حصريا على موقع ومدونة روايستا
للكاتبة أسماء عبد الهادي
اسكربت جديد
خطة للتخلص من عريس الغفلة
خطة للتخلص من عريس الغفلة
___
لينا كانت واقفة عند دولابها
سمر بنت عم لينا استغربت اللي بتعمله لينا
_لينا انتي بتعملي ايه
ليه وهي مشغولة بلبسها_ ايه بلبس زي ما انتي شايفة
_وانتي مسمية اللي بتعمليه دا لبس
_ايه ماله يا بنتي ما هو كاجوال ونايس اهو وعال العال كمان
برقت سمر وقال بصدمة من لبس لينا
_ايه اللي انتي لابساه دا
لينا _ايه يا سمر ف ايه مالك
سمر_ لينا متقوليش انك هتخرجي تقابلي العريس بمنظرك دا
لينا_ يس واي نوت
_لا لا انتي بتهرجي
_ايه في ايه مالك
_معقولة هتقعدي مع العريس بسلوبت بيتي عليه صورة توم وجيري وليه زغبوط بقرون كمان
لينا بصت لرجليها وقالت_يس ومتنسيش اللكلوك دا كمان ايه رأيك مش لايق ع الاوف فيت
سمر مطت شفتها
_دا اوت فيت للنوم يا ماما مش تقابلي بيه العريس كدا هيطفش هيقول انا جاي اخطب طفلة ولا ايه
_ما دا المطلوب
_نعم انتي عايزة تطفشي العريس؟؟
_ اي نعم مش بابا اللي مصر عليه وانا فضلت اتحايل عليه اني مش عايزاه وهو مش موافق
_يا بنتي قالك اقعدي معاه وشوفيه يمكن ترتاحي ليه
_.لا مش عايزة اقعد معاه هو بالعافية .. واهو عاشان بابا غصبني مش هقابله الا كدا
_بس انا خايفة عمو يزعقلك يا لينا
_ايه هيعمل ايه هأخد كلمتين ف جنابي .. الكلام مش بيأثر كبري دماغك
_يا بنتي هتقعي ف المشاكل
لينا _فكك بقا
امها خبطت
_لينا يلا العريس جه كل دا ولسه مجهزتيش
لينا _خلاص اهو يا ماما
الام،_ماشي يا بنتي شهلي وتعالي ع المطبخ علشان تدخلي الحاجة الساقعة
لينا _يووه ع العادات القديمة البايخة دي ماشي يا مامي هاجي
__
في اوضة الصالون كان الحج اسلام والد لينا قاعد مع ادهم وابوه مصطفى
اسلام
_منورنا والله يا درش وليك واحشة من زمان مقعدناش مع بعض
مصطفى_ معاك حق فعلا يا اسلام الايام اخدتنا من بعض وكل واحد اتلهى ف مشاغله بس اهو ان شاء الله الولاد تجمعنا تاني
اسلام _ان شاء الله انا مستبشر خير.. منورنا يا ادهم يا ابني
ادهم بضيق لانه اصلا جاي غصب بناء ع رغبة ابوه في انه نفسه يناسب صاحب عمره
_دا نورك يا عمي والله
اسلام _ها يا ادهم عرفني عليك اكتر انت كنت بتقول انك لسه راجع من برا
ادهم_ اه يا عمي كنت بدرس ف اميريكا في منحة هناك
اسلام_ امم جميل اوي زي بنتي لينا لكنها كانت في منحة في لندن
ادهم باهتمام_ والله طب دي صدف سعيدة ويا ترى خلصت ولا لسه
_اه الحمد لله خلصت السنة دي وبتقدير امتياز كمان وبدأت تجهز للماسجتير
ادهم_ اممم دي باين عليها مجتهدة بقا
_جدا دي بتحب الدراسة قد عنيها عندها تقعد طول النهار تدرس ومفيش اي مشكلة عادى
ادهم بدأ يعجب بالكلام اللي سمعه عنها وقال
_طب والله كويس انا من زمان مسمعتش عن بنت محبة للعلم كدا معروف بنات اليومين دول بيميلوا للفسح والخروجات والتيك توك
_لا لينا بنتي مش من النوع دا خالص
ادهم في نفسه
_البنت دي بدأت تعجبني من غير ما اشوفها كل مواصفاتها اللي انا عايزها بالظبط لما اشوف شكلها هيكون عامل ازاي يارب تبقى مقبولة ع الاقل
__
لينا خرجت مع سمر من الاوضة وراحوا للمطبخ _ها يا ماما انا جهزت
امها ناولتها الصينية من غير ما تبص عليها
_يلا ادخلي بالصينية وانا جاية وراكي
_ماشي اما نشوف اخرتها معاكم ايه
واول ما مامتها شافتها بمنظرها دا ضربت ع صدرها
_بنت يا لينا نهار ابيض ايه اللي انتي لابساه دا
_ايه يا ماما دا سلوبت قمر اوي
_قمر بالستر ياختي هو حد قالك انك هتقعدي مع خالتك بقولك عريس يا بنتي
_ما انا فاهمة يا ماما هو انا يعني غبية دا انا لينا
_يا بنتي دا مش لبس تقابلي بيه عريس مينفعش
_دا اللي عندي كان بها مش موافقة يبقة نفضها سيرة وهدخل اكمل الرسالة اللي كنت بقرأها
