أختي قنبلة ذرية
للكاتبة أسماء عبد الهادي
اسكريبت أختي قنبلة ذرية
سيلا الاأخت الصغيرة لشابين ياسين واخ الأكبر اسمه امجد سيلا نفسها تدخل كلية الشرطة بس امجد وياسين عارضوا الفكرة
_ ليه لا بس يا امجد مالها يعني كليه الشرطه
_ قلت لا يعني لا يا سيلا من قله الكليات يعني عايزه تدخلي كليه شرطه
_ايوه وفيها ايه دي حلم حياتي وانت عارف من وانا صغيرة وانا نفسي ادخل كليه الشرطه
ياسين قال
_ ايوه عارفين طول عمرك كنتي مفتريه وبتضربي العيال وبتعدميهم العافيه ده حتى الاولاد يا شيخه ماكنتيش عاتقاهم
_اينعم اومال اسيبهم يعلموا على البنات واسكت...طب تعرف انا عايزه ادخل كليه الشرطه بالذات ليه... علشان الرجالة بالذات
_ ليه بقى مالهم الرجالة ان شاء الله
_ولا حاجه متزمتين وشايفين نفسهم قوي وانهم مفيش غيرهم وان هم محور الكون وبس انا بقى هاوريهم اني اقدر اعمل زيهم وأكتر
امجد قال ببرود
_ تقدري تعملي كل ده وتثبتي نفسك من غير ما تدخلي كليه الشرطه بطلي حجج
_أمجد علشان خاطري انا طول عمري باحلم ادخل كليه الشرطه زيك اشمعنى انت يا اخي
_ علشان انا راجل هاقدر اتحمل صعوبات كليه الشرطه والتدريبات الشاقه اللي بنقوم بيها هناك لكن انتي هتتحملي ازاي انت ماتعرفيش احنا بنقابل ايه ولا بنعاني ايه هناك واستحاله اوافق ان اختي تتعرض لحاجه زي دي اقفلي النقاش في الموضوع ده
_علشان خاطري يا أمجد
_قلت لا يعني لا
سيلا لكزت ياسين في دراعه
_متقول حاجة يا زفت واقف تتفرج
ياسين
_ااا احم أنا بقول يعني يا أمجد نسيبها تعمل اللي تحبه
أمجد بصله بنظرة مرعبة فغير ياسين رأيه علطول
_بنت يا سيلا اللي يقوله أمجد اخوكي الكبير يتسمع فورا
سيلا كانت هتعيط
_يوووه وربنا انتوا ظلمة ومفترين وانا مش قاعدة ف البيت ده مرة تانية
ياسين قال
_بت يا سيلا خدي هنا يا بت ،رايحة فين
_رايحة في داهية ملكش دعوة
_الحق اختك يا أمجد دي مجنونة وتعمل أي حاجة في نفسها
أمجد
_كبر دماغك أختك سيلا ما انت عارفها بتطلع تطلع وتنزل ع فشوش
_طب ما تسيبها تحقق حلمها يا أمجد وانت هناك وهتحميها وتأخد بالك منها
_لا يا ياسين أختك رقيقة ومش هتتحمل
_مين اللي رقيقة سيلا ههه دي أرجل مني ومنك يا بني
ضربه ع دماغه
_بس يالا متقولش على اختك كدا
__
سيلا خرجت من البيت وهي مخنوقة
_اوف بقا وبعدين اقنع أمجد ازاي ياسين أمره سهل انما أمجد اللي دماغه قفل
ولما قابلها حد يعاكسها
_على فين يا جميل
نزلت فيه ضرب
_وربنا ما انا سايباك تعالى هنا
ونزلت فيه طاخ طيخ
الناس كلها اتلمت والصوت وصل لأمجد وياسين
ياسين
_سامع اللي انا سامعه
_ايه خناقة في الشارع عادي
_اه عادي لكن اللي مش عادي ان اختك برا يعني اكيد مشتركة ف الخناقة هو انا تايه عن سيلا
_يخربيتها وقعتها طين المتخلفة دي، تعالى بسرعة
راحوا كان الراجل بيخلص الولد من ايد سيلا
_خلاص يا بنتي انتي عدمتيه العافية كفاية
_لا وربنا ما سايباه يا عمو علشان يقل ادبه تاني
_لا يا بنتي بعد اللي عملتيه فيه مش هيقدر يتكلم
_هو انا لسه عملت حاجة يصبر عليا بس
الولد صرخ
_لااا حشوها عني والله حرمت حرمت
_مش هسيبك الا لما تتأسف يا كلب
_اسف اسف سيبني الحقوني حد يخلصني منها عااااا
ضحك ياسين وقال
