_لاااا
عز
_لا إيه يا ولاد... عايزين ننزل نلبس الشبكة النهاردة مفيش مشكلة... انا عامل حسابي وجايب معايا طقم الماظ يارب زوقي يعجبك ولو مش عجبك انتي ممكن تنزلي انتي ورؤؤف تبدليه في اي وقت
رؤؤف مكانش عارف يرد يقول ايه علشان ميحرجش والده قدام الناس
وقال في نفسه
_ايه التدبيسة السودا دي يا بابا منك لله يا أحمد انت اللي اقنعتني اجي
نايا كانت لسه هتفتح بوءها ترفض
لقت عز الدين بيقول
_يلا يا رؤؤف تعالى لبس خطيبتك شبكتها
نايا ف نفسها
_طب اعمل ايه انا دلوقتي... ليه كدا يا انكل شكلك طيب اوي بعكس ابنك ومش هعرف ازعلك.. بس انت كدا جيت عليا ابنك ده ميتعاشرش وربنا ده انسان غبي وبأف كمان
ام نايا زغرطت وعز قرب من نايا وقال
_مبرووك يا حبيبتي.. متعرفيش انا مبسوط قد ايه، ربنا يسعدكم يارب... يلا يا رؤؤف تعالى
روؤؤف فضل متجبس مكانه شوية وبعد كدا اتحرك وقرب من نايا وقال بصوت تسمعه هي بس
_هاتي ايدك يانيلة اخلصي.
_لا بقولك ايه احنا هبتدبها من اولها كدا مش لاعبة... انا اصلا مش موافقة بس مردتش ازعل انكل الزوق والعسل ده
_نتكلم في الموضوع ده بعدين هاتي ايدك الكل بيبص عليها
_اهي بس براحة عليها ها لاني عارفاك دبش مش بتراعي انك بتتعامل مع بسكوتاية
_انتي بسكوتاية مين ضحك عليكي وقالك كدا
_ انا عارفة نفسي كويس على فكرة... ايه دا انت هتعمل ايه
_ايه هلبسك الكوليه
_لااا شكرا هلبسه انا
_يا بنتي اقفي هلبسهولك الناس تقول عليا ايه
_ناس مين انت هتنسى نفسك.. هات هلبسه انا
قال بعند
_طب ايه رايك ان محدش ملبسه ليكي غيري
_مش هيحصل
_عمي.. ممكن ألبسها بقية الطقم
_اتفضل يا بني
_اظن كدا معندكيش حجة
_لا يا بابي هلبسه انا من فضلك.
ضحك عز الدين وقال
_الظاهر انك مربي بنتك كويس يا مسعد البنت محروجة من ان رؤؤف يلبسلها الكوليه ... طب تمسحي انا اللي البسهولك.
_تمام مفيش مشكلة ميرسي يا انكل
رؤؤف اتغاظ منها وهمسلها بعد ما قعدوا جنب بعض
_بقا كدا
_دا اللي عندي وان كان عاجبك
_طب اسمعي ياختي.. هقابلك في الجامعة بكرة هقولك على موضوع مهم مفهوم!
_لا طبعا مش مفهوم .. هقابلك انا على اساس ايه انت مين اصلا
_بلاش تستفزيني انا غضبي وحش وانتي لسه مجرتهوش
_مش بخاف على فكرة.
بعد شوية انتهت الزيارة والكل رجع اوضته
نايا رجعت وكانت بتتكلم ف الفون
_ ها يا نايا ايه الاخبار
_بقا كدا يا دكتور ده مقلب تعمله فيا انا
_ايه يا بنتي مش ده رؤؤف اللي كنتي بتموتي فيه وهو بيموت فيكي وانتوا صغيرين
_ ده كان زمان ياكتور.. رؤؤف شافني ومقدرش يتعرف عليا
_جايز لانه مكانش متوقع انك انتي .. لانه ميعرفش ان البنت الصغيرة اللي حبها واتعلق بيها لما شافها في المستشفى لما عملتم الحاظثة سوا وقعدتوا اسبوع مع بعض... هي نفسها بنت انكل مسعد صاحب ابوه
_اه انا فعلا مكنتش اعرف ان رؤؤف اخو حضرتك وانكم اولاد انكل عز
_وها هتعملي ايه
_مش عارفة يا دكتور .. بس هعمله ايه رؤؤف مقدرش يتعرف عليا ولا حتى يفتكرني..
_نايا بلاش تظلميه انتي كمان مفتكرتيهوش الا لما لمحتلك انا
_لا يا دكتور..انا يوم خناقة الجامعة انا مدققتش في ملامحه اصلا لاني من عادتي بغض بصري وكدا علشان كدا مأخدتش بالي منه... انما هو النهاردة كان المفروض يفتكرني .. الرؤية الشرعية المفروض انه هيبصلي يشوفني
_ده لو كان جاي بمزاجه... رؤؤف جاي غصب لانه مش موافق على جواز بالشكل ده
_طب والحل ايه.. انا استحالة ابين له حاجة لو متعرفش عليا لوحده وشافني بقلبه يبقى خلاص ميلزمتيش يا دكتور
_بتتكلمي بجد وحبك ليه
_مش هيتغير يا دكتور ... انا بحبه ومش هحب غيره.. لكن مش هقبل ابدا ان رؤؤف ميتعرفش عليا حتى لو اتغيرت ملامحي عن ايام زمان مش مبرر أبدا
وفجأة لقت رسالة على الفون مكتوب فيها
_اوعي تكوني مفكرة اني مقدرتش اتعرف على حبيبة قلبي.. انا قدرت اتعرف عليكي من اول لحظة شوفتك فيها وعلشان كدا جريت وراكي اقولك... لكن لما حسيت انك معرفتيش لسه تتعرفي عليا قلت افضل اعاند فيكي لحد ما تفتكريني.. اما موضوع الخطوبة دا فانا سمعت أحمد وهو بيكلمك بالصدفة علشان كدا قلت اكمل المسرحية معاكم للآخر...بس بصراحة مقدرتش... انا مش مصدق نفسي أخيرا اتقابلنا تاني يا كل عمري
خلصت قراءة لقته رن عليها
_ مش هسامحك على سفرك وبعادك عني الفترة دي كلها ... نايا اتكلمي ..
_ انا مش مصدقة نفسي يا رؤؤف اخيرا شفنا بعض تانب
_ بحبك
_ اتلم بدل ما اجي ابهدلك
_ حاضر هتلم لحد بكرة بس اول ما النهار يطلع هجيب المأذون وهنطلك نكتب الكتاب
_مجنون
_مجنون بحبك
جميل يا سمسم ❤️💐🌹
ردحذفحلوة الحاجات السريعة دى بحبها أو تنول الرواية كلها ع بعض 😍😍
روعه جميله جدا جدا ابدعتى حبيبتي 😍😍😍
ردحذفجميل يا سيمو وكوميدى عسل جدا
ردحذفاي الجمال دة حبيبتي تسلم ايدك
ردحذفحلو اوي توم وجيري
ردحذفبس بيحبوا بعض