امها لسمر لقولي حاجة يا سمر بدل ما انفجر وانا واقفة
سمر ضحكت_ سلامتك يا طنط بس والله غلبت فيها وهي دماغها ناشفة
لينا_ ها نفضها سيرة وادخل اوضتي
الام_ ادخلي كدا وامري لله ربنا يستر من ردة فعل ابوكي
سمر ضحكت_ ولا ردة فعل العريس دا هينصدم يا عيني
لينا _مكبرين الموضوع ليه
ولما دخلت لينا ليهم قالت
_السلام عليكم.. ازيكم يا جماعة
ادهم كان بيشرب العصير فشرق من المنظر اللي شايفه قدامه دا وقال ف نفسه_ يخربيت عقلها هي عاملة ف نفسها كدا ليه دي باينها طفلة
اسلام قام ووقف جنب بنته
_لينا ايه اللي انتي لابساه دا روحي غيري بسرعة
لينا حطت الصينية وقالت_ ايه يا بابا ماله لبسي ما هو كيوت اهو مش كدا يا جماعة
اسلام بغيظ _لينا
ضحك مصطفى وقال
_ايه القمر والجمال دا يا اسلام كان مستخبي عننا فين دا
لينا بسخافة_ والله انت اللي قمر ه
قولي انت العريس مش كدا
ضحك مصطفى_ الله يحظك يا لينا يا بنتي دمك خفيف والله بس انا اكون عمك مصطفى ابو ادهم العريس
مصطفى قام_ يلا يا اسلام نسيبهم يتعرفوا ع بعض ونستعيد انا وانت شوية من ذكريات الشباب
اسلام _وهو كذلك يلا بينا دا أنت واحشني اوي
بصت لينا بقرف ناحية ادهم وقالت _اهلا يا اخينا انت بقا العريس؟؟
ادهم بانزعاج
_اخينا.. ومالك بتقوليها بقرف ليه كدا
لينا بضبق
_يمكن البعيد يحس ويطفش ولا يغور
ادهم رفع حاجبه
_اا قولتيلي انتي شكلك مجبرة ع المقابلة دي
_عليك نور وياريت بقا تاخد بعضك وتمشي
_ع فكرة انا كمان جاي هنا غصب
_والله طب كويس يعني شعور متبادل يلا يا حلو خد بعضك وامشي ..
ادهم في نفسه_ ايه البنت اللي اخده ف نفسها مقلب دي ومفيش عندها اي احترام ولا زوق... ان ما وريتك مبقاش انا ادهم واهو اتسلى بدل الملل دا
حط ادهم رجل ع رجل وقال_ لا انا قاعد شوية
لينا _ايه التباتة دي بقولك مش عايزة اقعد مع سحنتك دي ما تهوينا بقا
_لا انتي الظاهر مش قليلة الزوق لا لسانك طويل كمان وانا بعون الله هقطعهولك
لينا بانزعاج
_نعم انت قد الكلام اللي قلته دا
_ليه يعني هخاف منك يا بنت انتي
_اه ياريت تخاف واتفضل غور من هنا يلا
قام ادهم وقف وقرب منها وقالها بحدة
_اتكملي معايا بأدب بدل ما وربنا هزعلك انا ماسك نفسي عندك بالعافية
_لا تعالى خدلك قلمين ايه النيلة دي بقولك مش عايزة اقعد معاك ولا عايزة الحوازة دي يعني تحس ع دمك وتمشي
ادهم بضيق _انتي سمعتي انا قلت ايه قلت تتكلمي معايا بأدب
ليا_ اوف الجو خنقة اوي
رد ببرود_التكييف شغال يا خفة
_ وربنا انت مش بتحس
_خليت الاحساس ليكي
_بارد
_ مش اكتر منك
_ ابو تقل دمك
_لمي لسانك يا زفتة
_يا شيخ انت ليه جبلة طب اعمل ايه علشان اطفشك ها
_لا انا قاعد براحتي
_ مش بقولك جبلة
_هحاسبك ع كل كلامك دا بعدين ها ولسانك اللي اطول منك دا هربيه يا اوزعة
قالها ادهم وقام وسابها
لينا بانتصار_ يس طفشته
ادهم راح لأبوه
_تمام يا بابا احنا يعني حاولنا نتعرف ع بعض شوية وانا مضطر امشي دلوقتي لان عندي اجتماع مهم اعذرني يا عمي
اسلام_ ربنا معاك يا ابني
مصطفى_ تقريبا كدا الولاد اتفقوا خلينا نتفق احنا كمان شروطك ايه يا ابو لينا
_لا انا مليش شروط انت صاحبي وحبيبي ومش هنختلف ع حاجة
_واحنا لو نطول نجيب نجمة من السما للينا مش هنتأخر وهنحطها ف عنيا
اسلام_ دا العشم بردو يا درش
_طب استأذن انا بقا وان شاء الله نحدد معاد الخطوبة هبقى اجيلك ونتكلم قريب
_نورتنا وشرفتنا يا درش والله
جت ام لينا
_انستونا والله يا حج سلامي للحجة فريدة
_الله يسلمك يوصل يا ام لينا مع السلامه
__
في الاوضة سمر قالت بحماس
_ها عملتي ايه مع العريس انا شوفته شكله باين عليه جنتل مان ولطيف اوي وكاريزما يا بختك بيه
لينا بضيق_ ياختي بلا نيلة .. خديه ليكي بلا وجع قلب ..
