اسكربت كوميدي
حصريا على موقع ومدونة روايستا للكاتبة أسماء عبد الهادي
السلام عليكم ورحمة الله وبركاته
ازيكم يا شباب
وجه وقت الاسكربت بتاعي
قراءة متتعة
❤️❤️❤️❤️❤️❤️❤️❤️
_واااو مطر دي فرصتي
دخلت ملك بسرعة لبست شالها وخرجت ع برا تستمتع بالمطر
فضلت واقفة في الشارع قدام البيت وفاردة دراعاتها وبتبص للسما باستمتاع بالشتا والجو اللي هي بتفضله
وبعد كدا دخلت البيت
فأمها قالت بانزعاج
_ خلصتي يا بنت الهبلة شغل الجنان بتاع كل شتواية دا
_ ايه يا ماما دا مش هبل ولا حاجة حضرتك عارفة اني بحب اوي استمتع بالجو وهو بيمطر ومينفعش يمر عليا كدا الا لما اقف ف المطرة
_ يا ختي الناس العاقلة بتجري تلم الغسيل من ع الحبل وانتي تجري زي العيال تغرقي هدومك وترجعي روحي يا اختي غيري هدومك لا تبردي يلا
_ يوووه يا ماما مش هتفهميني أبدا
_ حاضر هروح اغير هدومي
_ عوض عليا عوض الصابرين يارب
__ تاني يوم الصبح
ملك كانت نايمة فجت اختها تصحيها
_ ملك يا ملك انتي يا بنتي
_ ايه يا لبني عايزة ايه
_ انتي يا بنتي مش وراكي جامعة النهاردة
قالت بنوم
ليه هي الساعا كام
_ داخلة ع ٨
_ طيب لسه المنبه مرنش سيبيني انام شوية
_ يا ملك قومي اوصلك بعربيتي بدل شحططة المواصلات كل يوم دي
_اعملك ايه ما هي ست ماما مش راضية تجيبلي عربية زيك
_خلصي انتي جامعة يا ستي وهديتك تكون عربية احدث موديل كمان
_اوعدنا يارب
ضحكت لبني
_ها هتقومي يلا علشان متأخرش ع شغلي
_لا هستغل كمان النصاية دي ف النوم روحي انتي
_يا بنتي مفرقتش من نص ساعة يلا قومي
_لا لا يمكن اتنازل عن كم دقيقة اقضيهم كمان ف النوم اخرجي بقا مش تضيعيهم عليا
_امرك غريب ماشي يا ستي انتي حره
__
بعد كم دقيقة صحيت ملك وقالت
_استعنى ع الشقا بالله اقوم اروح الجامعة اجنن البنات اصحابي وقبلها امي ست الحبايب ياحبيبة
قامت اخدت شاور ولبست
دخلت المطبخ لأمها
_صباح الخير يا ست الحبايب ياحبيبه
_صباح الخير يا اختي صاحيه مزاجك رايق
_وربنا شكلك بتحبيني يا عبير يا قمر انتي .. ها هتفطريني ولا اروح افطر في الجامعة زي كل مره واقولهم امي مش مهتميه بيا ومشرداني ومجوعاني و
_ايه يا بنتي اهمدي وابلعي ريقك دا احنا لسه ع الصبح ولا المطر بتاع امبارح خلاكي تخرفي
_طب انا جعانة يا بيرو جعانة
_ اقعدي يا اختي كلي
قعدت ملك ولسه هتحط الاكل ف بوءها بصت ع الساعة قدامها لقتها ٩
فقامت بسرعه
_عاااا انا اتأخرت ع اول محاضراااا .. هنطرد انا عارفة اه منك يا لبنى مشيتي بعربيتك ومسألتيش في اختك
امها لوت شفتها _هي بردو اللي مسألتش
_يلا سلام يا ست الحبايب ياحبيبه ووحسابي مع بنتك بعدين
_والفطار يا بنت الهبلة
حطت ساندويتش في بوءها بسرعة وقالت وهي بتجري ع الباب
_اعمل ايه بقا ما انتوا مش مهتمين بيا ف البيت دا سلام
امها رفعت ايدها بغلب
_عوض عليا عوض الصابرين يارب.. بت يا ملك استنى انتي مأخدتيش فلوس يا مصيبة
وقفت ملك ع السلم
_يووه مش بقولك مش مهتمين بيا... احدفي يا ماما الفلوس لسه هطلع اخدهم
_لا انا هحدفك بحاجة تانية
امها وطت تحدفها بالشبشب اللي ف رجلها
ملك هربت ع تحت بسرعة
_عاااا ... خلاص مش عايزة فلوس معايا ... تشكري يا ست الحبايب ياحبيبة يا مشرفاني وسط الجيران
__
نزلت بسرعة ووقفت على اول الشارع واخدت تاكسي بسرعة ووصلت للجامعة وهناك اخدتها جري علشان تلحق المحاضرة
_يارب الحق يارب الحق... يا شماتة أبلة ظاظا فيا اه يااني .. لبنى اختي لو عرفت مش هتعديها يارب يكون الدكتور اتأخر يارب
وفجأة لقت نفسها خبطت في واحد لابس بدلة وفي ايده شنطة سودا
_عاا انا اسفة اوي والله العظيم سوري اصلي مستعجلة علشان المحاضرة الدكتور اللي عندنا مبيرحمش بعيد عنك كدا كشري وصعب وعليه بصة ترعب بتسكت المدرج كله في لحظة.. لا وايه لو حد اتأخر ياربي ع دش التهزيق اللي بيأخده وبيخلي الطالب قاعد في نص هدومه.. بيفرمه فرم... وانا مش مستعدة اتهزق والطلبة تضحك عليا يرضيك اتهزق من الدكتور التنين دا
رفع حاجبه باستنكار
_تنين ها
بصت للدكتور وبلعت ريقها
_دد... دكتور أحمد هار اسوح روحت في داهية
ابتسملها بسخرية
فضحكت ببلاهة
_اوبا انا شكلي عكيت... ببب.. بس تعرف رغم كل الحاجات دي هو دكتور ممتاز وشرحه عشرة على عشرة بفهم منه من اول مرة والله .. هو بس يفرد التكشيره شويه وهيبقى فله
لقته بيبصلها ومكشر فقالت
_ايه بردو عكيت ولا ايه.. وربنا يا دكتور انت دكتور عظيم و..