_شوفت اختك الرقيقة يا سي أمجد باشا
أمجد راح عندها
_سيلا خلاص سيبيه
_ابدا لا يمكن انا لسه معلمتوش الأدب
زعق أمجد وقال
_سيلا انا قلت سيبيه
_يوووه لو مكنتش تحلف بس
اول ما سيلا سابت الولد طلع يجري
الراجل قال
_جدعة يا بنتي انك بتعرفي تأخدي حقك بنفسك بس مش كدا براحة شوية الواد كان هيفطس في ايدك، الرحمة حلوة
ضربها أمجد وقال
_عاجبك كدا جايبالنا الكلام
_الله اومال اسيبه يعاكسني واقف اتفرج
جه ياسين وقال
_لا ازاي ده انتي متبقيش سيلا لو مكسرتلوش ضلوعه
_والله يا ياسين كنت ناوية اعمل كدا بس اخوك اللي معطانيش الفرصة
امجد زعق
_سيلا اتلمي وقدامي ع البيت
_اتلميت يا باي عليك
مشيت شوية وعل الباب
_اه صح انا مخصكاكم ومش راجعة معاكم البيت اوعى كدا انت وهو
_سيلا
_اوعى كدا لا سيلا ولا بتاع
_سيلا وبعدين معاكي بقا
_لا انا زعلانة ومش هتصالح كدا بالساهل
_طب عايزة ايه يعني
سيلا بصت لياسين اللي قال
_عرفت طلبك يا طفسة وربنا طفسة
امجد
_شوف اللي هي عايزاه وهاته ليها خلينا نخلص، ونعدي اليوم المنيل بتاعها ده
_دي علشان تتراضى يا بني عايزة اكل
_وايه المشكلة هاتلها اللي هي عايزاه
_منين ماهي الطفسة دي منفضاني اول بأول
خرج أمجد من جيبه فلوس وقال
_خدوا امسكوا حرام عليكم جننتوني اليومين اللي أخدهم أجازة من التدريبات واقول هرجع البيت استجم وأقعد في راحة، تهبلوني فيه وربنا التدريبات ارحم منكم جتكم الارف
سيلا _هدى اعضاءك يا أمجد باشا
_انتي تكتمي خالص مسمعش صوتك فاهمة
_الله الحق عليا
_سيلا غوري من وشي
_طيب بس متزقش
_ياسين اخفي البت دي من وشي
ياسين مسكها زي المخبرين
_تعالى يا مصيبة لما اجبلك تطفحي
_هطفحني ايه يا سينو
_ سينو في عينك طب علشان الكلمة دي هطفحك فول وفلافل
_وربنا أصرخ والم عليك الناس هنا واقول انك خاطفني فول وفلافل ايه.. ده أخوك عاطيك ٢٠٠جنيه يعني تجيبلي ساندويتيش محترمين
_يخربيتك مجرمة وتعمليها، بس انتي ساندويتشين وانا والغلبان اللي في البيت ناكل ايه ؟
_وانا مالي اتصرفوا هوا انا خلفتوا ونسيتكم
_ايوة فعلا معاكي حق، حسبي الله ونعم الوكيل، الناس تقول عندها اخوات بنات رقيقة ونسمة تيجي تشوف البلوة اللي عندنا
_بس تنكر يا سينو اني بلوة قمر يالا
_قمر بالستر ياختي انجري قدامي
_لا وربنا ما ماشية الا لما تقولي الأول
_اه صح انتي عسولة فعلا جميلة اوي ياااه انا منبهر هموت من الانبهار ايه الحلاوة دي
_سينو احنا هنهرج
_اعملك ايه ما انتي اللي عايزة كدا
_عايزة الحقيقة يا متخلف
_اقولك الحقيقة ولا تزعليش
_قول قول علشان انسفك وانت واقف
_لا وعلى ايه الطيب أحسن
في المطعم
_سينو ما تشخلل جيبك علشان نجيب ساندويتش لأمجد حرام
_ليه ما تجبيله
_اجبله منين، انا حجزت ليا ساندويتين الواحد ب١٠٠ جنيه اتصرف بقا انت واخوك
_نعم ياختي صرفتي ال٢٠٠ كلها ليكي لوحدك
_وهما ٢٠٠ دول حاجة يا سينو، شخلل جيبك بقا ودلع نفسك انت واخوك حرام عليك ده اخوك الكبير
_يا شيخة حرمت عليكي عشتك، وربنا انا مفلس ده انتي مقشطاني اول بأول
_على فكرة انت بخيل سيكا
_بخيل ماشي ياختي
_انا هجيب الساندويتشات واياكي تهوبي ناحيتهم بقولك اهو
_لا أنا معايا بتوعي متخافش
_لا أخاف
_عيب عليك ده انا أختك سيلا