_لا بتهرجي معقول معجبكيش
_دا انسان ثقيل وبارد اوي يا بااي عليه
_لا يا لينا حرام عليكي بجد بلاش اوفر
_ايه يا بنتي هو انتي اللي قعدتي معاه ولا انا
_بس خسارة بجد يا لينا دي فرصة متتعوضش
_ليه هو مفيش رجالة ف البلد غيره ولا ايه فكك المهم اني حاولت قدر الامكان اكون غلسة ولساني طويل علشان يطفش ويارب فعلا يطفش
_نهار ابيض عملتي معاه ايه اشجيني
ضحكت لينا وقالت بتسلية_ ولا حاجة مشيته وهو بيطلع دخان من ودنه بس
سما_ يا قادرة حرام عليكي والله انتي اصلا مش وش نعمة
_سمر فكك من السيرة دي بقا واطلعي برا ورايا شغل عايزة اخلصه
_يا باي انتي مبتزهقيش من الشغل أبدا
__
عند ادهم
كريم صاحبه
_عملت ايه يا مان نقول مبروك
_مبروك ايه يا عم دي بنت اعوذ بالله
_ايه مش حلوة
_لا من ناحية حلوة فهي قمر١٤
_طب ايه
_هو ايه اللي ايه هو مفيش مقياس غير الجمال عندك ولا ايه
_طب ايه مالها ايه اللي مضايقك
_لسانها زفر وعايز قصه
_ايه دا هي لحقت من اول مقابلة
_قال ايه يا سيدي بتطفشني علشان مغصوبة انها تقابلني
.ضحك كريم_ زيك يعني ما انت كمان رايح مغصوب واكيد اللي عملته رد فعل طبيعي لانها معصوبة ع أمرها وشكلها كدا بنت ليها شخصية وبتحب يكون يكون ليها كيانها ورأيها الخاص
_دا صحيح ودا فعلا اللي لاحظته وعرفت كمان انها نفس دماغي عملية ومش زي بنات اليومين دول
_حلو اوي يبقى نقول مبروك
_بقولك لسانها عايز قصه
_يا ابني ما قلتلك السبب اصبر بس كم لقاء كمان بينكم والدنيا تبقا عال بينكم
_لا وانا هاخد ايه من وجع القلب دا هو مفيش بنات غيرها فكك منها وركز ف المشروع يلا
_يا ادهم اسمع بس
_كريم هات الملف واخلص
كريم_ امسك يا عم وانا مالي هوجع دماغي معاك ليه
_ايوة اطلع من دماغي عندنا حاجات اهم
__
تاني يوم
لينا راحت ع الشركة اللي بتشتغل فيها بجانب رسالة الماجستير اللي بتعملها
كانت ف مكتبها بتابع شغلها
فجه المدير وقال
_صباح الخير يا باشمهندسة لينا
_صباح الخير يا باشمهندس اسعد ازي حضرتك
_زي الفل .. ها طمنيني أخبار المشروع ايه
_ماشي الحال أنا شغالة عليه يا باشمهندس
_تمام اوي وعلشان المشروع دا مهم وهيرتبط عليه مستقبل الشركة كله
قررت نكون تيم للعمل من أكفأ المهندسين علشان المشروع يتم ع اكمل وجه
لينا_ تمام مفيش مشكلة يا بشمهندس انا مفيش عندي اي مانع طالما حضرتك شايف ان دا مهم للمشروع تمام
اسعد_ تمام اوي .. الباشمهندش اللي هيكون شريك معاكي في المشروع ع وصول
اول ما يوصل هبعته لمكتبك هنا وتتفقوا على سير نظام العمل ما بينكم وهتنظموه ازاي
_تمام يا بشمهندس انا ف انتظاره
_تمام هروح انا ع مكتبي ولو احتجتي لحاجة بلغيني
_حاضر يا باشمهندس
فضلت لينا تتابع شغلها وبعد كدا سمعت خبط ع باب مكتبها فعرفت ان شريكها وصل فقالت
_ اتفضل ادخل يا باشمهندس
دخل ادهم وقال
_السلام عليكم ازيك يا بشمهندسة معلش اتأخرت عليكي لاني كنت بعمل فحص للمواقع اللي هتقوم عليها المشروع
لينا من غير ما تبص على شريكها الجديد قالت _ولا يهمك يا بشمهندس اهلا بحضرتك
ولما رفعت وشها وشافته
رفعت حاجبها وهو كمان بص عليها في نفس اللحظة
لينا
_ايه دا انت بتعمل ايه هنا
ادهم _يييه هو انتي انتي يا بنتي بتطلعيلي في البخت هو في ايه بالظبط
لينا وقفت _لا متقولش انك انت شريكي في المشروع
ادهم بضيق
