اسكربت
للكاتبة أسماء عبد الهادي
انا ورمضان وجدتي
في بيت جميل ولطيف عايش فيه اسرة صغيرة مكونة من اب وام و٣ اطفال
وهما استاذ عادل ومراته أمل
والاطفال الكبير عمر ١٥ سنة
وسما ١٢
والصغير على ٥ سنين
وفي الدور اللي تحتيهم عايش والد عادل الحج عيسى ووالدته الحجة سامية
__
وفي يوم العيلة كلها كانت متجمعة
سما كانت قاعدة جنب جدها
وعمر قاعد جنب جدته
اما على فكان قاعد بين مامته وباباه
سما قالت
_صحيح يا جدو
هو رمضان قرب يجي مش كدا
عمر قبل ما جدو يرد
_ايوة يا بنتي خلاص شعبان قرب يخلص ورمضان خلاص جاي
سما
_هاااي رمضان جاي رمضان جاااي هاااي انا بحب رمضان اوي
عمر
_بابا انا كنت عايز فلوس بعد اذن حضرتك علشان نجيب زينة لرمضان زي كل سنة
سما
_ابوة يا بابا ارجوك وافق علشان خاطري
عادل
_اكيد طبعا يا ولاد هنجيب زينة رمضان ونفرح كلنا ربنا يجعلنا فيه من اهل الخير يارب
عمر
_طب هات دلوقتي انزل اشتري من عمو محسن صاحب المكتبة اللي جنبنا سما
_وأنا هروح معاه اختار يا بابا
امل
_ا ولاد الصباح رباح لسه بدري مستعجلين ع ايه
عمر
_لا يا ماما ارجوكي وافقي ع فكرة احنا متأخرين الناس كلها بدأت ف الزينة واستقبال رمضان واحنا اللي لسه محلك سر
الجد
_خلاص يا عادل سيبهم يعملوا اللي هما عايزينه مش هتقدروا ع زنهم وكل سنة وانتم طبيبين جميعا يارب
الجدة
_اللهم آمين يارب العالمين
عادل خرج فلوس من جيبه
_ماشي انزلوا بس متتأخروش وتطلعوا عل طول
سما
_هاااي واخيرا هنجيب زينة رمضان علشان نستقبله بيها وبيتنا يكون جميل
عادل هز دماغه
_مفيش فايدة العيال هتفضل عيال
الجدة
_سيبهم يفرحوا يا ابني ربنا يجعل اياهم كلها فرح وسعادة دا رمضان مش بيجي غير مرة واحدة ف السنة وفرحته بالدنيا كلها
على كان متابع اللي بيحصل ومن كلام الكل كان متشوق انه يشوف رمضان اللي الكل بيحكي عنه وعايز يستقبله
فقام من مكانه ودخل اوضته اللي هي مشتركة بينه وبين اخوه عمر
_اخواتي عمر وسما بيستعدوا علشان يستقبلوا رمضان وهيزينوا البيت علشان لما يجي رمضان بيتنا يكون جميل
انا كمان لما يجي رمضان لازم اكون جميل علشان عمو رمضان يفرح بيا ويقول عليا ولد شطور زي مس عليا ف الكيجي دايما تقول عليا شطور
فتح الدولاب واختار طعمين
_ممم يا ترى البس لعمو رمضان أي طقم فيهم دا ولا دا ممم محتار اوي انا بحبهم الاتنين
مم خلاص هروح اسأل ماما
خرج لأمه
_ماما ساعديني ف الاختيار .. اختار الطقم دا ولا دا
الام باستغراب
_ليه يا على انت عايز تعمل ايه
_يا ماما اختاري معايا بس
_تمام هختار الجينز الازرق دا
_مم اختيار ممتاز يا ماما.. ماشي شكرا يا ماما
وجه يتحرك علشان يرجع اوضته
امه قالت
_طب قولي عايز تعمل ايه
_بعدين بعدين يا ماما هتعرفي
امل
_غريبة بيفكر في ايه
الجدة
_هما دايما الاطفال كدا حاجات بتطلع ف دماغهم وبيحبوا ينفذوها مع نفسهم