قاطعها وقال بصرامة
_على محاضرتك يا استاذة يلا
_يعني مش هتأخد اسمي وتحطني ف دماغك وتشيلني المادة وربنا ما اقصد انا اصلا واحدة لتاتة ومش بعرف انا بقول ايه يعني ولا كأنك سمعت حاجة
زعق وقال بحدة
_قلت اتفضلي على مدرجك
اخدت ملك نفس طويل وراحت على مدرجها وقعدت في وسط الطلبة
وهو دخل بعدها وقال
_اقفلوا الباب دا ومش مسموح لحد يدخل بعديا
حاولت تتخفى في مكانها علشان ميشوفهاش
لكنها شافته بيطلع كشف الاسماء من شنطته
وفضل يبص شوية وبعدين قال
_الأستاذة ملك عبد الرحمن حازم موجودة
ملك حطت ايديها ع راسها
_اوبا دا طلع ملوش حل وعرف يجيب اسمي كمان.. يالهوي انا بايني هتفصل النهاردة.. يعني كان لازم اتسحب من لساني .. امي هتفرمني لو عرفت باللي حصل
أحمد لما ملقاش رد قال
_هي مش موجودة .. تمام هكتبها غياب
بلعت ريقها ورفعت أيدها وقالت
_لا.. انا موجودة.. انا موجودة يا دكتور
_وانتي سمعك تقيل ولا ايه مش بتردي من اول مره ليه يا استاذه ولا كنتي نايمه في المحاضره . دا احنا لسه مبدأناش على فكره
ملك ف نفسها
_ابتدينا الدش ومش هننتهي .. دا باينه مرار طافح من اوله
_انتي يا انسة طرشة مش بتردي ليه
_ااا انا اسفة يا دكتور مع حضرتك
_تعالي اتفضلي اطلعي هنا عايزك
_يا وقعة منيلة بنيلة عايز ايه دا كمان.. ايه ما انا قلتلك شرحك حلو اعمل ايه تاني ... دا انت بتتحجج بقا
خرجت من مكانها وراحت لعنده
_احم.. نعم يا دكتور
وبعدها قالت بصوت هامس
_ان شالله يخليلك عيالك يا دكتور بلاش تهزقني قدام الدفعة علشان المنظر العام اوري وشي من العيال دول فين دلوقتي لو حضرتك بدأت دش التهزيق... حس بيا كأني بنت من بناتك يا دكتور الهي ربنا يسترك
احمد قال وعلامات الانزعاج ع وشه
_ايه اسلوب الشحاتين دا انتي متأكدة ان عقلك سليم
_يمكن يجيب معاك نتيجة .. بس شكله ولا حوق فيك..
_ايه
_احم .. لا ولا حاجة يا دكتور.. نعم حضرتك كنت عايزني في ايه... ع فكرة بقا حضرتك لو هزقتني ووصل الموضوع لبيتنا هتهزق اكتر وربنا وهتبقى ليلة كبيرة اوي.. ما تلم الحكاية وتعديها يا دكتور الله يكرمك
احمد بصلها شوية وبعدين شغل البروجكتور
وشاور ع الشاشة
_شايفة المسألة دي...