_الظاهر كدا حظي العكر وقعني في طريقك
لينا بتريقة_ هو كدا فعلا حظك عكر
ادهم بقصف جبهة
_اكيد مش علشان قابلتك
_لا خفيف فعلا
_هنبتدي تاني طولة لسان
_بص يا استاذ انت
كشر وقال_ باشمهندس
قالت بلا مبالاة_ مش هتفرق استاذ من باشهندس المهم تروح لبشمهندس اسعد تعتذر عن كونك شريك ليا في المشروع دا
فكرته فعلا هيوافق وهيمشي لانه مش طايقها بسبب مقابلة امبارح
فابتسمت بانتصار
لقته قرب من المكتب وقعد ع الكرسي وقال _والله انا شغال ف المشروع لو انتي مش عاجبك اتفضلي انتي روحي اعتذري انا مكمل في المشروع دا ومعنديش نية اني اعتذر عنه
لينا مش من عادتها ابدا انها تعتذر عن حاجة مطلوبة منها واو انها متكملهاش ع اكمل وجه
علشان كدا بصتله بغضب وقالت
_اوف استغفر الله العظيم طب اتفضل اترزع خلينا نخلص
ادهم عرف انها متضايقة فقال باستفزاز_ ما انا مرزوع اهو
لينا ف نفسها _دا شكله لابد فعلا يارب صبرني
وفضلوا يتكلموا في المشروع واعجبت لينا بتفكير ادهم ودماغه
وهو كمان عجبته أفكارها وشغلها
وبعد ما خلصوا اتفاق ع سير العمل ما بينهم
قال_ ما انتي طلعتي كويسة اهو وبتعرفي تتكلمي بأدب ولباقة و
اومال مين بسيوني اللي كان قاعد معايا امبارح دا ومطلع عيني وعين اللي جابوني
ضحكت لينا ضحكة خطفته
_لا ما انا قلتلك علشان اطفشك يا استاذ وانت بردو فضلت قاعد زي البلوة بس بردو مشيت الله عليا
استفزته بكلامها وبالرغم من انه بدأ يرتاح ليها الا انه قرر يرد ليها الصاع صاعين ويلعب معاها لعبة القط والفار
_بقى كدا وبتقوليها في وشي ومن غير كسوف ولا حرج ماشي يا زفتة
بس يكون في علمك متتغريش اوي كدا انا اصلا جيت علشان خاطر ابويا وعمي اللي هو ابوكي مش علشان سواد عيونك ياختي
_عيوني عسلي ع فكرة
_مش هتفرق فمتتغريش اوي كدا
_مش محتاجة اعرف رأيك لإني واثقة في نفسي يا استاذ انت واتفضل يلا ع شغلك قاعد ليه
_قلت نيلة باشمهندس
_اه اوك يا نيلة ع مكتبك
_بت انتي متعصبنيش
_الله مش انت اللي قلت ع نفسك نيلة زعلان ليه
ادهم كور ايده وقال بغضب
_اللهم طولك ياروح ومشي وسابها
ضحكت لينا بتسلية
_طب والله مسلي ههه
__
ادهم رجع مكتبه وقعد وهو بيخبط عليه
_اه يا زفتة كل مرة بتعملي عليا وانا ساكتلك ومش عارف ساكتلك ليه
طب صبرك عليا بس
في الوقت دا جاله اتصال فرد
_السلام عليكم ايوة يا حج عامل ايه يا كبير
_وعليكم السلام ورحمة الله وبركاته
ايوة يا ادهم يا ابني عامل ايه
_بخير طول ما انت بخير يا والدي
_ربنا يباركلي فيك يا ادهم .. بقولك ايه انت هتتأخر النهاردة
_مم يعني هخلص ع ٣ كدا او ٢ ليه خير
_حلو اوي علشان معزومين ع الغدا النهاردة
_معزومين مين اللي عازمنا
_مش وقته علشان معطلكش
المهم وانت جاي هات علبة شوكولاتة حلوة كدا وقيمة ها
ادهم باستغراب_ ماشي يا بابا بس شوكولاتة ليه انت رايح تخطب ولا ايه
مصطفى بادعاء الحزم
_ولد عيب كدا بس امك توافق بس وانا مش هتردد
_ابوا انت ناوي بقا .. اه ياعيني عليكي يا ماما
_انت بتقول ايه يا ولد دي امك دي نبض قلبي وحب حياتي ومقدرش استغنى عنها ابدا
ضحك ادهم_ يا سيدي يا سيدي ايوا بقا دا انا اجي اخد كورسات عندك بقا
_لا يا حلو انت اول ما رجلك تطب هتلاقي نفسك اتعلمت لوحدك مش هتحتاج حد يعلمك
_انت شايف كدا يا حج
_اومال
_طيب يبقى ع خيرة الله