وشوية وعمر وسما طلعوا بأحبال النور والشرايط والزينة
فأمل قالت
_خلاص عملتوا اللي فى دماغكم مفيش تعليق زينة النهاردة لان دا معاد النوم
عمر وسما
_لااا يا ماما ارجوكي
_عندكم مدرسة الصبح ولازم تناموا بدري.. ولو عملتوهم دلوقتي هتكون كل حاجة متكروتة ومش حلوة بكرة ان شاء الله لما ترجعوا من المدرسة نعلق الزينة سوا
سما وعمر
_ماشي يا ماما
وتاني يوم وبعد المدرسة
عمر وسما كانوا متحمسين انهم يعلقوا الزينة
وساعدهم ابوهم عادل في تعليقها
ولما خلصوا
_هاي هاي علقنا الزينة يا سلام ... فاضل بس يا بابا الزينة اللي قدام البيت
عادل بتعب _لسه تاني
سما
_معلش يا بابا يلا تعالى
امل للجدة
_النهاردة الرؤية مش كدا يا ماما
_ايوة يا حبيبتي المفتى هيقولنا اذا كان بكرة رمضان ولا لسه بكرة المتمم لشهر شعبان حسب رؤية الهلال
_اللهم أهله علينا باليمن والبركات يارب
وهنا جه على الصغير وهو لابس الطقم اللي مامته اختارته امبارح
_الله البيت بقا جميل لاستقبال رمضان وانا كمان استعديت علشان استقبل عمو رمضان بس محتاج منك مساعدة صغيرة يا ماما ممكن تركبي زارير الجاكيت لاني مش عارف بحاول فيها من زمان اوي لكن معرفتش
امل وقفت باندهاش من كلام على
أما الجدة سامية فضحت
_تستقبل عمو رمضان مين يا علي
_عمو رمضان يا تيتة اللي جاي عندنا اومال عملتم الزينة دي كلها ليه وعمر وسما طول الليل بيحكوا عنه .. هو عمو رمضان دا شكله عامل ازاي طويل ولا قصير تخين ولا رفيع ابيض ولا أسمر... ولا اقولك يا تيتة مش هتفرق كلها خلقة ربنا سبحانه وتعالى واكيد لما اشوفه هحبه زي ما اخواتي بيحبوه
امل لما فهمت ضحكت هيا كمان
اما سامية فشالت حفيدها وقعدته على رجلها وقالت
_يا حبيبي رمضان دا مش شخص زينا
_اومال ايه كائن فضائي زي سوبر مان؟
ضحك
_ ولا دا كمان
_طب ايه يا تية
_رمضان دا شهر يا على
_ زي ايام الاسبوع كدا السبت والحد والاثنين
_ايوة بالظبط وشهر رمضان بيكون ٣٠ يوم
_ايه دا يعني انا لبست واتشيكت علشان رمضان اللي هو يوم ؟ .. طب ليه اخواتي بيقولوا انهم بيستقبلوا رمضان
_من عاداتنا وتقاليدنا يا على ان لما رمضان يجي بنعلق الزينة المبهجة اللي بتفرح الأطفال وبتحمسهم للصيامه
_طب ليه يا تيتة احنا بنفرح ان رمضان جاي اشمعنا هو بالذات طالما انه طلع يوم زي أي يوم
هنا كان عادل والاولاد خلصوا تعليق الزينة قدام البيت
فقالت الجدة
_تعالوا يا ولاد اقعدوا وهقولكم ليه شهر رمضان ربنا بيفضله عن بقيت شهور السنة
الكل قعد باهتمام يسمع حتى امل وعادل
_اولا لانه الشهر اللي نزل فيه القران ربنا قال شهر رمضان الذي انزل فيه القران هدى للناس وبينات من الهدى والفرقان وكمان لان الشهر ده ربنا فرض علينا فيه الصيام
رسول الله صلى الله عليه وسلم قال الله عز وجل قال " كل عمل ابن ادم له الا الصوم فانه لي وانا اجزي به"