_ايوة مالها
قال برخامة
_اكيد يعني مش عايزك تتصوري جنبها ... اقري السؤال وجاوبي اتفضلي معاكي القلم اهو
_يالهوي دا انا اتزهق اكرملي سؤال ايه هو انا اعرف حاجة في المادة المعقدة دي
وقفت مكانها فأحمد قال
_السؤال دا عليه اعمال السنة كلها.. لو حليتيه هحطها قدامك فول مارك دلوقتي حالا
_بس دا ظلم انا مش مستعدة لأي كويز دلوقتي وكمان اشمعنا انا
_تمام يعني مش هتحلي اوك هعملك راسب نظري وابقي قابليني لو عديتي ف المادة السنة دي
_لا لا لا استنا ايه يا دكتور انت ما صدقت ولا ايه.. حضرتك تقريبا كدا بتتحجج... انا عارفة انا مني لله وهروح ف داهية بسبب لساني الطويل ... حاضر يا دكتور هحاول احلها ويكفيني شرف المحاولة .. ومنه لله اللي كان السبب كله رايح وما دايم الا وجه الله
أحمد في نفسه كان عايز يبتسم وقال
_البنت دي نكتة بجد .. مجنونة بس دمها خفيف
وبعدها بصلها وكشر
_اتفضلي حلي وبطلي برطمة لو مش عارفة اركني ع جنب علشان متضيعيش وقت المحاضرة
ملك بصتله بضيق وقالت بتحدي
_ لا هحاول يا دكتور
_اتفضلي وريني شطارتك
اما بقيت الطلبة فكلهم طلعوا كتبهم وبدأو يذاكروا خوفا من ان دكتور احمد ينادي عليهم ويختبرهم زي ملك
وقفت ملك قدام البورد تبص ع السؤال
_ودا يتحل من اي اتجاه يقطع المحاسبة ع اللي دخلني تجارة انجلش ايه الغلب دا بس ياربي.. شكلك هيكون وحش اوي لو معرفتيش تحليها يا ملك اعمل ايه.. اه لو كان عندي الحاسة السادسة ..مم مش عارفة بقا هحلها وزي ما تيجي
ولما خلصت حل قالت
_خلصت
أحمد بص ع السبورة ومتكلمش فملك قالت
_بقولك ايه يا دكتور لو مش صح متقولش الله يسترك بلاش تضحك عليا الأجانب قصدي الطلبة.. هو انت معندكش اخوات بنات يا دكتور؟
تلقائيا وغصب عن احمد ضحك من تصرفات ملك الطفولية والغير مصطنعة
ملك ف نفسها
_ما هو طلع بيعرف يضحك اهو
وبعدها احمد قال بهدوء _اتفضلي مكانك يا انسه
_ ايه ده اخيرا افرجت عني
_اه خلاص مش عايزك هنا اتفضلي ارجعي مكاني انتي حليتي المسئله صح
_ طب احلف انا حليتها صح بجد لا مش معقول انا بجد خساره في البلد دي ده انا حليتها وانا مغمضه
_لا برافو عليك مكنتش متوقع دا منك
_ دي اقل حاجه عندي
هز احمد راسه وشاورلها علشان تدخل مكانها
رجعت ملك مكانها وهي بتتنهد براحه وبتقول
الحمد لله عدت على خير يا مانت كريم يا رب
__
بعد الجامعة رجعت ملك ع بيتها وهناك سمعت صوت اخر حد هي عايزة تسمعه.
_يووه ايه جاب اخينا دا هنا انا هتسحب من غير ما يشوفني مش ناقصة وجع دماغ
لسه بتتسحب علشان تدخل اوضتها من غير ما يشوفها
هو بالصدفة بيتلفت فشافها
_ايه دا المصيبة جت اهي اخيرا
ملك قالت بضيق
_مصيبة في عينك ما تتلم ياض انت..
مسكها من قفاها وقال
_بقا انا تقوليلي ياض انت
_اه انت هو انا هخاف منك ولا هخاف منك يعني
_وانا بقولك خاف يا عيد دا انتي تحت ايدي
_لا يا حلو امي هنا ومش هتقدر تعملي حاحة فابعد ايدك دي عني وحل عن نافوخي انا راجعة مصدعة ومش طايقة نفسي
سابها وقال
_صحيح راجعة متأخرة ليه يا بت انتي
_علشان حضرت كل محاضراتي مش زيك اكيد زوغت زي كل مرة
ضحك ماجد وقال
_ ازوغ ايه هو لنا لسه في سنة رابعة يا بتاعة انتي.. روحي يا بت حضري الأكل مع مامتك يلا انا جعان
_ بت اما تبتك واد انت ملكش دعوا بيا.. وغدا ايه اللي احضرله ليك ما تروح تأكل في بيتكم ايه الطفاسة دي
_وربنا لو اتغابيت عليكي ما هكون غلطان تعالي هنا يا بت
جريت ملك علشان تهرب منه وهي بتقول وهي داخلة المطبخ لأمها
