شوق بارت ٥٤

 حصريا البارت ال٥٤ من رواية شوق 
للكاتبة أسماء عبد الهادي

شوق بارت 

٥٤

#أسماء_عبد_الهادي

____

فاق من اغماءته فلم يجد قدمه موجودة مكانها... مكانها خاويا موحشا ، فلم يستطع تقبل الأمر فأخذ يصرخ ويصيح بكل قوته 

_ لااا رجلي رجلي فين عملتوا ف رجلي ايه 

حاولت الممرضات تهدئته وكذلك دلفت اليه شوق واخواتها 

لتقول الممرضة 

_ يا غريب بيه حمدا لله على سلامة حضرتك ممكن تهدا واحنا نفهمك 

 أجابها وهو يصرخ بها 

_تفهموني ايه... عملتوا في رجلي ايه رجلي كانت موجودة وانا جاي ع هنا أنا كنت فايق وشايفها قبل ما اغيب عن الوعي .. فين رجلي والا هطربق المستشفى على اللي فيها انا هدخلكم كلكم السجن 

_ يا غريب بيه حضرتك عندك القدم السكري وكان لازم بتر لرجلك علشان متضرش بقيت الانسجة المحيطة وكمان اخدنا اذن اولاد حضرتك

_ انا مسمحتش بدا.. فين الدكتور هاتولي الدكتور حالا 

لتهتف شوق 

_ اهدى يا غريب بيه متعملش في نفسك اكده علشان صحتك 

ليهدر بها غريب بغضب شديد 

_ انتي بتعملي ايه هنا امشي اطلعي براااا.. برااا 

أخذت شوق نفسا عميقا وصمتت ليتولى عساف الأمر هو وأمير

عساف

_ بابا من فضلك إهدى علشان ضغطك كدا ممكن يعلى ويأثر على العملية 

امسكه غريب من ملابسه

_ ازاي سبتهم يقطعوا رجل ابوك ولا سمعت كلامها وحققتوا انتقامكم فيا ماهي خلاص قدرت تعملكم غسيل مخ وبقيتوا تمشوا ورا كلامها زي المغيبين 

اغمضت شوق اعينها 

_والله يا بوي انت اللي مغيب... امتا بقا تفوق ولا حول ولا قوة الا بالله 

ليقول عساف 

_ يا بابا دا كلام الدكتور علشان ننقذ حضرتك

_ اغبيا.. كلكم اغبيا بتتصرفوا من نفسكم أنا صاحب الشأن أنا اللي أقول تعملوا ايه ومتعملوش ايه .. فاهمين.. هعاقبكم كلكم .. واولكم هيا مش هسيبها هندمها ندم عمرها 

قالها وظل يبكي تحسرا على رجله المبتورة

ليدلف الطبيب وما ان رآه ع تلك الحالة 

_ حضروا حقنة المهدىء بسرعة 

طالعته شوق وهو يغفى شيئا فشيئا بينما يشير بيده تارة لرجله بحسرة ولها بغضب وانتقام تارة اخرى 

لتدمع أعينها حزنا 

فيضع أمير يده على كتفها 

_ متزعليش يا شوق  انتي شايفة قد ايه الصدمة كانت كبيرة عليه وطايح في الكل ازاي

هتفت شوق بأسى

_ اتحملت أذاه في صحته مهتحملهوش في تعبه يا أمير... اني منيش زعلانه منيه قد ماني زعلانه عليه.. ربنا يشفيه 

___

رتب حقيبة سفره وحملها ومن ثم توجه إلى حيث تجلس أمه مع شوق التي اتت لتطمئن على يوسف ومن ثم تعود لأبيها ف المشفى 

_ السلام عليكم 

الجميع 

_ وعليكم السلام ورحمة الله وبركاته

نظر قاسم لابنه 

_ يوسف يا تعالى 

اقترب يوسف من أبيه بحذر 

لتزداد ضربات قلب شوق وهي تراقب ما يحدث بترقب

ليقول قاسم وهو يخرج لعبة اخفاها وراء ظهره 

_ الهدية دي ليك 

_ الله ليا أنا يا بابا 

_ اه ليك يا يوسف وهجيبلك زيها مرة كل شهر كمان بس بشرط أسمع عنك أخبار حلوة من شوق وتيتة جلنار 