_سيا اطلعي من دماغي
_الله هو انا كنت التيشريت بتاعك علشان اطلع من دماغك
كان في شاب قاعد في ركن لوحده بيأكل ساندويتش ومتابع الحوار ما بين الاخوات من اوله ورغم الجدية اللي ظاهره عليه الا انه مقدرش يمنع نفسه من الضحك على تصرفات سيلا اللي جننت ياسين _هاهاها
اشتروا الاكل وخلاص هيمشوا كان فيه ست معدية فجه واحد نشال وشد الشنطة وطلع يجري
_الحقوني شنطتي الحقوني
سيلا قالت
_سينو امسك الساندويتشات دي كدا بس ايدك لو اتمدت عليهم هقطعهالك وربنا
_رايحة فين يا مصيبة
_رايحه ارجع للست شنطتها
_ازاي خدي يا بنت هنا سيلا بلاش تهور سيلاااا
سيلا مسمعتش كلامه وجريت ورا النشال لحد ما سبقته ووقفت قدامه
_على فين يالا
_ابعدي يا قطة انتي من طريقي لاخسن اعورك
_بجد طب وريني
_هزعلك
_قلتلك وريني شطارتك
النشال حب يمشي من الجنب التاني سيلا سبقته وعنقلته
وشدت منه الشنطة
النشال قال_انتي اللي جنيتي علي روحك
_مفيش فايدة انت بوء ع الفاضي قلتلك وريني
جه يضرب سيلا كانت بتتفاداها بكل سهولة
وبعدها ضربته بمهارة عالية
أما زين اللي كان بيأكل الساندويتشات وبيراقبها باعجاب شديد راحلهم ووقفها وقال._كفاية كدا سيبهولي واتفضلي انتي ارجعي مع اخوكي الساندويتشات هتبرد
_لا يمكن اعلمه الأدب الاول
زعق وقال
_قلت ارجعي
_الله طب بتزعق ليه
_اتفضلي حالا
_طيب ماشية، اعوذ بالله ماله كدا عامل زي أمجد اخويا بالظبط ، وشايف نفسه اوي
ياسين قرب منها وضربها على دماغها
_يا متخلفة بتجري ورا حرامي افرض كان معاه مدية وعورك بيها
_وايه يعني كنت هخاف ولا هخاف منه
_أمجد لو عرف مش هيسكتلك ماهو مش كل مرة نسللك من مشكلة شكل
_الله وانا مالي الحق عليا اني بساعد الست المسكينة دي وبرجعلها شطنتها
_اتفضلي يا طنط
_شكرا يا بنتي ربنا يحرسك ويحميكي لشبابك
_ها خلاص رجعتي الشنطة اتفضلي بقا
_استنى اشوف أخينا اللي هناك ده هيعمل في الحرامي ايه ليكون تبعه
_امشي بقا يا سيلا
_اصبر بس يا سينو
راحت لعند زين اللي كان بيشاور لرجالته تيجي تأخد الحرامي وقالت
_انت يا كابتن
_بتكلميني انا
_اه انت
_انتي لسه واقفة بتعملي ايه مش قلتلك روحي لأخوكي
_الله وانت مالك انا لازم م اطمن ع الحرامي واشوف هتعمل فيه ايه مش ممكن تكون شريكه
زين قال بامتعاض
_شريكه .. اه ده باينه مرار طافح
اطلع يابني بالبوكس
سيلا قالت ببلاهة
_ايه دا .. ده طلع ظابط بجد
_ااه طب خلاص يا باشا اتأكدت خلاص ان الحرامي في ايد امينة
_لا يا شيخة
_اها والله يلا سلام يا باشا
_تعالى هنا
ياسين حط ايده على دماغه
_روحنا ف داهية
_ايه يا باشا انا مروحة الساندويتشات هتبرد يرضيك
_ممنوع تقحمي نفسك في الخطر تاني انتي فاهمة سيبي كل حاجة لناسها
_الله يعني أسيبك الشنطة تتسرق، وبعدين ن٦ا الشرطة بتيجي بعد الهنا بسنة
_نعم
_امم قصدي يعني الخدمة في شرطة الشعب قصدي الشرطة في خدمة الشع....
_غوري من وشييي
ياسين شدها بعيد
_تعالي بقا وربنا شكلك هتضايقه ويرميكي ف البوكس مع الحرامي
_اوعى كدا سيبني، ده على فكرة سمج ورخم اوي ده بدل ما يشكرني اني ساعدته في مهمته ومسكت له الحرامي ، لولايا كان زمان الحرامي هرب بالشنطة
_سيييلا .. امشي قدامي وانتي ساكتة
_اه يلا وربنا جعت .