_يا ماما يا ماما تعالي شوفي ابن اختك ماجد الزفت دا بعيد عني
سابت أمها المغرفة من ايديها وبصت لهم بملل
_يووه مش هنخلص من شغل الناقر ونقير دا بتاع كل مرة .. ارحموني انتوا مش صغيرين
_ ماما هو اللي بدأ وبعدين ايه اللي جابه عندنا اصلا
عبير قالت
_ملك عيب كدا اتكلمي مع ماجد كويس .. دا ماجد دا حبيبي
_اه انتي هتتفقي معاه ضدي ماشي يا بيرو ماشي انا داخلة اوضتي انام ومش عايزة حد يزعجني
ماجد شدها من هدومها
_خدي يا بت هنا تعالي
قالت بنرفزة
_يوووه يا ماجد بطل بقا انت عايز مني ايه
_اتنيلي اتغدى الأول وبعدين ادخلي نامي
_وانت مالك يا اخي أكل ولا انام ولا اروح في داهية ملكش دعوة بيا فاهم.. وابعد بقا كدا خنقتني
قالتها وسابته ومشيت ع اوضتها
وقفلت الباب
ماجد قال
_شايفة يا ست الكل بنتك هتفضل مقموصة مني كدا كتير
_معلش يا ماجد هتأخد وقتها وتصفى دي ملك قلبها طيب ومش بتشيل من حد
_بس مني انا هتشيل وهتشيل جامد اوي يا بيرو
_معلش يا ماجد علشان بتحبك فهتشيل منك شوية
_طب اعملها ايه علشان اصالحها
هنا جت لبني وقالت بابتسامة
_خليك انت ع وضعك وحاول تقدم قرابين الحب والاهتمام وصدقني هي مش هتطول ف الزعل زي ما ماما قالت ملك قلبها أبيض
اتنهد ماجد وقال
_ممم ماشي يا لبني هفضل احاول معاها لحد ما ترضى عني
ضحكت لبني_ربنا معاك بقا
ماجد قال
_اه صح حضرة الظابط المبجل اخويا باعتلك السلام وبيقول انه جايلك النهاردة يأخدك تتعشوا سوا برا
وبعدين غمزلها وقال_ ما تعملوا حسابي انا والمصيبة اللي جوا وتخرجونا معاكم لحد ما ربنا يفرجها وألاقي بنت الحلال زي اخويا واخطب واتجوز واكمل نص ديني بقا
ضحكت لبني
_ممم تقدر تقول الكلام دا لحضرة الظابط
ماجد بخوف
_لااا ربنا يجعل كلامنا خفيف عليه.. وانا هبقى اخد المصيبة فاي مكان تاني .. انا بس كنت بقول اصالحها قدام وليد علشان توافق تصالحني لانها بتعز وليد وبتعمله حساب
هنا نادت عليه خالته عبير علشان يتغدى
_يلا يا ميدو علشان تاكلك لقمة يا حبيبي
_لا طالما ملك مش هتأكل مش هأكل .. يلا سلام انا ماشي
_يا ابني سيبك منها تعالى بس
_لا وقت تاني سلام
__
ملك اول ما ماجد مشي.. خرجت بسرعة وقعدت عةالسفرة تأكل لأنها جعانة
فلبني قالت
_ليه كدا تزعليه يا ملك
ملك قالت
_محدش يجيبلي سيرته انا جعانة وعايزة اكل بنفس
_بقى كدا طب انا هقول لوليد
ضحكت ملك
_اطمني حضرة الظابط خطيبك ميقدرش يزعلني
_اه داخلة بقلب جامد بقا
_يس طبعا
__
تاني يوم في الجامعة
أحمد كان نازل من عربيته علشان يدخل الجامعة لأنه عنده محاضرة
في الوقت دا الدنيا مطرت
وكل الطلبة بقوا يهربوا من المطر واللي يدخل المدرجات واللي يقف تحت مبني او في أي مكان ميوصلوش فيه المطر
الا ملك وقفت في نص الساحة وفردت دراعاتها وكأنها بتستقبل المطر بالأحضان وكأنها بتقوله وحشتني... فضلت تلف حوالين نفسها وهي مستمتعة ومغمضة عنيها
كان مشهد ملفت جدا لان مكانش فيه الا هي بس ف الساحة
تلقائيا
احمد ابتسم مع نفسه وقال
_البنت دي مجنونة حرفيا هدومها غرقت ومش مهتمة.. معقولة عاشقة للمطر ولا في قلبها وجع بتحاول تغسله
شوية ولقاها دخلت مدرجها
وخلعت معطفها اللي اتغرق بماية المطر وحطته قدامها ع البنش
فتلقائيا منه اتضايق علشانها وحس انها ممكن تبرد
فقال ف نفسه
_المجنونة دي هتقعد ف الجو دا من غير جاكيت .. الجو تلج
وكان لسه هيروحلها
فكلمه واحد من الشباب
_دكتور أحمد في محاضرة دلوقتي لحضرتك ولا ملغية!