عمر
_ يعني ايه يا تيته الصوم لي وانا اجزي به
_ يعني الصوم ما بيكونش زي غيره من العبادات الصوم العباده الوحيده اللي ممكن نعملها وما حدش يقدر يطلع عليها غير ربنا علشان كده ربنا اضافها لنفسه وقال فانه لي لاننا بنعمل العمل ده لله وبس وهو اللي هيحاسبنا عليه
سما
_تمام يا تيتا كملي وايه كمان ليه شهر رمضان بالذات
_علشان رمضان فيه ليله خير من الف ليله وهي ليله القدر اللي الدعاء فيها بيكون مستجاب وعلشان في شهر رمضان بتفتح ابواب الجنه وتغلق ابواب النار وعلشان فيه الشياطين بتسلسل
وكمان من صام رمضان ايمان واحتسابا غفر له ما تقدم من ذنبه وكمان الرسول صلى الله عليه وسلم قال لله في كل ليله من هذا الشهر عتقاء من النار وكمان صلى الله عليه وسلم قال للصائم دعوة لا ترد حتى يفطر
عمر
_ طيب ليه يا تيته ربنا أمرنا بالصيام اصلا
_ احنا لما بنصوم بنصوم لان ده امر ربنا ...ربنا بيختبر هل لما يطلب مننا حاجه هنعملها ولا لا هل هنصبر على تعبها ولا هنقول لا مش قادرين نكمل... وكمان الصيام بيخلينا نحس بالفقراء والمحتاجين عمرنا ما هنحس بده الا لو حسينا بالجوع بالعطش زيهم فبالتالي بنعطف عليهم وبنساعدهم ونحمد ربنا على النعم اللي احنا فيها وكمان الصوم بيشفع لاهله يوم القيامه وليه تاثير عجيب في حفظ الجوارح وبيعنا على ترك الشهوات
عادل اتدخل في الحوار واضاف
_ في رمضان يا ولاد الناس كلها بتتجمع وبنتعلم الوحده وحب الخير
في رمضان الناس كلها بتكون صايمه مع بعض بيفطروا مع بعض بيتجمعوا مع بعض ويصلوا التراويح فبتنشط فينا نروح المشاركه وحب الغير وفي رمضان بتتجمع كل الطاعات في شهر واحد الصلاه والصيام والزكاة وتلاوة القران والذكر والصدقه والعمره واطعام المساكين يعني الاعمال الكويسه كلها بتتجمع في الشهر دا علشان كده شهر رمضان ده له فضل عظيم عن بقيه شهور السنه كلها
سما وعمر
_احنا بنحب شهر رمضان اوي يارب يكون بكرة يارب
على
_وانا كمان بحب عمو رمضان قصدي شهر رمضان
فكلهم ضحكوا
وبالليل الكل اتجمع علشان يسمع دار الافتاء عةالشاشة
_تعلن دار الافتاء المصريه ان اليوم هو المتمم لشهر شعبان وغدا اول ايام شهر رمضان المبارك وكل عام والامة الاسلامية بخير
علت اصوات الفرحة في كل مكان
_هااااااي رمضان جه رمضااان جه هااااي
وقف الجد ورفع ايده وقال
_اللهم أهله علينا بالأمن والإيمان، والسلامة والإسلام، والعافية المجللة والرزق الواسع، ودفع الاسقام، اللهم ارزقنا صيامه وقيامه وتلاوة القرآن فيه، وسلمه لنا، وتسلمه منا وسلمنا فيه يا رب العالمين
الكل آمن ع دعاءك
_آمين يارب العالمين
الجدة
_كل سنة وانتوا طبيبن يا حبايبي
على
_كدا رمضان جه يا تيتة
_اه يا حبيبي جه رمضان اخيرا اللي اشتقناله بقالنا كتير وروحنا ارتقبت لبلوغه الحمد لله الحمد لله ربنا يجعلنا فيه من المقبولين