تبدلت تقاسيم وجه يوسف من الابتسامة للعبوس 

_ ليه يا بابا انت هتسيبني ورايح فين 

انخفض قاسم وجثا على ركبتيه وقال بأعين دامعة نادمة

_ سامحني يا يوسف انا عمري ما كنت اب كويس ليك ولا هكون.. علشان كدا فكرت ان أفضل حل ليك فعلا زي ما ماما قالت انك تعيش مع شوق 

 اغرورقت أعين يوسف

_يعني انت هتسيبني يا بابا.. هتفضل كدا مش بتحبني 

عانق قاسم وجه ابنه بيده وقال

_لا يا يويف انا بحبك وبحبك جدا كمان انت ابني الوحيد اللي طلعت بيه من الدنيا لكن اللي اكتشفته اني انسان مشاعري باردة ولو فضلت معايا بالشكل دا هتتعب لأنك هتكون منتظرة مني حاجات مش بايدي اعملها... لكن كل اللي انا عايزك تعرفه اني بحبك يا يوسف.. بحبك علشان انت ابني.. فاهم يعني ايه ابني

_صحيح بتحبني يا بابا 

_بحبك اوي يا يوسف والله 

قالها وهو يعانقه بحرارة 

لتهتف شوق ساخرة 

_ماهو انت قدرت تديله اهو اللي هو عايزه صعبة دي يا قاسم بيه.. انت الظاهر بتتحجج علشان تهرب من مسؤليتك تجاة ابنك الظاهر الشغل عنديك اهم من اي حاجة 

نهض مكانه معتدلا في وقفته وما زال ممسكا بيد ابنه_ جايز معظم كلامك صح جايز انا فعلا بهتم بشغلي جدا وشغلي عندي اولى اولوياتي لكني مش بتهرب يا شوق.. انا من بعد اختفاء يوسف  وبعد  ما جربت احساس اني ممكن افقده في اي لحظة.. مقدرتش اتحمل دا.. عرفت وقتها اني فعلا بحب ابني بحب يوسف ومتعلق بيه كمان.. بس علشان متعود من يوم ما اتولد اني اكون بعيد براقبه بس بدون ما اتدخل في اي حاجة تخصه 

_ مش يمكن جه الوقت انك تقرب ... انك تكون جزء لا يتجزأ من حياته انك ترتب اولوياتك ويكون يوسف في قمة الهرم؟؟ 

_اكيد هيجي الوقت لدا ياشوق انا واثق وخاصة بعد ما اتغيرت مشاعري اتجاهه بالشكل الملحوظ دا.. لكن دلوقتي كل اللي يهمني ابني ونفسيته ودراسته ودا أنا متأكد ان محدش هيقدر عليهم غيرك.. الولد معاكي بيكون في اقصى حالاته مرح واقبال ع الحياة معاكي بيسمع نصايح وحكم ودروس انا نفسي محتاج اتعلمها.. شوق انتي مدرسة بكل ما تحمله الكلمة من معنى ويشرفني ان ابني بيتربى تحت ايدك... زمان كانوا بيرسلوا اولادهم للبادية علشان يتعلموا الشجاعة وقوة البنيان وفصحاة اللسان.. انا هعمل دا مع يوسف هسيبه معاكي لكن مش هتخلى عنه.... بالعكس هكون متابعه لحظة بلحظة وهشاركه في كل لحظة بيمر بيها وكل موقف وكل مناسبة 

ابتسمت شوق ونظرت ليوسف بفرحة 

_ موافقة يا قاسم بيه ويارب اكون قد المسؤلية اللي وكلتني بيها 

_ انا اللي اتمنى تقبلي بالمهمة دي ومكونش بتقل عليكي 

لتهتف شوق بمرح 

_ بالعكس انا في قمة سعادتي ان يوسف هيكون جاري طول الوقت ديه اخوي الصغير وابني اللي مخلفتوش 