_يارب صبرني يارب
___
تاني يوم
ياسين صحى من النوم لقا اخته في اوضته
_بتعملي ايه في اوضتي يا مصيبة
_ايه يا سينو ده بدل ما تقولي اتفضلي نورتي اوضتي
_زفتة اطلعي برا مش ناقصة جنان ع الصبح
_لا مش قبل ما اخلص اللي انا جاية عشانه
_زفتة بقولك ايه انا النهاردة اجازتي وانا عايزة انام شوية ها، يارب البعيد يحس
_طب ما تنام يا سينو انا جيت جنبك ياخي هو ايه اصله ده
_لا كدا كتير يارب صبرني ومخلصش عليها
_في ايه يا سينو ماخليك هادي كدا
_افهم بس انتي جاية اوضتي تعملي ايه ها
_بختار هدوم ليا
_ليه هو دولابك انتقل اوضتي وانا مش واخد بالي ياماما ولا ايه
_لا يا سينو اصل انت عندك گم تيش..
_استني متكمليش.. اياكي تقولي انك عايزة تلبسي من هدومي
_وليه لا يا سينو متبقاش بخيل كدا
_وربنا لو أخدتي حاجة من هدومي لعلقك يا سيلا لحد ما يبنالك صحاب
_فيها ايه بس يا سينو انت مش اخويا وحبيبي ونتشارك أشياءنا مع بعض
_نتشارك!! مين العبيط اللي ضحك عليكي وقالك كدا
_هما الاخوات كدا لازم يتشاركوا
_لا يا روحي الاخوات علشان كدا
ومسك المخدة رماها بيها
_اطلعي برااا يا سيلاااا
_يوووه وربنا أنا عايشة مع عالم مفترية وظالمة
_اطلعي برا يا زفتة
_طيب طالعة يا باي
_سيبي اللي في ايدك ده
_مفيش في ايدي حاجة
_ايدك التانية
_لا يا سينو خليك جدع انا عيني هتطلع عليه من اول ما انت جبته
._انا لسه ملبستوش يا مفترية ولا مرة
_وايه المشكلة ميغلاش عليا
_لا مبهدهاش بقا طالما طيرتي النوم من عنيا والبرج اللي فاضلي في عقلي
. وجري وراااها
وهي هربت
_عااااا
مسكها من هدومها... هاتي القميص
_عااا بس بقا يا سينو علشان أنا غلبانة وطيبة تقوم تيجي عليا
_غلبانة وربنا انا اللي غلبان هاتي يا بت القميص بقولك
_سينو سيبهولي بقا
وربنا هزعلك
_عااا يا امجد خليه يسيبني
جه أمجد اللي كان بيشرب قهوته في الفراندا
_في ايه يا جوز مصايب انتوا الاتنين في ايه
_امجد خلي اخوك يسيني وبلاش يتشطر عليا اكمني ضعيفة و
كمل ياسمين
_ضعيفة وغلبانة اتمسكني يا بت اتمسكني، اطلعي بالقميص بتاعي
_سيبها يا ياسين وفهمني في ايه
_مش سايبها الزفتة دي الا لما ترجع القميص الجديد بتاعي
_الله يعني مش انا اختك ايه يعني لما تسلفهولي البسه مرة .
امجد بصلهم بضجر
_كل الهليلة دي علشان قميص
سيلا
_شفت يا أمجد عامل حوار علشان حاجة هايفة ازاي
_رجعيله قميصه يا سيلا
_ايه
ياسين ضحك
_هيهيهه هاتي القميص بقا
_لا يا أمجد انت بتقول ايه .. هستلفه لابسة مرة واحدة بس وارجعه
_وربنا ولا ربع لابسة هاتى يا بت القميص
_اخلصي يا سيلا وبلاش صداع ع الصبح
_لا مش هيحصل انا حطيته ف دماغي خلاص وخلاص رتبت هلبس عليه طرحة ايه وسليبر ايه
ياسين
_السليبر ده اللي هنزل بيه على دماغك دلوقتي
_شايف يا امجد اخوك بيقولي ايه.. طب ترضاها ليا يكلمني بالاسلوب ده
_سيلا لمي الدور ورجعي ليه حاجته
_طب انا عايزة اخرج اخرج بإيه بقا دلوقتي
ياسين شد منها القميص
_اتصرفي دولابك ماليان ومكليش دعوة بدولابي
_شايف يا امجد
_تعالى هنا انتي رايحة فين ومن غير اذني
_احم هو انا مقلتلكش
_لا تصدقي مقلتيش
_يخص عليا نسيت
_اتعدلي يا سيلا.