_لا انا جايلكم حالا
_تمام يا دكتور
اتنهد احمد ومشي علشان محاضرته
أما ملك فجالها ماجد وزعق
_ايه اللي انتي عملتيه دا يا متخلفة ها
ملك بصتله ومردتش عليه
خبط بإيده ع البنش
_ملك انا بكلمك
_متنساش نفسك يا ماجد ولاحظ اننا ف الجامعة ها
_مفيش حد عمل عاملتك دي اللي يشوفك وقتها يقول عبيطة
_ماجد بقولك ايه متغلطش انا مش بعمل حاجة غلط
ماجد خلع الجاكيت بتاعه وقال
_البسي دا هتبردي
_مش لابسة
_قلت البسي
_قلت مش لابسة
ماجد بصلها بتحذير وقال
_وربنا لو ما لبستيه يا ملك لعمل تصرف يزعلك وقدام زمايلك ولا هيهمني حد وهتشوفي كمان هعمل فيكي ايه علشان تحرمي تقفي في المطر كدا
ملك علشان عارفة ان ماجد ممكن يعملها فعلا فلبست الجاكيت بتاعه واللي كان مناسب للبنات او الشباب عادي
واول ما لبسته
ارتاح ماجد وراح لمحاضرته
فلقت ملك واحدة زميلتها بتغمزلها وبتقول بتريقة
_يا سيدي ع الحنية لا وجايبلك الجاكيت بتاعه كمان شوفتي المحن
ملك اتضايقت وقالت
_خليكي ف نفسك
واول ما شافت اشعة الشمس طلعت اخدت المعطف بتاعها وعلقته ف الشمس علشان ينشف بسرعة
__
أحمد خلص محاضرته وراح مكتبه ولقا نفسه تلقائيا باله مشغول بملك
_يا ترى عملت ايه .. معقول قضت وقتها كدا ف البرد دا... انا شاغل بالي بيها ليه .. ومشغلش ليه دي مش بنت ومش من الانسانية اني اشوفها ف البرد دا من غير جاكيت ومتصعبش عليا
قطع تفكيره دخول واحد من أصحابه فانشغل بيه وفضلوا يتكلموا
وف اخر اليوم
ملك لبست الجاكيت بتاعها وشالت جاكيت ماجد في ايديها
وبعدين قررت تتصل بيه
فرد
_اخيرا رضيتي عني وبتكلميني
_انت يا زفت تعالي خد الجاكيت بتاعك
_زفت ماشي مقبولة منك
_اخلص هتيجي تأخده امتا وانت فين اصلا انا مروحة
_طيب روحي انا اصلا مشيت وانتي عارفة اني مش بقعد لحد الوقت دا ف الجامعة.. ولا تحبي أجي أخدك
_لا متجيش
_اوك حاضر جاي
_قلتلك متجيش يا زفت
_طيب يا باي عليكي
قفلت ملك الخط
وخرجت من الجامعة علشان تركب وتروح
ولكن اول ما الدنيا مطرت قررت تلغي الفكرة
_لا مش هركب وهروح مشي في المطر الجميل دا
حطت جاكيت ماجد في شنطتها ومشيت في المطر
احمد كان مروح بعربيته فشافها
قرب منها بالعربية وفتح الازاز وقال
_مش عارف ايه سر حبك انك تقفي في المطر.. هتأخدي برد كدا
ضحكت ملك
_اهلا يا دكتور احمد ازي حضرتك... لا لو على المطر فأنا وهو اصحاب من زمان اوي.. ومقدرش يجي ومسلمش عليه واقابله بالأحضان كمان
ضحك أحمد
_كمان.. طب انتي لسه مستقبلاه الصبح مش كفاية!
_لا طبعا مش كفاية أنا بستقبله ف اي وقت
وقف احمد عربيته ونزل منها
فملك قالت
_نزلت ليه يا دكتور هتتبهدل من مية المطر
_طب كويس انك عارفة انها بهدلة ليكي .. مش كفاية بقا وتتفضلي تأخذي تاكسي وتروحي
_لا انا قررت اروح مشي انا وصاحبي
_نعم صاحبك!
_ايه يا دوك قصدي المطر
هز احمد راسه
_مفيش فيكي فايدة
_فكك من جناني يا دوك وارجع عربيتك
_طب اركبي اوصلك
_ممم ترضاها لأختك
_لا طبعا
_طب اعتبرني زي اختك بقا
قال ف نفسه بحب وهو مش حاسس
_بس انا مش عايز اعتبرك زي اختي
ورجع قالها
_طب اعتبريني انا سواق التاكسي اللي كنتي هتركبي معاه
_وجهة نظر بردو.. بس انا فعلا عايزة امشي.. وخلاص المطر هيقف خلال دقايق
_بس انتي هدومك غرقت هتبردي
_متخافش عليا يا دوك معايا جاكيت احتياطي
_ان كان كدا تمام .. يلا سلام
_سلام يا دوك
ركب احمد عربيته وعمل انه مشي وقرر يتابع ملك ويشوف هي هتعمل ايه فعلا
لقاها مكمله مشي وبعد شوية جالها موبايل
_ايوة يا لولو
_انتي فين
_انا لسه طالعه من شارع الجامعة_طب اقفي مكانك هجيلك نروح سوا
_ماشي يا لبني هنتظرك
وبسرعة خلعت ملك الجاكيت اللي اتبل ولبست جاكيت ماجد
_هلبس جاكيت الزفت ماجد قبل ما اختي تشوف بتاعي كله ماية وتفتحلي محضر
اما ماجد فاستغرب
_ وقفت ليه معقولة تعبت من البرد
واول ما شاف عربية مقربة منها وسايقاها بنت وشاف ملك بتركب معاها
اتنهد براحة ومشي بعربيته
وفي الطريق كان بيأنب نفسه
_انا ايه اللي بعمله دا ليه مهتم بيها وشاغل نفسي بأمرها اوي لا وكمان واقف اشوفها بتعمل ايه جرى ايه يا أحمد مالك ايه اللي جرالك
رد ع نفسك
والله ما انا عارف البنت دي شقلبت كياني بجنونها اللي ملوش زي
___
رجعت ملك البيت مع اختها لبني
وبالليل
وهي بتتعشى مع عيلتها خبط ماجد
فملك قالت بضيق_ ييه ايه اللي جابه دا دلوقتي
سمعها ماجد فقال بابتسامة
_ايه جاي اخد الجاكيت بتاعي بلاش اخده يعني
بصتلها امها باستغراب
_جاكيت ماجد بيعمل ايه معاكي
ماجد قال بخبث د
_اقول لأمك الجاكيت بتاعى معاكي ليه
ملك بصتله برجاء انه ميقولش
فقرب منها وهمس
_سامحيني الاول
_لا
_خلاص هقول لأمك بقا واستلمي بقا الدش اللي هتأخديه
_ماجد!!