___
بعد ما خلص ادهم شغله رجع ع بيته _ السلام عليكم يا عالم يااللي هنا يا بشر يا ناااس ياهو
هرش في دماغه وقال_ غريبة العالم دي راحت فين
فطلع فوبايله وكلم امه
_ ايوة يا ماما انتي فين يا ست الكل
ردت امه_ ايوة يا ادهم يا ابني انت اتأخرت فأحنا سبقناك عند عمك اسلام هات اللي ابوك قالك عليه وتعالى ع هناك يلا متتأخرش
مط ادهم شفتيه بضيق
_ عند عمي اسلام ماشي يا ماما ماشي
_ متتأخرش يا ادهم الجماعة هنا في انتظارك
_ ماشي يا ماما هغير هدومي ومسافة السكة
قفل الخط مع امه وقال_ راحيين عن ام لسان متبري منها
وبعدين ابتسم بتسلية
_وماله خلينا نتسلى شوية
وراح غير هدومه ونزل
__
عند لينا كانت بتستقبل الضيوف بهدوم مناسبة وأنيقة وبتتكلم معاهم بكل هدوء وعقل
ولما امها قالت لفريدة ام ادهم
_ اومال ادهم اتأخر ليه ليكون مشغول واحنا هنعطله
فريده_ لا لا هو خلص شغله من بدري وزمانه جاي ف الطريق
_ تمام يجي بالسلامة ان شاء الله
لينا ف نفسها
_بم ان اخينا دا جاي يبقى اروح انفذ خطتى
وقالتلهم
_طب عن اذنك يا طنط افتكرت حاجة لازم اروح اعملها مش هتأخر
فريدة_ ماشي يا روحي خدي راحتك
___
في محل شوكولاتة فخم وشيك جدا
اشترى ادهم اغلى علبة شوكولاتة
وبعدين قرب من العامل هناك وهمس له بحاجة
وبعدها حاسبه ع تمن الشكولاتة ومشي
وركب عربيته وراح ع السوق
ولما وصل نزل من العربية
وقرب من ست غلبانة بتبيع خضار وهمس لها .....
واما عملت اللي قالها عليه ابتسم ادهم بتسلية _ جايلك يا ام لسان طويل
وبعدها ركب عربيته تاني وراح ع بيت اسلام صاحب ابوه
___
ولما وصل وفتحتله ام لينا ورحبت بيه
_يا اهلا وسهلا يا ادهم يا ابني نورتنا
ادهم _دا نورك يا طنط... اتفضلي دي هدية بسيطة لانسة لينا بس ارجوكي متخلهاش تشوفها دلوقتي
ابتسمت ام لينا وقالت
_ماشي يا اابني بس مكانش له داعي والله انت تتعب نفسك
_لا تعب ولا حاجة يا طنط بسيطة
_طب اتفضل يا حبيبي الكل في انتظارك جوة
___
دخل ادهم وسلم على الكل وفضل يحكي معاهم شوية
وهنا جت لينا وهي داخلة عليهم ولابسة جلابية سودا ولافة طرحة سودا كبيرة ع وشها زي الفلاحين زمان
وقالت وهي بتدخل
_العواف عليكم يا جماعة
ادهم والكل تنح
وادهم قال ف نفسه_ يخربيتك انتي عاملة ف نفسك ليه كدا هي ضربت منك ع الاخر
ام لينا قربت منها
_ايه يا بنت الهبلة عاملة ف نفسك ليه كدا المرة اللي فاتت ولبستي سلوبت وقلت ماشي انما النهاردة ايه الهبل دا وقصدك ايه من كل دا
ضحكت لينا_ ايه ياماما وطي صوتك الضيوف يسمعوا.. وبعدين مالوا لبسي ما حشمة وجميل اوي اهو
امها بنفاذ صبر_ لا اما مش هتكلم وهسيب ابوكي يتصرف معاكي
لينا _ايوااا سيبيلي الحج ابو السلم وهو اصلا مش هيقول حاجة
فريدة لجوزها_ البنت كانت كويسة مالها قلبت ليه كدا
الحج مصطفى فهم دماغ لينا وقال
_البنت الظاهر حابة تلاعب ابنك ع الشناكل والحرب شكلها هتبتدي بدري بدري فاكرة يا فريدة ايام خطوبتنا اهو تقريبا التاريخ بيعيد نفسه وهنشوفه تاني مع ابنك وخطيبته
ضحكت فريدة_ هه يا سلام .. معقول دي الحكاية. هتكون ممتعة
لينا قعدت جنب أدهم
_منور يا أخينا ايه اللي جابك تاني مش كنا خلصنا هو انت يا ابني عامل زي اللزقة ماكان ما اروح الاقيك ورايا
_ما قلت من حظي العكر وانتي مصدقتنيش
_يا شيخ
_هو كدا بالظبط