_اصلي رايحه النادي انت عارف بقى اجازه وكده
_ لا مفيش نادي النهارده
_ ليه بقى ان شاء الله
_ علشان واحد صاحبي جاي لي وعازمه النهارده على الغداء
_ ايوه ايه المطلوب مني يعني _سيادتك طبعا اللي هتعمليله الغذاء
_يا سلام واشمعنى انا اللي أعمل بقى ان شاء الله.. ما تشتري جاهز انت عايز تدبسني انا ليه
_ لا ما حدش هيعمل الاكل غيرك
ياسين قال
_ يا ابني ريح دماغك وهات جاهز او اعزم صاحبك بره انت مش عارف اختك وعكها بالاكل عامل ازاي
سيلا
_على فكره انت كذاب يا صلاح انا اكلي لا يعلى عليك تنكر تنكر اني اكلي كويس
امجد
_حيث كده بقى تدخلي على المطبخ وتشوفي شغلك من دلوقت
_ لا انت بتهزر انا مش هاعمل حاجه
_اسيل انا قلت ايه
_طب تدفع كام الاول
ياسين
_ ماديه حقيره
_ اتلم انت يا سينو
امجد قال
_ هديكي اللي انتي عايزاه يا سيلا بس ظبطي الاكل ها
_عيوني يا قلبي ده انا هاشرفك ياسين قال
_ والله انا مش خائف الا منك ربنا يسترها انا بقول اطير انا
_اه يا ريت تريحنا والله
_لا تطير انت ايه انت هتروح تجيب لاختك الطلبات اللي هي عايزاها
_نعم لا لا مش هيحصل
_ ياسين انا باقول ايه بلاش تخليني اتعصب عليك
_وبعدين بقى في الاصطباحيه العسل بتاعتكم دي ...هو في ايه يا جدعان
سيلا ضحكت وقالت
_احسن تستاهل علشان مسمحتليش اخذ القميص بتاعك
_ده بعينك
_ ماشي يا ياسين ماشي
ياسين نزل جاب الطلبات لسيلا
وسيلا دخلت المطبخ تحضر الاكل لحد ما خلصت كله
دخل ياسين وقال
_ ها ايه الاخبار هترفعي راس اخوك ولا هتخلي صاحبه يقول ان اختنا فاشله ما بتعرفش تعمل حاجه
_فاشله في عينك ده انا استاذه في الطبخ يا ابني
_لا حيث كده بقى احكم بنفسي
_ طب دوق كدا
_ايه ده بجد انتي اللي عامله الاكل ده
_علشان تعرف انك ظالمني انت واخوك
_طب ايه حرمانا من الجمال ده ليه كل يوم
_يا ابني انا مش باعمل حاجه الا بمزاجي
_ قصدك مش بتعملي حاجه غير لما تاخذي المقابل
_ اي نعم
بعد شويه جه صاحب امجد واللي هو طلع زين الظابط اللي كان ف المطعم
على السفره امجد وزين وياسين كانوا بياكلوا
زين اعجب بالاكل قوي وقال
_الاكل جميل جدا تسلم يد اللي عمله
امجد
_بالهنا والشفا انا مبسوط ان الاكل عجبك ...نورتنا يا زين النهارده والله تسلم يا صاحبي
ياسين
_ قال اهلا وسهلا يا زين باشا امجد قال لي انك لسه منقول هنا قريب
_ الله يسلمك يا ياسين اه انا كنت في السويس واتنقلت هنا قريب
_ على كده بقى انتم كنتم اصحاب في في الكليه مش كده
_ اه بالظبط كدا ومن يومها وامجد بقى اعز اصحابي... هو انا ليه حاسس ان انا شفتك قبل كده
ياسين قال وهو بيهرش في دماغه
_ اه صح تقريبا اتقابلنا بس ما تكلمناش مع بعض
_ اه فرصه سعيده يا ياسمين
امجد قال
_ دوق بقى كده الحلو وقول لي ايه رايك
_اممم لا بجد فظيع انا لازم اشكر اللي عمل الاكل ده ولا انت جايبه من بره
_ لا بره ايه واحنا عندنا التوب شيف هنا في البيت
_حيث كده بقى انا لازم اشكره بنفسي
ياسين قال
بصوت واطي
_ ما بلاش
امجد قام من مكانه وراح لاخته سيلا
_تعالي سلمي على زين صاحبي عايز يشكرك على الاكل
سيلا كانت مشغوله في الموبايل في يديها وقالت
_بلغوا ان شكروا وصل....
_ما تقومي يا بنتي اتحركي
_يوه يا امجد وانا لسه هاقوم انا تعبت انا طول النهار واقفه في المطبخ
_وانا باقول لك تعالي اعملي ايه...انا باقول لك تعالي سلمي عليه وامشي
_يوه ماشي جاية
أمجد
_زين دي اختي اللي عملت الاكل
_ اهلا يا حضره الضابط نورتنا
زين قال قبل ما يبص في وشها
_ تسلم ايديك بجد يا انسه سيلا على الاكل الجميل ده انا اسف اكيد تعبتك النهارده وانت بتحضريه
_ لا لا تعب ولا حاجة دي حاجه بسيطه
ورفع عينه وشافها
_ايه ده انت
وهي قالت
_ ايه ده الضابط اللي شايف نفسه
_ نعم
_ لا لا مش قصدي انا بس....