ضحك وقال
_خلاص صعبتي عليا .. ها اقعد اتعشى ولا غور
_اتنيل اقعد
أمها قالت_مردتيش عليا يا ملك
لبنى قالت
_اكيد ماجد كان سايبه معاها يا ماما
ماجد همس تاني لملك
_اختك كشفتك بس بتداري عليكي هي كمان
_على فكرة انا معملتش حاجة غلط
_طب قولي لامك يا اختي
_طب كل وانت ساكت لاما تقوم تروح
_طيب هسكت ياباي عليكي
__
تاني يوم ملك كانت ف الجامعة جه حارس المدرج وقال
_الانسة ملك صابر تروح مكتب دكتور احمد
ملك ف نفسها
_غريبة دكتور احمد عايزني ف ايه
ولما راحت عنده
لقته بيبصلها بغضب شديد
فقالت في نفسها
_استر يا رب ماله ضارب بوز ليه
قام وقف وقرب منها ووراها موبايله
_شايفة الصورة دي
قالت بصدمة
_دي صورتي بتعمل ايه معاك
_ صورتك نازلة ع الفيس وانا علشان الطلبة بيمنشنوا ليا ف جروب دفعتك ع الأسئلة وانا بدخل اجاوبهم فشوفتها بالصدفة
عاجبك التعليقات السخيفة اللي ع الصورة تحبي اقرألك بعض من التعليقات دي.... يا ريتني انا كنت بين ايديكي
ياريتي كنت المطر علشان تاخدني بالحضن دا
يا بخت المطر.... اكمل... ولا كفاية
بلعت ملك ريقها بحرج
_يا دكتور انا.. أنا مليش ذنب ومعرفش حاجة عن الصورة دي ولا اللي نشرها
زعق وقال
_ملك ممنوع تعملي اللي بتعمليه دا تاني
_دكتور انا متعودة ع كدا وبحب المطر و..
قاطعها وقال بحدة_مش ف مكان عام ووسط الطلبة انتي فاهمة... يلا اتفضلي ع محاضرتك
جت تتكلم فقال
_قلت اتفضلي
نزلت ملك وهي متضايقة من اللي نزل صورتها ع جروب الدفعة
فجت تدخل مدرجها
فلقت اللي بيمسكها من دراعها بحدة
فشهقت بخضة
_ماجد في ايه
زعق وقال
_عاجبك اللي عملتيه دا يا نيلة انتي
_ايه في ايه ... وسيب ايدي يا ماجد
_اسيب ايدك ايه دا انا هقطم رقابتك النهاردة.. ورب العزة لو شوفتك واقفة ف المطر تاني وبتلفي حوالين نفسك وفاتحة دراعاتك كدا لأكون كاسرهالك فاهمة
شالت ايديها
_ماجد انا مش هسمحلك تكلمني بالطريقة دي
_عايزاني اكلمك ازاي بعد التعليقات الزبالة اللي شوفتها ع صورتك.. شوفتها بالصدفة الشباب مشيرينها لبعض ف المحاضرة كان هاين عليا اسيب المحاضرة واجي أخلص عليكي وارتاح من جنونك دا
_وليه متقولش يا أستاذ انك انت اللي منزلها ماهو مفيش حد يجرؤ يعمل كدا غيرك
مكانش مصدق انها بتشك فيه هو انه يصورها وينزل صورتها
فقال بحزن
_انتي تصدقي اني أنا اللي انزل صورتك يا ملك!! يعني هنزلها وأجي ازعقلك مثلا... لا وبتقوليها بالرغم من العلاقة اللي بتجمعنا تظني اني أعمل كدا... انا مش مصدق نفسي ومصدوم فيكي بجد.. يا خسارة يا ملك بس يكون في علمك طالما ظنيتي فيا كدا يبقى من النهاردة تنسيني خالص يا ملك .. انسي انك تعرفي واحد اسمه ماجد في يوم من الأيام
قالها ماجد وسابها ومشي ومسبلهاش الفرصة انها تتكلم
أما احمد اللي كان خرج من مكتبه علشان عنده محاضرة لدفعة ملك فشافها بتتناقر مع ماجد
واول ما مشي ماجد راحلها احمد وقال وهو بيبصلها باستحقار
_الظاهر اني كنت اخد مقلب فيكي.. مرة تنزلي صورك ع الميديا ومرة تلعبي في المطر ومرة تكلمي شباب للأسف طلعتي ... ولا بلاش.. اسمعي انتي مش مسموح ليكي تحضري ليا اي محاضرة بعد النهاردة
قالها ودخل المدرج
جت تدخل وراه
_يا دكتور.. حضرتك...اا
لقته قفل باب المدرج ف وشها وهو بيقول
_قلتلك مش مسموح ليكي بحضور محاضراتي
قعدت ملك ع السلم وهي بتقول بضيق
_هو ايه اللي بيحصل دا.. دكتور احمد وماجد زعلوا مني والا مور اتعقدت ليه كدا ومين الغبي اللي نزل صورتي من غير اذني... طب هعمل ايه دلوقتي هصلح الأمور دي ازاي بس دبرني يارب