قوليلي عاملة في نفسك ليه كدا لسه راجعة من الغيط حضرتك
_انت جاي تهزر هنا ولا تستظرف
_والله شوفي اللي انتي لابساه وبعدين اتكلمي
_والله ملكش دعوة بلبسي انا البس اللي انا عايزاه
_ماشي ياختي البسي عقبال ما تلبسي لبس عشماوي
_ان شالله انت بعيد الشر عليا اعوذ بالله ف ملافظك يا اخي
ضحك ادهم_ ايه يا بنتي اخدتي الكلمة جد اوي ايوة .. يبقى انتي فعلا شكلك هاربة من الأحداث
_ادهم بقولك ايه اتلم احسنلك
ضحك ادهم _وعلى ايه اتفضلي
وعطاها العلبة التانية اللي كانت معاه
لينا قالت ببرود_ شكرا
ام لينا اخدت فريدة يتكلموا ع جنب
واسلام اخد درش يعقدوا ف التراس يسترجعوا ايام الشباب
لينا اخدت العلبة وفتحتها وهي متحمسة لانها بتحب الشيكولاته ولما فتحتها لقيت بدل الشيكولاته دي ليمون فشهقت
_ ايه ده يخرب بيتك انت جايب لي ليمون
ضحك ادهم جامد وقال _ما هو بالمنظر اللي قدامي ده فعلا مش لاقي عليك غير اني اجيب لك ليمون
لينا اتضايقت ومسكت العلبه اللي فيها الليمون ودلقتها فوق راسه وقالت وهي بتمشي _ وادي هديتك اشبع بيها
ادهم وهو مش مصدق اللي هي عملته _اه يا بنت المجانين
وبعد شويه جت الشغاله وقالت لام لينا_ الغداء جاهز يا ست هانم
ام لينا قالت _تمام يلا يا جماعه اتفضلوا على السفره
الكل اتجمع حوالين السفره ولينا قالت بغيظ _اتفضل بالسم الهاري ادهم كان وقتها بيشرب ميه فلما سمع كده شرق وفضل يكح_ يخرب بيتك الملافظ سعد في حد يعزم حد ويقول له اتفضل بالسن الهاري
لينا بعند_ اهو انا اياك البعيد يحس على دمه
ادهم _يا ريت والله ده انا هفلت بجلدي منك بس باين الجماعه طبخوها مع بعض وانا كده تقريبا اتدبست
_ يا سلام وانت اصلا تطول انك ترتبط بواحده زيي
_يا شيخة اتلهي دا انتي واحدة مجنونة
_ولا بقولك ايه اتعدل ف الكلام معاكي
ام لينا
_ايه يا ولاد في حاجة ولا ايه
لينا قعدت مكانها
_اا لا يا ماما مفيش حاجة
ام لينا
_ايه يا ادهم يا حبيبي مش بتأكل ليه الاكل مش عاجبك ولا ايه
ادهم_ لا طبعا يا طنط ازاي دا اكيد تحفة جدا من قبل ما ادوقه
_طب كل يا ابني البيت بيتك متتكسفش
ادهم_ تسلمي يا طنط
وبعدها همس للينا
_يا ترى حاطة ايه ف الأكل السم الهاري اللي بتقولي عليه
_حظك اني لسه راجعة من شغلي وملحقتش احط التاتش بتاعي في الاكل
_دا من حسن حظي والله الحمد لله انك ملحقتيش يا بنتي
كدا اكل بقلب جامد ما انتي مش مضمونة
وبدأ يأكل بشهية واستمتاع بالأكل
لينا بضيق _كل كل بس بردو مش هعدي مقلب الليمون البايخ دا وان ما رديته ليك مبقاش انا لينا
ادهم والأكل ف بوءة
_بتقولي حاجة يا لينا
_مش بقول اتنيل لغ
_ايه
_يا عم كل بقا متفلقناش
_لاحظى ان لسانك بدأ يتبرى منك
ل_ا انا ماسكة نفسي علشان عمو درش بس
_يا شيخة
_هو كدا
وخلصت الزيارة ع خير واتفقوا ان الخطوبة كمان اسبوع
وقبل يوم الخطوبة بيوم لينا مراحتش ع شغلها ودا لانها كان عندها بحث ميداني مهم لازم تعمله
ابو ادهم قال
_ادهم روح ع بيت عمك اسلام شوف لينا محتاجة ايه وجيبه ليها علشان الخطوبة بكرة
ادهم بملل
لسه حاجة ايه اللي محتاجاها ما هي تقريبا نزلت مع امها وماما وجابوا كل حاجة
مصطفى بردو الامر ميستغناش ومن الذوق تروح تشوف محتاجين حاجة ولا لا
ادهم_ماشي يا بابا هروح
__
في الوقت دا لينا كانت نايمة بتريح بعد اللف اللي عملته ع البحث بتاعها