امجد قال
_ انتم تعرفوا بعض
زين قال
_ لا ما تاخذش في بالك انت يا امجد وبعدها همس لسيلا وقال
_ ولا تحبي اقول له على اللي عملتيه
_على فكره امجد يفخر باللي عملته طبعا
_ يا شيخه قولي كلام غير ده
أمجد_ في حاجه يا زين
_لا لا ده انا كنت باخذ منها وصفة صينية الجلاش
_لا متشغلش بالك لو عايزها اطلبها بس مني وسيلا تعملك احلى صينيه جلاش كدا ولا ايه يا سيلا
_ هيهه طبعا طبعا
_ طيب يا حبيبتي ممكن تدخلي الاطباق دي جوا، ساعدها يا سينو يلا
_ حاضر
زين قال
_لا لا كفاية عليها كدا اكيد تعبت هنضف انا وسينو السفرة
_لا يا زين انت بتقول ايه
_ايه يا بني هو انت بتعتبرني حد غريب ولا ايه، اتفضلي انتي يا سيلا استريحي
_خلاص يا سيلا روحي اوضتك
سيلا في نفسها
_ ده طلع جنتل مان اهو حيث كدا بقا استغل الصحوبية دي لصالحي يس
_بتقولي حاجة يا سيلا
_لا يا أبيه مش بقول
سيلا انتظرت لما زين قضى وقته مع أمجد وخلاص مروح وخلاص وصل عند عربيته راحتله
_ ااه... كابتن
زين بص وراه يشوف مين
لقاها سيلا فقال
_كابتن، بردو؟؟
_ اا قصدي حضرة الظابط
_ خير يا سيلا عايزة ايه
_بم انك صاحب اخويا وكدا يعني
_ادخلي في الموضوع علطول
_طب بص بقا يا كبير
_ايه
_ خلاص خلاص يا حضرة الظابط
_ ده انتي باين عليكي مشكلة
_ ابدا ده أنا طيبة خالص وكيوتة
_ طب اتفضلي سامعك
_ أنا كنت طالبة منك مساعدة واتمنى متكسفنيش من فضلك
_ مساعدة مني انا .. ما علينا اتفضلي قولي مرة واحدة متتردديش
_ انا كنت عايزة ادخل كلية الشرطة وكنت عايزاك تقنع أمجد اخويا
_ وانتي لما فاتحتيه في الموضوع قالك ايه
_رفض ومش وافق نهائي وانا عارفة انك صاحبه وليك معزة عنده يعني ممكن يوافق لو اقنعته لان خلاص مبقاش وقت عن انتهاء التقديم
زين لف وشه ناحية عربيته علشان يركبها وقال
_ طالما أمجد رفض يبقى عنده وجهة نظر معينة وهو اخوكي الكبير وادرى بمصلحتك، سلام يا سيلا
سيلا بصتله بغيظ شديد
_ اممم وبعدين بقا وانا اللي فكرته طيب وهيساعدني حيث كدا بقا أنا هساعد نفسي بنفسي ومش هعتمد على حد وبظروفها بقا علقة تفوت ولا حد يموت
___
تاني يوم في مقر كلية الشرطة في المكان الخاص بامتحان القدرات للطلبة الجدد
راحت سيلا من غير ما حد من أخواتها يعرف وقدمت الورق بتاعها وانتظرت دورها في الاختبار القدرات
_ حلو اوي أنا كدا هخلص كل حاجة من غير ما يعرف ويوم ما أقبل في الاختبار ده وخلاص اسمي ينزل هنا في الكلية ساعتها أمجد مش هيقدر يقول حاجة بصت قدامها
_ ايه دا يا وقعة سودا ده أمجد جه هنا، ياختااي هو هنا بيعمل ايه مش المفروض هو في مكتبه دلوقتي ايه اللي جابه الكلية، مصيبة ليكون هو المشرف على الامتحان يبقة خطتي راحت فشنك، عااا .. يالهوي ده جاي على هنا
حاولت سيلا تستخبى من اخوها في البنات اللي جاية امتحان القدرات ولما شافت واحد لابس كاب ومديها ضهره، شدتها منه علشان تلبسها وتخاول تداري وشها من اخوها وقالت
_ بعد اذنك يا كابتن انا محتاجة الكاب لدقيقة واحدة بس وهرجعها ليك
زين بص قدامه ولما شافها قال
_يخربيتك انتي ، سيلا انتي بتعملي ايه هنا
سيلا اتصدمت وقالت
_ ييي انت هنا انت كمان، ده ايه الحظ النحس ده ياربي، عااا
زعق
_انطقي قولي ايه اللي جابك هنا وطبعا أمجد ميعرفش وجاية من وراه مش كدا
_ استر عليا ربنا يسترك يا زين
_ انتي بتقولي ايه يا مجنونة انتي