فضلت مكانها لحد ما أحمد خلص محاضرته وخرج فقامت وقفت وجريت عليه
_دكتور احمد ممكن حضرتك تسمعني
شاور لها بإيده وتابع طريقه
_مش عايز اسمع منك حاجة
_يا دكتور حضرتك فاهم غلط.. ااا
_اااش ولا كلمة قلتلك مش عايز اسمع صوتك اتفضلي من قدامي ومشوفش وش واحدة زيك قدامي خالص مفهوم
اتضايقت _حضرتك بتكلمني ليه كدا انا مسمحلكش
قال باستخفاف
_انتي الظاهر نسيتي انك بتكلمي أستاذك .. بس هقول ايه ماهو انتي طلعتي معدومة الاحترام والأدب.. بس يكون في علمك.. مبقاش أنا دكتور أحمد اللي ما فصلتك من الجامعة هنا خالص
قالها وسابها ومشي
وملك كانت هتعيط
لكن فجأة جه ف بالها حد معين ففكرت تستعين بيه
ركبت تاكسي وراحته
وهناك في مكتبه في القسم اول ما شافها
_ملك ايه اللي جابك
_ايه مجيش اسلم عل الظبوط ابن خالتو حبيبتي
_هاتي من الاخر يا ملك
_بص بقا من غير زعيق ولا صوت يعلى ولا مد ايد
_اه يبقى اكيد عاملة عاملة وقعتك سودا
_لا وربنا دا دا سوء تفاهم انا معملتش حاجة
_اشجيني يا ختي
_بص انت عارف اني بحب المطر قد عنيا ومش بقدر امنع نفسي اني مقفش ف المطر .. ففي الجامعة في حد غبي نزل صورتي وانا واقفة ف المطر وفاتحة دراعاتي وكدا يعني
_ايه ياختي !
_استنى بالله ما تتعصب انت كمان دا انا جايالك تساعدني
_اللي صورك دا بيبتزك بالصورة
_لا دا نزلها ع الفيس وماجد شافها وبهدلني وانا ف الاول فكرته انه بيعمل فيا مقلب من بتوعه وهو اللي نزلها فزعل مني اني ظنيت انه هو اللي نزلها وقالي انساه ولا كأني أعرفه قبل كدا تصور!!
_له حق والله اصلك معتوهة بقا تشكي ف ماجد انه هو اللي ينزل صورتك يا متخلفة
_اهو اللي حصل بقا
_طيب يعني عايزاني اصالحكم بسيطة
_ودكتور احمد
_مين دا كمان
_دكتور بيدرسلي في الجامعة شاف الصورة وشافني واقفة مع ماجد فظن اني بنت مش كويسة وزعقلي ومنعني من حضور محاضراته وقال انه هيسعى انه يفصلني من الجامعة نهائي تصور
_طب والله دكتور جدع ومبيحبش الحال المايل
_انت معايا ولا معاه
_مع الحق
_بس انا مليش ذنب وهو فاهم غلط
_والمطلوب مني ايه
_تفهمه الحقيقة
_طب ما تفهميه انتي
_مش عاطيلي فرصة
_اسمه احمد ايه هاتي اسمه بالكامل
_هتساعدني وتحكيله الحقيقة؟
_هشوف
_لا بالله عليك ساعدني هو انا مش زي اختك الصغيرة
_ماشي
_هتساعدني
_اتنيلي مليني اسمه
_أحمد عبد السلام عاكف تقريبا
_طب اتنيلي امشي يلا مش فاضيلك
_ايه
_هو ايه اللي ايه عايز اكمل شغل
_انت قلت هتساعدني
_اعتبري موضوعك اتحل من ناحية احمد لكن ماجد مع نفسك انتي وهو اتصرفوا مع بعض
_مم ماجد مش هيصفى بسهولة
_لو صفيتي انتي هيصفى واحدة قصاد واحدة
وقفت وبصتله بحزن فقال
_ماجد بيحبك وميرضاش ع زعلك يا ملك بدليل انه سمع كلامك ومسافرش... روحي كلميه واعتذريله وهو هيسامحك
_انت شايف كدا
_اه ويلا بقا امشي
_ودكتور احمد
_قلتلك محلولة غوري بقا يا مصيبة
__
رجعت ملك البيت وحاولت تتصل بماجد لكنه مكانش بيرد حاولت كتير لكن ماجد متجاهلها تماما
فقررت انها تروحله
فنادت ع امها
_ماما انا رايحة لخالتو اشوف ماجد
_طب ابقي سلميلي على خالتك
_اوك يا بيرو سلام
__
ولما وصلت وفتحت لها خالتها
_خالتو ديلا العسل يا ناس
_ملوكة قلب خالتو ادخلي يا حبيبتي
لسه هتدخل لقت ماجد خارج من اوضته وف طريقه لبرا فقالت
_ماجد
اتجاهلها
فلحقت بيه ووقفت قدامه
_ماجد انا اسفة
بعدها من طريقه بضيق وقال
_ابعدي يا بت من طريقي
لكنها وقفت تاني_مش هتمشي يا ماجد وانت زعلان مني مش هيحصل مش قصدي والله اني ازعلك.. ماجد انت عارف معزتك عندي
_يا شيخة طب مش زعلانة مني علشان نزلت صورتك
