لا تكن للشيطان على إخوتك

 قصة قصيرة للعبرة

للكاتبة أسماء عبد الهادي 

لا تكن عونا للشيطان على إخوتك 

قصة ٨

_صبلي اخر كاس 

_ده عاشر كاس وتقول اخر كاس.. انت هتقع من طولك كدا 

_بقولك ايه ملكش دعوة.. صب يلا اخلص 

_ماشي يا عم وانا مالي

_اقولك هات الازازة كلها أحسن وان شالله ما حد حوش 

اخد الازازة وخرج بيها يلف ف الشوارع بغير هدف بس هو اتعود على كدا

وبعدها بطنه كركرت

_  وبعدين بقا أنا جعان وخلصت كل فلوسي على البتاعة اللي في ايدي.. بس بردو مش هستغنى عنها 

دور في جيوبة تاني 

_ حلو لقيت جنيه هجيب بيه اي حاجة من المخبز دا 

_ياعم هاتي واحدة من دي 

_ خد وغور من هنا جتك الهم انت وازازتك اللي مش بتفارقك دي 

فضل شاكر ماشي يطوح وسكران وفي ايده ازازته بيشرب منها كل شوية ويتسرمح في الشارع 

_ ياااه الوقت اتأخر انا راجع البيت اريح جسمي 

وفي الطريق شاف قطة بتئن من الألم

_ قطة!! دي شكلها مجروحة

طلع منديل من جيبه وربطلها الجرح 

نونوت له وكأنها بتشكره وبعدين جريت على مقلب الزبالة.

_انتي شكلك جعانة زي حلاتي.. استنى انا مش معايا غير الباتيه دي.. خديها حلال عليكي

حطها ليها على الارض فجريت عليها وكلتها بسرعه 

اشفق عليها فقعد جنبها يتفرج عليها وهي بتأكل باستمتاع

لحد ما نام مكانه 

ووقت اذان الفجر 

جه شاب معدي 

_ يا حج يا حج 

_ ايه انت مين 

_ الفجر بيأذن يا حج ايه رايك تيجي معايا المسجد تصلي 

_ ياااه انا مصلتش من زمان اوي يا ابني

_باب بيت ربنا مفتوح دايما يا حج مبيتقفلش 

ومدله ايده 

بصله شاكر شوية وبعدين قام معاه 

_استنى مش هينفع ادخل والازازة دي في ايدي

_الصلاة يا حج.. الصلاة خير من الدنيا وما فيها 

_معاك حق 

قالها ورمي الازازة في مقلب الزبالة وقال

_يلا بينا نصلي الفجر جماعة 

الشاب ابتسمله ومشي معاه 

وفي المسجد اتوضى شاكر ووقف ف الصف علشان يصلي مع الناس 

اتلفت واحد حواليه 

_ايه دا دي ريحة خمرة .. هنا في بيت الله .. الريحة دي جاية منين 

_ايوة صح دي ريحة منكر في بيت ربنا.. مين صاحب الريحة دي 

فضلوا يدوروا اكتشفوا انها صادرة من شاكر 

_انت اللي ريحتك كلها خمرة كأنك كنت غاطس فيها

_ازاي تتجرأ يا ملعون وتدخل بيت ربنا بالمنكر دا 

_انت داخل بيت ربنا سكران! اخرج يا عدو الله 

شاكر

_لا مش هخرج انا جاي اصلي زيكم 

_هتصلي معانا بالقرف بتاعك دا اخرج 

_مش هخرج انا في بيت الله مش في بيتكم علشان تمشوني

_مش هنصلي وانت معانا اخرج من هنا 

ونزلوا فيه ضرب علشان يمشوه بس هو اصر انه يتم صلاته الاول وبعدين يمشي 

_لو موتوني مش همشي انا جاي اصلي في بيت ربنا 

الشاب 

_استنوا حرام هيموت في ايديكم

_اللعين دا لازم يخرج من هنا مينفعش يصلي معانا بريحته دي

الشاب 

_طب خلاص سيبوه ونخليه يصلي بعيد عننا 

_ماشي غور بعيد عننا عليك لعنة الله 

وبالفعل وقف شاكر وصلى لوحده بعيد عنهم وهما وقفوا في الصف 

الامام صلى بالأية أَلَمْ يَأْنِ لِلَّذِينَ آمَنُوا أَنْ تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِنْ قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ وَكَثِيرٌ مِنْهُمْ فَاسِقُونَ

شاكر عينه دمعت وفضل يعيط بندم شديد على تفريطه في حق ربنا .. بكى وبكي وهو بين ايدين ربنا بتوبة وإصرار على انه ميرجعش للمنكرات تاني 

الكل خلص صلاة وهو لسه على وضعه ساجد 

الشاب قرب منه 

_يا عم.. الصلاة خلصت.. قوم يلا وهات ايدك وقولي طريق بيتك منين علشان ارجعك بيتك.. قوم هساعدك تروح وانا في طريقي.. يا عم.. ياعم.. هو مبيردش ليه 

بيهزه فوقع 

وهنا عرف انه مات 

شاف الدموع في عنيه والبسمة على وشه 

فقال 

_شوفتوا ياللي علطول تصلوا في المسجد كل الفروض... تضمنوا انكم تموتوا ساجدين زي الراجل دا ولا تعرفوا حتى هتموتوا على اي حال!! .. دا الراجل اللي اهنتوه وسبتوه وضربتوه وطردتوه بحجة انه عاصي وبيعمل منكر شوفتوا نهايتة وخاتمته ايه مات وهو ساجد بين ايدين ربنا بيبكي بندم .. شايفين البسمة اللي على وشه فرحان بلقا ربه... طردتوه من رحمة ربنا لكن ربنا ابى الا أن يدخله رحمته واجتباه بحسن الخاتمة كمان 

اتقوا الله ولا تكونوا عونا للشيطان على اخواتكم المسلمين 

رسولنا الكريم صلى الله عليه وسلم قال سبعة يظلهم الله تحت ظله يوم لا ظل الا ظله ومنهم قال

"ورجل ذكر الله خالياً ففاضت عيناه "

اتقوا الله وادعوا ربنا بالثبات على الدين وحسن الخاتمة 

الكل بص لبعضه بندم وحسرة على سوء تصرفهم مع شاكر 

لا تغتر فلا تدري على أي حال ستقبض روحك