_ بالله عليك متقولش حاجة لأمجد انا كلية الشرطة حلم حياتي يرضيك محققش حلمي ها يرضيك
_ سيلا اللي بتعمليه ده غلط أمجد لو عرف مش هيسكت
_ ان شاء الله لما يشوفني قبلت في امتحان القدرات هيآمن بيا وبقدراتي الفذة ومش هيقول حاجة
_ بتحلمي يا سيلا
_ يووه اعمل ايه بقا ما انت اللي رفضت تقنعه انت السبب في اني أجي هنا من غير اذنه
_ يا شيخة
اتحرك زين من مكانه
فقالت
_استنى يا زين انت مش هتقوله صح، بالله عليك متقولوش
_ مقدرش أخدع صاحبي وحبيبي
_بالله عليك بالله عليك ..اصلا انا ممكن متقبلش يعني
_ ياريت
_ طب مش هتقوله صح
_مضطر اغطي عليكي واتمنى متقبليش
_متقاطعش انت بس
__
بعد ساعة بس كانت سيلا خلصت الاختبارات النظريه وعملت الكشف الطبي وكان ناقصها بس اختبار كشف الهيئه واختبار اللياقه البدنيه قابلها زين ثاني وقال
_ ها عملتي ايه خلصتي ولا لسه
_خلصت كله والحمد لله فاضل بس كشف الهيئه واللياقه البدنيه تعرف انت النظام فيهم ايه
_ لا لا دي حاجه بسيطه اعتقد انك تقدري عليها يعني بعد اللي شفته منك مع الحرامي فاكراه
_الا فاكراه لو كنت بس سبتني خلصت عليه
_ لا انا باقول انادي الامجد هو اللي يعمل لك اختبار اللياقه البدنيه
_ لا لا بالله عليك انا ما صدقت ان هو ما شافنيش اصلا
_ انت تحمدي ربنا ان امجد مشرف على تدريبات الشباب مش البنات
_ لا استنى اوع تقول انك مشرف على تدريبات البنات
ضحك زين وقال
_ لا اطمني ده من حسن حظك اني ان من ضمن لجنه المراقبه وبس
سيلا فرحت وقالت
_ يس الحمد لله ربنا بيحبني
ضحك زين
_ طب اتفضلي يلا بينادوا عليكي بس لازم تكوني عارفه اني ما ليش اي دعوه باللي هيعملوا فيكي امجد لو عرف
_ ربنا يستر ويجعل كلامنا خفيف عليه سيلا دخلت القاعه وكان قدامها بينش كبير جدا وعليه ضباط بنات بيشرفوا على التدريبات
الضابط طلبت من سيلا
انها تقاتل الاله اللي محطوطه قدامها سيلا من كثر حماستها واندفعها ضربت الاله ضربه قاضيه كسرتها تماما باضطروا انهم يوقفوا التدريب وباقي الطلبه يكملوا الامتحان بكره لما يصلحوا الاله اللي كسرتها سيلا
سمع زين باللي حصل فقال
_ يخرب بيت يدك الطرشة انت عملتي ايه
_ ولا حاجه.. بصراحه ده هي اللي متكسره وقديمه وكان المفروض يصلحوها من زمان يعني العيب مش مني يعني.. انتم عايزين تلبسوها ليا وخلاص
زين قال بضبق
_سيلا اطلعي بره مش عايز اشوف وشك اطلعي
_ طيب انا اصلا كده كده ماشيه زمان ياسين رجع من الشغل ومش هيلاقيني في البيت وهيعلقني
سيلا مشيت خطوتين وبعدين رجعت ثاني لزين وقالت له
_ يا كابتن قصدي يا حضره الضابط هو نتيجه الاختبار ده حتطلع امتى
قالوا هو بيضغط على اسنانه جامد
_تابعي على الموقع النهارده او بكره بالكثير
ثاني يوم امجد طبعا شاف اسم سيلا من ضمن الطلبه الناجحين في اختبارات القدرات فرجع البيت وهو ناولها على كل شر
_سيلا تعالي هنا حالا
ياسين قال لها
_ استر يا رب شكلك عملت مصيبه من عمايلك السوده اعترفي يا بنت عملت ايه خلتيه راجع شايط كدا
سيلا قامت من مكانها واستخبت وراء ياسين وقالت
_ استر يا رب ده شكله عرف بنتيجه اختبار القدرات اللي نجحت فيه
_اختبار ايه ده وانا اخر من يعني
_لا لا ما تاخذش في بالك انا كنت مقدمه في كليه الشرطه ونجحت بس هي دي الحكايه
ياسين قام وقف وقال
_ يخرب بيتك عملتيها يا مجنونه وربنا شكلك ما هتباتي النهارده في البيت