_مش انت يا ماجد وانا متأكدة مليون ف المية انا اسفة انا مش عارفة الكلمة طلعت مني ازاي ماجد انت مش عارف انت بالنسبة ليا ايه
في الوقت جه وليد كان داخل البيت مع دكتور احمد اللي اتضح انهم اصحاب من ايام ثانوي ولسه ع علاقة ببعض فعزمه وليد ع الغدا علشان يفهمه موضوع ملك بشكل تفصيلي
فسمع اللي دار بين ملك وماجد فاتصدم ف مكانه
ماجد قال
_وانتي حياتي كلها يا ملك.. قد ايه
كلمتك دي كسرتني اوي
ملك قربت منه وحضنته
_اسف والله حقك عليا سامحني
أحمد حس انه هيتخنق فحاول يفك الكرفات بتاعته
وليد لاحظ ضيق احمد فاللي شك فيه دلوقتي بس اتاكد منه فابتسم بمكر وقال
_احمد انت كويس
احمد بصوت مخنوق
_ايه اللي بيحصل دا انت ازاي تسيب دا يحصل يا وليد انت مش قلت ان ملك تبقى بنت خالتكم.. عاجبك الاحضان دي وكدا عيني عينك ماشاء الله على الأدب والتربية
ملك بصت ع احمد وقالت بإحراج
_هار اسوح دكتور احمد بيطلعلي منين كدا
ماجد غمزلها
_هيطير رقابتك يا قطة
_لا بالله عليك قوله الحقيقة
_بشرط
_اخلص
_قولي انك مش زعلانة مني انتي كمان والماية ما بينا هترجع لمجاريها
_اوعدني انك مش هتسافر وتسيبني
_اوعدك
قالها وحضنها تاني
احمد مقدرش يتحكم ف اعصابه وقرب من ماجد وبعده عن ملك وعطا لماجد بالبونية
فوليد جري بسرعة ومسك احمد د_احمد اهدى مش هينفع كدا
_اومال ايه اللي ينفع عاجبك المسخرة دي
_ ماجد يبقة اخو ملك في الرضاعة يا أحمد... خالتي رضعت ماجد وملك يعني ماجد اخو ملك ولبني خطيبتي يا أحمد
أحمد حس بالاحراج فاعتذر لماجد
_احم معلش انا مكنتش.. انا فكرتكم...
ماجد بتفهم
_ولا يهمك يا دكتور
أحمد علشان يغير الموضوع
_احم انا عرفت الولد اللي نزل صورة ملك وحولته للتحقيق
ملك اتنهدت براحة وقالت
_حيث كدا بقا يا دوك انت مدين لأحداهن بالإعتذار
ابتسم أحمد وقال
_فعلا لكن اعتذاري هيكون بطريقة تانية خالص
وبص لوليد وقال
_ انا يسعدني اني اطلب ايد انسة ملك بنت خالتك
_وانا مش هلاقي لبنت خالتي عريس أحسن منك بس ناخد رأيها ورأي خالتي الأول
ملك اتحرجت ووشها جاب الوان
اما ماجد فمسك هدوم ملك وقال
_بت انتي ايه اللي بينك وبين دكتور أحمد خلاه ينكفي بالسرعة دي ع وشه
احمد قال بحب
_سيبها يا ماجد متمدش ايدك عليها
ملك مش محتاجة انها تعمل حاجة علشان تلفت نظري ليها.. ملك بتلقائيتها وعفويتها وعقلها الطفولي المرح قدرت تسحرني وتخطف قلبي وتسكن جواه كمان
ماجد غمزلها
_يا سيدي يا سيدي دا بيقول اشعار
أحمد
_ايه رأيك يا ملك
_احم الرأي رأي حضرة الظابط
_ عايز اسمعها منك
ردت بحرج موافقة
_ياااه انا اسعد انسان ف الدنيا
بس بشرط
توعدني انك كل يوم تخرجني نجري مع بعص تحت المطر
_نعم
_دا شرطي الوحيد
__
وبعد كم شهر من الجواز
كانوا بيجروا مع بعض تحت المطر فأحمد اتزحلق ووقع
_ااه منك لله ياللي ف بالي
ضحكت عليه ملك
_هات ايدك اساعدك
فوقعت هي كمان جنبه فانفجروا ف الضحك
احمد قال
_ عاجبك كدا منظرنا قدام الناس
ضحكت ملك بتسلية
_حد هيصورنا ويحطها ع المديا
قام احمد يجري
_ يافضيحتك وسط الطالبة بتوعك يا قرمط انا ايه خلاني اتجوز واحدة هبله بس عقلي دا كان فين
انفجرت ملك في الضحك
فأخدها ف حضنه وقال
_ياااه مستعد اوقع نفسي كل يوم في الطينة دي لو هشوف ضحكتك الحلوة دي دايما...
وتمت
#أسماء_عبد_الهادي
https://www.facebook.com/groups/325940622067858/?ref=share
لينك جروبي ❤️
https://roaista.blogspot.com/?m=1
لينك المدونة
https://www.wattpad.com/user/om_aisha?utm_source=android&utm_medium=link&utm_campaign=invitefriends
لينك واتباد