فجت ليها سمر
_لينا.. لينو . لينا حبيبتي اصحي
لينا بنوم _ايه يا بنتي عايزة ايه مني
_عريسك منتظرك برا يا قطة
_عريسي مين
_باشمهندس ادهم يا بنتي دا انتي خطوبتكم بكرة لحقتي تنسيه
_لا لا انا معرفش حد بالاسم دا
ضحكت سمر_ يلا بقا يا لينا بلاش دلع
قعدت لينا وقالت بضيق
_يووه مش هنخلص ما تقابيله انتي وانام انا
_ياريت بس هو جاي ليكي انتي مش انا
_وانا متنازلة عنه ليكي مفيش مشكلة
_يلا بقا يا لينا هو ف انتظارك
لينا عنيها لمعت بمكر
_ممم حيث كدا بقا نردله الصاع صاعين
سمر _بتقولي حاجة يا لينا
لين_ا مم سمر بقولك روحي اقعدي معاه لحد ما البس
سمر_ اوك ماشي
لبست لينا لبس الخروج واخدت شطنتها واتسحبت ونزلت
وهي تحت اتصلت بسمر
سمر وهي قاعدة مع ادهم
_منور يا باشمهندس
ادهم_دا نورك يا قمر تسلمي
سمر_ ايه دا دي لينا بتتصل
ادهم _افتحي المكبر دي شكلها بتخطط لمصيبة
سمر _ايه
ادهم_ اسمعي الكلام
ففتحته سمر فسمعت لينا بتقول
_سمر بقولك اسمعي مفيش وقت ومتببنيش اي حاجة للبأف اللي قاعد عندك...
سمر بصت لادهم بحرج
وادهم كور ايده بغضب _بقا انا بأف ماشي
لينا_سمر انتي سامعاني
سمر بارتباك _ اا ه اه سامعاكي
لينا _بصي اشغليه لحد ما انيم ليه فردات العربية اللي فرحان بيها دي اوي واهو بكدا ابقا رديت له مقلب اللمون السخيف بتاعه
سمر بلعت ريقها_ اا ايه لينا اللي هتعم...
قاطعتها لينا وقالت
_اشش استنى يا غيبة وطي صوتك لاحسن يفهم حاجة
انا هرن عليكي لما اخلص علشان تبلغيه اني روحت مشوار مهم وهو يمشي بقا قفاه يقمر عيش
سمر بصت لأدهم وجت تتكلم فشاورلها تسكت وانها تكمل حوارها مع لينا
سمر_ مم ماشي يا لينا
لينا _يلا باي
ولما قفلت الخط
ادهم قال بكل غضب _زي ما انتي يا سمر انا نازلها وقعتها مطينة معايا النهاردة
سمر بحرج _ااا دي دي بتهرج بس انت عارف لينا دمها خفيف وبتحب تعمل مقالب بس
ادهم بانزعاج _ما هو واضح انا نازلها
ونزل أدهم بسرعة علشان يلحقها قبل ما تبوظ ليه عربيته
وقفت لينا بعد ما مسكت دبوس ف ايديها وقالت وهي بتبص ع العربية
_ممم انيم عجلة واحدة ولا الاربعة... اممم انا بقول انيم الاربعة وان شالله ما حد حوش
جه ادهم اللي نزل بسرعة البرق وقال وهو واقف وراها
_ممم فكرة مش بطالة البأف تشغليه فوق وتنيمي عجلات عربيته تحت مش كدا
لينا بخضة_ اا انت عرفت يخربيتها سمر مش بتعرف تكدب واكيد اعترفت من اول الم
ادهم بانزعاج_ الألم دا محدش هيأخده غيرك
بلعت لينا ريقها برعب منه وقالت_ ااا اسمع بس
ادهم بشر _اسمع ايه ولا اقولك عنك انا هنيم العجلات بدالك والله ما تتعبي نفسك
لينا باحراج _ااا انا .. ااا
قرب منها ادهم وهو ناوي ع استفزازها وبس الرعب فيها علشان تحرم تعمل اللي كانت عايزة تعمله
_انتي ايه.. محدش هيقدر يفلتك من ايدي النهاردة احنا ف الچراج ولا حد هيسمعك
لينا كشرت وقالت بضيق
_قصدك ايه انت انسان مش محترم
ضحك ادهم _انتي اللي نيتك وحشة اعملك ايه انا قصدي اني أديكي ع وشك بعد اللي عملتيه
_طب فكر بس تعملها وانت هتشوف
_ليه هخاف منك
_وانا بقولك خاف يا عيد
قرب منها ادهم اكتر وقال_ طب وريني القطة ام لسانين هتعمل ايه
داست لينا بالهيلز بتاعها على رجله فصرخ من الالم
_اااه يا بنت الاية يخربيتك رجلي ورمت