قالتها ثم داعبة وجنتة يوسف

_ افرح يا واد يا يوسف ابوك رجعلك كيف ما كنت بتتمنى .. ابوك بيحبك يا ولا... انقشعت السحابة السودا اللي كانت مغيمة على قلبه وقدرنا نشوف حبه ليك اخيرا 

قبل يوسف وجنته والده 

_ بحبك اوي يا بابا 

عانقه قاسم 

_ وانا كمان بحبك يا ابني ونور عيني

لتنظر لهم جلنار بعين الرضا ولوهلة تتمنى ان يتزوج قاسم من شوق لكنها تعلم انه ضرب من الخيال لان ابنها لم يعد يفكر في الأمر البتة 

لتهتف شوق بجدية 

_ بستأذنك بس يا قاسم بيه ان يوسف هيفضل معاكم فترة اكده لحد ما اطمن على ابوي ويخرج من المستشفى

_ تمام يا شوق مفيش مشكلة...

_ تمام يلا فوتكم بعافية عايزين مني اي حاجة؟ 

_ اه شوق

_خير يا قاسم بيه 

_ انا كنت عايز اعتذرلك عن كل اساءة قلتها في حقك 

ابتسمت شوق وقالت بقلق صافي 

_ نسيت كل حاجة بمجرد تغيرك من ناحية يوسف.. محصلش حاجة يا قاسم بيه احنا اخوات وربنا يديم المحبة والأخوة في الله.

___

استيقظ غريب من غفلته حانقا على كل شىء لا يستطيع أن ينظر امامه فلا يجد قدمه 

وما ان دلفت الممرضة وخلفها ابناءه 

حتى قال بانزعاج لأولاده 

_ انتوا ايه جابكم هنا مش عايز اشوف حد فيكم غوروا كلكم من وشي أنا مش محتاج لاي حد فيكم.. ومتقلقوش أنا مش عاجز انا لسه بصحتي بفلوسي هركب سيقان صناعية وهقوم تاني وهحاسب الكل على اخطاءه واحد واحد.

قالها وحاول النهوض بينما لم يتكلم أحد من ابناءه وظلوا أماكنهم 

لتقول الممرضة

_رايح فين يا غريب بيه مش هينفع تتحرك من مكانك حضرتك لسه تعبان

_ مش عايز اقعد هنا ابعدوهم عن هنا لاما هرجع فيلتي تاني 

لتهتف الممرضة لشوق وإخوتها 

_ من فضلكم يا جماعة تقدروا تتفضلوا في غرفة الانتظار علشان حالة غريب بيه 

لتغادر شوق مع اخوتها في هدوء وتفهم تام 

هدر غريب بالممرضة

_متقوليش حالتي انا كويس وزي الحصان كمان انتي فاهمة 

_ حاضر يا غريب بيه انا اسفة لحضرتك

 _ناوليني الموبايل بتاعي علشان اعمل اتصالاتي لازم اتابع شغلي واعمالي أنا واحد مهم مش حثالة زيهم 

اعطته هاتفه ليتصل بمدير أعماله

_ محسن طمني اخبار الدنيا عندك ايه ف غيابي

 قال بارتباك 

_ انا اسف يا غريب بيه انا مش عارف اقولك ايه 

_في ايه اكيد هتقولي ان فيه شامتين شمتوا ف الحادثة اللي حصلتلي واستغلوا دا علشان يضربوا السوق عليا.. ما هو في الشدة بتظهر معادن الناس الحقيقة

_ للأسف كلام حضرتك صحيح وكان اول حد طعنك في ظهرك هو زوجة حضرتك فهيمة هانم 

اتسعت أعين غريب ليقول بوجل 

_ فهيمة عملت ايه انطق  !! 

_ للأسف يا غريب بيه.. المدام بحكم التوكيل اللي معاها حولت كل حاجة لحسابها وكتبت كل حاجة باسمها 

غريب بصدمة 

_ انت بتقول ايه يا محسن .. ازاي تتجرأ وتعمل حاجة زي دي هي جرى لعقلها حاجة هتسرقني وانا لسه عايش كدا عيني عينك 

_ويؤسفني اني اقولك يا غريب بيه انها رفعت ع حضرتك قضية خلع في المحكمة.