_لا لا ياسين بالله عليك اقف جنب اختك الغلبانه من الطيور الهايج ده
قرب أمجد من سيلا
_تعالي تعالي هنا يا زفتة وربنا ما حد هيخلصك من أيدي النهاردة
سيلا جريت على بعيد
_يا لهوي ده جاي وفي ايده الحزام، اهدى كدا يا أمجد ونتكلم بالهدواة ده انا اختك حبيبتك
_هداوة انتي خليتي فيها هداوة بقا تروحي تقدمي في الشرطة وتقومي بالاختبارات من غير اذني يا جبروتك يا شيخة
_معلش بقى يا أمجد انت اللي اضطرتني اعمل كدا ما انا هموت وادخل شرطة زيك
_لا معلش دي بليها واشربي ميتها، تعاليلي هنا
_عااا الحقني يا سينو ده بيضرب بجد
سينو ضحك
_ده هيعمل منك بطاطس محمرة النهاردة
_لا لا يا أمجد علشان خاطري، سماح النوبة دي عاااا
_هسامحك بس لو روحتي سحبتي ورقة من هناك وقدمتي في اي مصيبة تانية
_لااا مش هيحصل أبدا
_بقا كدا طب ما تلوميش الا نفسك
سيلا نطت اتشعلقت ف المروحة وقالت
_لااااا ياختااي مكانش يومك يا سيلا
أمجد
_انزلي يا متخلفة
_لا مش نازلة
في الوقت ده جه زين وضرب الجرس ياسين فتحله سمع امجد بيقول
_انزلي يا سيلا بلاش تعملي زي القرود
_لا انا عاجبني حياة القرود، مش أحسن لما تضربني يا متهور انت
_طيب خليكي متشعلقة كدا من هنا للسنة الجاية
زين ضحك
_هو ايه اللي بيحصل هنا، حديقة الحيوان نقلت هنا ولا ايه
_اه انا اتحولت قرد وصاحبك ده مدرب القرود
زين انفجر من الضحك هو وياسين
أما أمجد فكان شايط
_وقسما بالله يا سيلا ما سايبك النهاردة
_ما خلاص بقا يا أمجد سماح بقا وربنا ايدي وجعتني وهقع ف اي لحظة
_ياريت
_ما تقول حاجة يا زين ولا انت جاي تضحك على احزاني
_بصراحة اه
_بقا كدا، طب حيث كدا بقا يا أمجد زين صاحبك كان عارف وهو اللي ساعدني أخلص اجراءات التقديم
_يخربيت كدبك
_تستاهل علشان تضحك اوي
أمجد
_زين انت كنت عارف وممنعتهاش
_شوفتها هناك يا أمجد وكانت تقريبا خلصت فسبتها تكمل قلت اكيد مش هتنجح
_وليه مقلتليش
_كنت عارف انك كدا كدا هتعرف
ياسين اشفق ع اخته
_خلاص يا أمجد اللي حصل حصل سيبها تأخد فرصتها
_لا مش هيحصل
زين قال
_أختك جواها طاقة كبيرة فسيبها تخرج في كلية الشرطة بدل ما هي كل يوم والتاني عاملة ليكم مصيبة ياخي دي كسرت آلة التدريب من ضربة واحدة وربنا مفترية
ضحك أمجد وقال
_عادتها ولا هتشتريها، طول عمرها من وهي صغيرة وهي بتدرب معايا ومش بتفوت ولا تدريب لحد ما بقت زي ما انت شايف دلوقتي
سيلا نزلت وقالت
_الحمد لله طالما ضحك يبقى هيعتقني لوجه الله
هنا أمجد مسكها
_والله ووقعتي في ايدي
سيلا صرخت
_عااااا الحقوني روحت فطيييس
زين وياسين ضحكوا
وأمجد قال
_مكنتش متوقع انك تفوزي ف الاختبار يا مجنونة والحقيقة كنت خايف عليكي بس انتي الظاهر يتخاف منك مش عليكي أنا موافق تدخلي شرطة
سيلا فضلت تتنطط
_يحيا العدل يحيا العدل
أمجد بص لزين اللي نوا ليها الاتنين انهم يتوصوا بيها ف التدريبات
_بس مترجعيش تندمي لاني انا وزين هنكون المشرفين ع تدريب الطلبة الجدد، ومحدش هيرحمك من ادينا
سيلا قعدت ع الارض وحطت أيدها ع راسي
_سينو انا اللي جبته لنفسي انا اللي استاهل ضرب الجزمة
ضحوا كلهم عليها
فقامت عليهم تضربهم
_بقا كدا متفقين كلكم عليا
سينو جري بسرعة
_اهرب بسرعة الغوريلا سابت ......
بقلمي أسماء عبد الهادي
ممتعه وجميله
ردحذففين الباقى ياسيمو
ردحذفروعه ياسيمو تسبم ايدك
ردحذفجميله 🌹🌹🌹
ردحذفهههههههههههه عسل ياسيمو اسكريبت سكر 😁🥰😘
ردحذف