قالتها لينا وهي بتهرب وتطلع ع شقتهم فوق
_محدش يلعب معايا دا انا لينا بردو
ادهم بصلها بتوعد_ ماشي يا لينا يا ويلك مني
ولما طلعت لينا امها جت من المطبخ
_ايه لينا فين ادهم
_مشي يا ماما
_بالسرعة دي
_اه قال عنده ااا شغل ولازم يخلصه
_ماشي يا بنتي ربنا يصلح حاله
وسمر اول ما شافتها جريت عليها بخوف عليها
_لينا انتي كويسة
لينا شدتها من هدومها _تعالي يا مصيبة ايه اللي خلاكي تقوليله
سمر _اا والله هو اللي قالي افتح مكبر الصوت وسمع كل حاجة
_بقا كدا بس بردو علمت عليه ويانا يا هو
_يا بنتي مش ادهم شريكك ف المشروع وبتقولي انه انسان كويس وانك بدأتي ترتاحي ليه اومال مالك بتلعبي معاه القط والفار ليه وعايزة تطفشيه
_اه وايه اللي دخل دا لدا
_والله انا مبقتش فاهمة دماغك
_كبري
__
تاني يوم الل هو يوم الخطوبة
صممت لينا انها تنزل شغلها
فاتفاجئت بالسكرتيرة بتبلغها ان باشمهندس ادهم ساب المشروع
لينا باستغراب _غريبة سابه ليه فاجئة ما الدنيا كانت ماشية تمام وهو مجابش سيرة لدا
ولما خلصت شغلها وروحت ع البيت
لقا سمر بتقولها _لينا الظرف دا جالك
لينا _ظرف ايه دا
_معرفش افتحيه
فتحته لينا
فلقته جواب من ادهم
فقالت بسخرية_ باعتي جواب انت من العصر الحجري باين
ولما قرأته"انسة لينا انا عارف انك مش عايزاني علشان كدا محبتش اكون تقيل عليكي اكتر من كدا واغصبك ع حاجة انتي مش عايزاها ربنا يوفقك مع حبيبك اللي اكيد انتي بترفضيني علشانه"
بلعت لينا ريقها وقالت بضيق
_ايه اللي الغبي دا عمله حبيب مين وبتاع انا مفيش في دماغي اي حد اساسا وان كنت استمريت ف الخطوبة دي فدا لاني ارتحتله فعلا وقلت ادي لقلبي فرصة .. بس هو اللي غبي واستعجل بس يلا مش وش نعمة
ورغم انها قالت كدا الا انها فضلت بقيت اليوم زعلانة
والليل جت سمر _يلا يا لينا البسي
_البس ليه
_في عريس جايلك برا وقومي قابليه
لينا بملل_ تاني عريس تاني
سمر _وانا مالي دي اوامر ابوكي يلا
لينا قالت وهي مقررة انها تطفشه زي ادهم بس المرة دي بجد لانها لو هتتجوز مش هتتجوز غير ادهم
ولما خرجت بالصينية لقت ادهم في وشها
ومن صدمتها دلقت كل الصينية في وشه
ادهم صاح بغضب_ يخربيتك انتي يا بنتي ايه مصيبة
.لينا بفرحة وحرج ف نفس الوقت
_اا سوري انا انصدمت لما لقيتك تاني
_ايه فكرتيني اني حبيب القلب وما صدقتي اني غ
ورت
لينا بضبق_ انا معرفش حد غيرك اصلا ولا فكرت ارتبط بحد غيرك
ولما ادركت اللي قالته حطت ايدها ع بوءها بصدمة
فقال هو بجب
_بجد قوليها تاني كدا
لينا بتحاول تداري ارتباكها$ يلا يا استاذ اتفضل امشي
ادهم بحب_ ما هو هنمشي فعلا علشان ننزل نشتري خاتم الخطوبة
لينا _انت بتتكلم بجد
ادهم _جد الجد كمان لينا بالرغم من تصرفاتك الطفولية ولسانك اللي متبري منك الا اني انطسيت وحبيتك للأسف
.لينا_ يا اخي دا انت باين عليك لسانك بينقط شهد
ضحك ادهم_ من بعض ما عندكم
_اه انت بتردهالي بقا
_طبعا
وبعدين قال بجدية وحب_ تقبلي تتجوزيني يا لينا
لينا_ لو مكنتش موافقة مكنتش هتقف قدامي دلوقتي
ادهم بانزعاج_ دا انتي فصيلة فصلان طب اتكسفي او اعملي اي منظر
ضحكت لينا وضحكته خطفته زي ما خطفته اول مرة
ونزلوا جابوا الشبكة وكتبوا الكتاب وتمت
جميلة جدا شكرا ليكي
ردحذفكل رواياتك ر وعه يا سوسو
ردحذفروعه تسلم ايدك حبيبتي دومتى مبدعه
ردحذف