لم يتحمل قلب غريب تلك الصدمات التي يتلقاها دون هوادة فسقط الهاتف من يده وسقطت راسه على الفراش كجثة هامدة لا حراك فيها 

____

بعد عدة اسابيع كانت فيهم شوق ترتاد المشفى يوميا لتطمئن على صحة ابيها التي تدهورت بسبب حالته النفسية السيئة 

طلبت من اخوتها أن يعودوا لشقتهم لينالوا قسطا من الراحة وستتولى هي مهمة مرافقة والدها

_ روح يا عساف انت واخواتك ارتاحوا يا حبايبي وأني اهنه هقعد جار ابوكم متقلقوش .. أني حضرت ليكم الوكل وأيات هناك هتغرفلكم وتشوف محتاجين ايه 

هتف مهند ياستغراب 

_ شوق 

_ نعم يا ضي عيني 

_ انتي غريبة اوي 

ضحكت شوق بلوعة

_ ما غريب الا الشيطان يا واد يامهاند في ايه قلقتني 

_ ازاي شايف خوفك واهتمامك ببابا كدا وفي نفس الوقت ولا مرة سمعتك يتقولي بابا زينا علطول تقولي غريب بيه او ابوكم 

_ طب اقول ايه يا مهاند قولي.. هو ابوي فعلا علشان اكده قلبي متهافت عليه.. لكنه مش راضي بيا فبقول غريب بيه هعمل ايه.. كنك معارفشي ان نفسي ومنى عيني إني أناديه بوي ويتقبلها مني واشوف في عنيه نظرة الرضا.. بس هو ديه الواقع اللي اني عايشة فيه وراضية بيه هعمل ايه 

اقترب مهند من اخته محيطها بذراعيها

_ ياريته فعلا يعرف حقيقة مشاعرك دي.. ياريته يشيل الغشاوة اللي ع قلبه ويشوفك بعين قلبه متأكد انه هيندم على كل لحظة قضاها بعيد عنك 

_ ربك كبير ومنيش هيأس من رحمة ربنا أبدا.. يلا يا حبيبي روح الحق ريح شوية مع اخواتك علشان شغلكم بكرة.. وانت يا أمير الأمرا خد بالك من ايات يا ولا 

ليقول عساف 

_ لا انتي اللي هتباتي مع أيات أنا هجيلك بالليل اكون مكانك هنا 

_ ماشي يا خوي اللي تشوفه.. في أمان الله.

رحل اخوتها لتبقى هي وحدها مع أبيها تراقبه من تلك النافذة الزجاجية

نظرت حولها في ترقب فلم تجد أحد فتسللت للداخل في خفية

وقفت جوار فراشه تنظر له بتمعن وقالت وهي تمسك يده المحقون بها تلك الإبر المتصلة بالمحلول 

_ طول عمري يا بوي نفسي بس في لمسة حنينة من ايدك.. جايز طول السنين دي كلها مسمحتليش اني اكون بالقرب ديه منيك .. فمعلهش بقا هستغل الفرصة واكون قريبة منيك كيف ما بدي.. اعملك ايه ما انت اللي حارمني من قربك، 

أمسكت كفة يده وقربتها من وجهها 

_ ياااه وربنا ما هكون ببالغ لما اقول اني فرحانة بقربك ديه حتى لو كنت غافل ومش حاسس بيا .. ربنا يتم شفاءك على خير.. الدنيا داي مفيهاش عزيز.. سبحان الله كنت من كم يوم بتشخط وتنتر ودلوك مرمي أكده متوصل بالأجهزة والمحاليل.. ربنا ما يحرمني من صوتك أبدا حتى لو هتفضل تشخط وتزعق تاني .. لكن رقدتك داي صعبة عليا أوي... قوم يا غريب واتحمل انت أكبر واقوى من اكده .. قوم كنوز الدنيا كلها متساويش دمعة واحدة من عنيك... 

يتبع ...

أسماء عبد الهادي

بحبكم ف الله